ኤርማሳ ቲንቢቴ 18 - ጋሞ ማጻፋ

ማና ኬን ኤርማሳ

¹ ጎዳ ማታፔ ኤርማሳኮ፥

² «ዴንዳዳ ማናሶ ባ፤ ሄን ታ ኔስ ታ ኪታ ዮታና» ጊዛ ቃላይ ዪዴስ።

³ ታኒካ ዱጌ ማናዛሶ ባዲስ፤ ኢዚ ባ ሜዛ ኢርዞ ቦላ ኦቶ ሜሺን ቤኣዲስ።

⁴ ኢዚ ሜሺን ኦቶዚ ኢዛ ኩሼን ሞሬቲዴስ፤ ሂስቲን ኢዚ ሄ ኡርቃ ዛሪዲ ባ ኮዪዳ ማላ ሜዴስ።

⁵ ሄ ዎዴ ጎዳ ቃላይ፥

⁶ «ኢስራኤሌ ኣሳዉ! ማናዚ ኦዛይሳ ታ ኢንቴና ኦናስ ዳንዳይኪና? ኢስራኤሌ ኣሳዉ! ኡርቃይ ማና ኩሼን ዲዛይሳ ኢንቴካ ታ ኩሼን ዴታ።

⁷ ታኒ ኢሲ ዴሬይ ዎይኮ ኢሲ ካዎቴ ሾዴታና ማላ፥ ላሌታና ማላኔ ያና ማላ ዮቲኮ፥

⁸ ሄ ታኒ ዮቲዳ ካዎቴይ ባ ኢታቴፌ ኣጊዲ ሲሚኮ፥ ታኒ ኢስታ ቦላ ኤሃና ጊዳ ኢታ ሚሽ ኤሆንታ ኣጋጋና።

⁹ ቃሴ ሃራ ዎዴካ ታኒ ኢሲ ዴሬ ዎይኮ ኢሲ ካዎቴ ሚን ኤሳናስ ዮቲኮ፥

¹⁰ ታ ሲንን ኢታ ሚሽ ኦኮኔ ታስ ኣዛዜቶንታ ኢጺኮ፥ ‹ታ ኢዛስ ኦና› ጊዳ ሎኦ ሚሻ ኡባ ኦንታ ኣጋጋና» ጌስ።

¹¹ ጎዳይ፥ «ሄሳ ጊሻስ፥ ኤርማሳ ሃኢ ዩሁዳ ኣሳታሲኔ ዬሩሳላሜን ዲዛይታስ ባዳ፥ ‹ሄኮ ታኒ ኢንቴ ቦላ ባሽ ጊጊሶ ቦላ ዳይስ፤ ኢንቴ ቦላ ኢታ ሚሽ ሜሼ ዳይስ፤ ሄሳ ጊሻስ ኢንቴ ኡባይካ ኢንቴ ቢዛ ኢታ ኦጌፔ ሲሚቴ፤ ኢንቴ ኦጌኔ ኢንቴ ኦሶ ሱሪሲቴ› ጋ ዮታ።

¹² ጊዶ ኣቲን ኢስታስ፥ ‹ዳቡሮፓ፤ ኑ ሃልቺዳ ኦጌራ ባና፤ ኑኒ ኢሶይ ኢሶይ ኑ ኢታ ዎዚና ቆፋ ካላና› ጌቴስ» ጊዴስ።

¹³ ሄሳ ጊሻስ ጎዳይ፥ «ኣኔ ካዎቴታ፥ ‹ሃይሳ ማላ ሚሺ ኢንቴ ጊዶን ሴቴቲ ኤሪዜ?› ጊ ኦይቺቴ። ጌላኦያ ኢስራኤሌይ ሃራሲዛ ኢታ ሚሽ ኦዱስ።

¹⁴ ሹች ጻላ ጊዲዳ ሊባኖሴ ዙማታ ቦላፌ ሻቺ ዪ ኤሪዜ? ላዴ ቦላፌ ዱጌ ጎጊዛ ኢርጻ ሃ ጎጌ ኣጊ ኤሪዜ?

