ኤርማሳ ቲንቢቴ 17 - ጋሞ ማጻፋ

ዩሁዳይ ኦዳ ናጋራ ጊሻስ ኢሜቲዳ ቂጻቴ

¹ ጎዳይ፥ «ዩሁዳ ናጋራይ ቢራታ ቢኢሬኒኔ ሆጼ ኣልማዜ ጼራን ጻፌቲዴስ፤ ኢስታ ዎዚና ቦላኔ ኢስቲ ያርሺዛሶን ዲዛ ካጬታ ቦላ ጻፌቲዴስ።

² ኢስታስ ናይቲካ ኣቶንታ ጪሊላ ሚታ ጋርሳኒኔ ቃ ዙምቡላታ ቦላ ዲዛ ያርሾሶታኔ ኣሼሮ ጌቴቲዛ ኤቃ ሚስሌዮ ቆፔቴስ።

³ ኔ ቢታን ኦሴቲዳ ናጋራ ጋሶን ዙማታ ቦላኔ ዙምቡላታ ቦላ ዲዛ ኔ ኣቆታ፥ ኔ ዱሬቴኔ ኔ ጎይኖሶታ ታኒ ዲኦስ ኣ ኢማና።

⁴ ኔ ሞሮ ጋሶን ታ ኔስ ኢሚዳ ጺንጾዛፔ ኔ ሜላ ኣታና፤ ኔና ታኒ ኔ ኤሮንታ ቢታን ኔ ሞርኬታስ ኣይሌሳና። ጋሶይካ ሜርናስ ታማ ማላ ኤጺዛ ታ ሃንቆዛ ኔ ዴንዳሳ» ጌስ።

ዱማ ዱማ ሌሚሶታ

⁵ ጎዳይ፥ «ኣሳን ኣማኔቲዛይ፥ ኣሾ ማይኢዳ ኣሳን ጬቄቲዛይ፥ ባ ዎዚና ጎዳፔ ሃሲዛይ ቃንጌቲዳዴ።

⁶ ኢዚ ባዞን ዲዛ ቄሪ ዎራ ማላ ጊዳና፤ ኢዚ ሎኦ ሚሽ ቤኤና፤ ኢዚ ኣሲ ባይንዳ ማጺኔ ቢታን ባዞን ሜላ ሶሆን ኡታና።

⁷ ጊዶ ኣቲን ጎዳን ኣማኔቲዛ ኣሲ፥ ኢዚ ኣማኔቲዛይ ጎዳ ጊዲዳዴይ ኣንጄቲዳዴ።

⁸ ኢዚ ሃ ላንቄን ቶኬቲዲ፥ ባ ጻጶ ዱጌ ሃን ዬዲዳ ሚ ማላ። ኣዋ ሴላስካ ያዬና፤ ኢዛ ሃይይ ጪሊሊዳ ማላ ዳና፤ ኣዋይ ዳሪዳ ላይካ ባቤና፤ ኣይፌ ኢሞፔካ ፓጬና።

⁹ ኣሳ ዎዚናይ ኡባ ሚሻፌካ ጌኔ፤ ኢዛስ ፓጻቴካ ዴና፤ ኢዛ ኤራናስ ኦኒ ዳንዳያኔ?

¹⁰ ታኒ ጎዳይ ኣስ ኡባስ ኢዛ ኦጌ ማላኔ ኢዛ ኦሶ ማላ ኢማናስ ኣሳ ዎዚና ፒልጋይሲኔ ኢዛ ካሃ ፓጫይስ» ጌስ።

¹¹ ቤሶንታ ኦጌራ ኣቆታ ዳጋሲዛ ኣሲ ባ ጱቂሶንታ ጪዬ ሃጵዛ ኩራቾ ማላ። ኢዛ ላይይ ቡሮ ባጋቲሺን ኢዚ ኣቆታ ኣጊ ባና፤ ዉርሴን ኢዛ ኤያቴ ቆንጬ ኬዛና።

¹² ኑ ጾሳ ኬ ዲዛሶይ ቤኒፔ ዶሚዲ ቁ ጊዳ ቦንቾ ኣራታ።

¹³ ኢስራኤሌስ ሂዶታ ጊዲዳ ጎዳዉ! ኔና ኣጊ ቢዳ ኡባይ ዬላታና፤ ኔና ዴኦ ሃ ፑልቶ ጊዲዳ ጎዳ ኣጊዳ ጊሻስ ባ ኣይፌሶ ኔፔ ሃራሶ ዛሪዛይቲ ጉዱላ ቦላ ጻፌቲዳይሳ ማላ ጊዳና።