¹⁵ ታ ዴሬይ ጊዲኮ ታና ባሊዴስ፤ ኢስቲ ጎኦንታ ጾሳታስ ኤጻኔ ጩዋሴቴስ፤ ባንታ ኦጌራ ቢዲ ጴቲዳ፤ ቤኒ ኦጌፔ ካሬ ኬዚዳ፤ ባሴቶንታ ዲዛ ኩንዱኩርጮ ኦጌራ ቢዳ።

¹⁶ ኢስታ ቢታይ ቡላኔ ሜርናስ ካቲዳዝ ጊዳና፤ ሄራ ኣዛ ኡባይ ማላሌታና፤ ባ ሁኤካ ቂሼ ቃና።

¹⁷ ኣርሼይ ሞኪዛ ባጋ ጫርኮ ማላ ታኒ ኢስታ ኢስታ ሞርኬታ ሲንን ላላና። ኢስቲ ይዛ ጋላስ ታ ኢስታስ ዞኮ ዛራና ኣቲን ታ ኣይፌሶ ቤሲኬ» ጌስ።

ኤርማሳ ቦላ ማቄቲዳ ማቆ

¹⁸ ኢስቲካ፥ «ኣኔ ሃ ዪቴ፤ ኤርማሳ ቦላ ማቄቶስ፤ ዎጋይ ቄሴታ ኣቻን፥ ዞሬይ ኣ ኤራንቻታ ኣቻን፥ ቃላይካ ናቤታ ኣቻን ዬና፤ ኣኔ ሃ ዪቴ፤ ኑ ኢንጻርሳን ኢዛ ቶቾስ፤ ኢዚ ጊዛይሳካ ኡባ ሲዮኮ» ጊዳ።

¹⁹ ኣቤት ጎዳዉ! ታ ጊዛዝ ሲያ፤ ታ ሞርኬቲ ታ ቦላ ሃሳይዛይሳ ኤዝጋ።

²⁰ ሎኦ ኦዳዴስ ኢታ ዛሪዞ? ኢስቲ ጊዲኮ ታስ ኦላ ቦኪዳ፤ ኔ ሃንቆይ ኢስታፌ ሲማና ማላ ኔ ሲንን ኤቃዳ ኢስታ ጊሻስ ታ ዮቲዳይሳ ቆፓ።

²¹ ሄሳ ጊሻስ ኢስታ ናይታ ኮሻሲኔ ማሻስ ኣ ኢማ፤ ኢስታ ማጫሳቲ ማይኔኔ ኣምኤታ ጊዴቶ፤ ኢስታ ኣቱማሳቲካ ፓራ ሃይቆን ዉሬቶ፤ ኢስታ ናቴ ናይቲ ኦላሶን ማሻስ ጊዴቶ

²² ኢስቲ ታና ኩንዲሳናስ ኦላ ቦኪዛ ጊሻሲኔ ታ ቶሆስካ ዎጺማዴ ዎዳ ጊሻስ ኢስቲ ቆፖንታ ኔኒ ኢስታ ቦላ ቦንቂዛይታ ዬዲን ኢስታ ኬን ዋሶይ ኬዞ።

²³ ጊዶ ኣቲን ኣቤት ጎዳዉ! ኢስቲ ታና ዎናስ ማቄቲዳይሳ ኡባ ኔኒ ኤራሳ፤ ኔኒ ኢስታ ኢታቴ ኣቶ ጎፓ፥ ዎይኮ ኢስታ ናጋራ ኔ ሲንፌ ቁጮፋ፤ ኢስቲ ኔ ሲንን ጾኔቲዲ ኩንዴቶ፤ ኔ ሃንቆ ጋላስ ኔ ኢስታ ማሮፓ።