ኤርማሳ ዎሳ

¹⁴ ኣቤት ጎዳዉ! ታና ፓ፤ ታኒካ ፓጻና፤ ታና ኣሻ፤ ታኒካ ኣታና፤ ጋሶይካ ታ ጋላታይ ኔና።

¹⁵ ኣሳይ ታና ዛሪ ዛሪዲ፥ «ጎዳ ቃላይ ኣዋን ዲዜ? ኣኔ ሃኢ ፖሌቶ!» ጌቴስ።

¹⁶ ሄንንቻ ጊዳዳ ኔስ ኦናፔ ጉዬ ጋቤኬ፤ ታ ኢስታስ ኢታ ጋላስ ኣሞቶንታይሳ ኔ ኤራሳ፤ ታ ዶናፔ ኬዚዛይሲ ኔ ሲንን ቆንጬ።

¹⁷ ታና ዳጋንዛዴ ጊዶፓ፤ ኔኒ ታስ ሜቶ ጋላስ ታ ባቃታ ኣቲዛሶሆ።

¹⁸ ታና ዬዴዛይቲ ዬላቴቶ፤ ታና ዬላሶፓ፤ ኢስቲ ዳጋሜቶ፤ ጊዶ ኣቲን ታና ዳጋማፔ ቆታ፤ ኢስታ ቦላ ኢታ ጋላስ ኤሃ፤ ኢስታ ቦላ ዳኮ ባሽ ኤሃ።

ሳምባታ ቦንቾ

¹⁹ ጎዳይ ታና፥ «ዩሁዳ ካዎቲ ካታማ ጌሊዛሶኒኔ ኬዚዛሶ ዴራ ፔንጌኒኔ ሃራ ዬሩሳላሜ ፔንጌታ ኡባን ባዳ ኤቃ።

²⁰ ሂስታዳ ኢስታስ፥ ‹ሃ ፔንጌታራ ጌሊዛ ዩሁዳ ካዎቶ! ዩሁዳ ኣሳቶ! ዬሩሳላሜን ዲዛ ኣስ ኡባቶ ጎዳ ቃላ ሲዪቴ!› ጋ» ጌስ።

²¹ ጎዳይ ታስ፥ «ሳምባታ ጋላስ ቶሆ ቶኪዲ ዬሩሳላሜ ፔንጌታራ ጌሎንታ ማላ ኢንቴስ ናጌቲቴ!

²² ሳምባታ ጋላሳን ኢንቴ ኬፌ ቶሆ ቶኪዲ ኬሶፍቴ፤ ዎይኮ ኣይኮ ኦሶኔ ኦፍቴ። ካሴ ኢንቴ ኣዋታ ታኒ ኣዛዚዳ ማላ፥ ሳምባታ ጋላስ ዱማሲዲ ቦንቺቴ።

²³ ኢስቲ ጊዲኮ ሲዪቤቴና፤ ዎዚናንካ ዎቤቴና፤ ኢስቲ ሲዮንታ ማላኔ ሲሞንታ ማላ ባ ዎዚና ሙሚሲዳ።

²⁴ ጊዶ ኣቲን ኢንቴ ታኒ ጎዳይ ዮቲዛይሳ ናጌቲ ኣዛዜቲኮ፥ ሳምባታ ጋላሳን ኣይ ሚሺካ ቶኪዲ ሃኖ ሃ ካታማይ ፔንጌታራ ጌሎንታ ኣጊኮ፥ ሳምባታ ጋላስ ዱማሲዲ ኢዛን ኣይ ኦሶኔ ኦንታ ቦንቺኮ፥

²⁵ ዳዊቴ ካዎቴ ኣራታን ኡቲዛ ካዎቲኔ ኢስታ ሹሜቲ ሃ ካታማይ ፔንጌራ ጌላና፤ ኢስቲ ባ ፓራታኒኔ ባ ፓራ-ጋሬታ ቦላ ኡቲዲ ዩሁዳ ኣሳይኔ ዬሩሳላሜ ኣሳይ ኣዣቢን ያና፤ ሃ ካታማያ ሜርናስ ኣሲ ዲዛ ካታማ ጊዳና።

²⁶ ኣሳይ ጹጌቲዛ ያርሾኔ ሃራ ያርሾ፥ ካ ያርሾ፥ ኤጻኔኔ ጋላታ ያርሾ ኤኪዲ፥ ዩሁዳ ካታማታፔ፥ ዬሩሳላሜ ዩሾን ዲዛ ሞታፔ፥ ቢኒያሜ ቢታፌ፥ ጋፔኔ ጌዜፌ ቃሴካ ኔጌቤ ቢታፌ ጎዳ ኬ ያና።

²⁷ ጊዶ ኣቲን ኢንቴ ሳምባታ ጋላሳታ ዱማሶንታ ኢጺዲ ሳምባታ ጋላስ ቶሆ ቶኪዲ ዬሩሳላሜ ፔንጌታራ ጌሊዲ ታ ኣዛዞ ሜንኮ ታኒ ዬሩሳላሜ ፔንጌታ ቦላ ኢዚ ሚጻታ ሚዛ ቶኦንታ ታማ ታ ኤና» ጊዴስ።