ኤርማሳ ቲንቢቴ 15 - ጋሞ ማጻፋ

ዩሁዳ ኣሳ ቦላ ጋካና ፒርዳ

¹ ሄሳፌ ጉዬ ጎዳይ ታስ፥ «ሙሴይኔ ሳሜሊ ታ ሲንን ኤቂዳኮካ ታ ዎዚናይ ሃ ዴራስ ሚሼቴና፤ ኢስታ ታ ሲንፌ ዲጋ፤ ኢስቲ ቤቶ።

² ቃሴ ኢስቲ ኔና፥ ‹ኑኒ ኣዋ ቢኖ?› ጊ ኦይቺኮ፥ ኔ ኢስታስ፥ ‹ሃይቆስ ፒርዴቲዳይቲ ሃይቃና፤ ማሻስ ፒርዴቲዳይቲ ማሻን ሹኬታና፤ ኮሻስ ፒርዴቲዳይቲ ኮሻን ዉራና፤ ዲኤታናስ ፒርዴቲዳይቲ ዲኤቲ ባና።›

³ «ጎዳይ፥ ‹ታኒ ኦይዱ ቆሞ ባሽ ኢስታ ቦላ ኤሃና፤ ሄይቲካ ኢስታ ዎናስ ማሻ፥ ኢስታ ኣሃ ጎቻናስ ካናታ፥ ኢስታ ኣሾዛ ሚዲ ይሳናስ ሳሎ ካፎታኔ ሳኣ ዶኣታ።

⁴ ሂዝቂያሳ ና፥ ዩሁዳ ካዎ ሚናሴይ ዬሩሳላሜን ኦዳ ፓላ ጊሻስ ታኒ ኢስታ ቦላ ሳኣ ካዎቴታ ኡባስ ዳጋንዛዝ ኦና› ጌስ ጋዳ ዮታ» ጊዴስ።

⁵ «ሃኔ ዬሩሳላሜ! ኔስ ኦኔ ቃታናይ? ኔስ ሚሼታናይ ኦኔ? ኔ ሎኤቴ ጌሊ ኦይቻናይ ኦኔ?» ጌስ።

⁶ «ኔ ታና ኣጋዳሳ፤ ጉዬ ጉዬ ባሳ፤ ሄሳ ጊሻስ ታኒ ኔ ቦላ ታ ኩሼ ዴንዳ ኔና ይሳና፤ ሃይሳፌ ጉዬ ኔስ ቃቲኬ።

⁷ ታኒ ኢስታ ካ ሱራጊዛ ማላ ሱራጋዳ ካታማታ ፔንጌን ላላና፤ ኢስቲ ባ ኦጌፔ ሲሞንታ ኣጊዳ ጊሻስ ታኒ ታ ዴሬዛ ካዮን ኩንና፤ ኢስታ ቦላካ ባሽ ኤሃና።

⁸ ታኒ ኢስታ ኣምኤታ ቆዳ ኣባን ዲዛ ኣጬፔካ ዳርሳና፤ ሚኖ ኣዬታ ይሲዛዝ ሴታ ጋላስ ታ ኢስታ ቦላ ኤሃና፤ ኢስቲ ቆፖንታ ዲሺን ዳጋማኔ ሺሮ ታ ኢስታ ቦላ ዬጋና።

⁹ ላፑን ናይቲ ሃይቂዳ ኣያ ዳጋማን ዳቡራና፤ ፔኖራ ያና ኢዚስ ጋላሳይ ቃማና፤ ኢዛ ዬላታናኔ ካዉያና፤ ኣቲዳይታካ ሞርኬታ ማሻስ ኣ ኢማና» ጌስ ጎዳይ።

ኤርማሲ ባ ሜቶ ጎዳስ ማጋኒዴስ

¹⁰ ታ ኣዬ! ሃኖ ፖራ! ታኒ ኣስ ኡባስ ኦሻሲኔ ፓላማስ ጊዳና ማላ ኣይስ ታና ዬላዲ? ታኒ ኦናስካ ታልኤ ኢማቤኬ፤ ኦናፔካ ታልኤ ኤካቤኬ፤ ጊዶ ኣቲን ኣሲ ኡባይ ታና ቃንጌስ።

¹¹ ጎዳይ፥ «ቱማፔ ታኒ ኔና ሎኦ ሚሻስ ኣሻ ኤካና፤ ቱማፔ ኔ ሞርኬቲ ሜቶ ዎዴኔ ዋዬ ዎዴ ኔና ሾባና ማላ ታኒ ኦና።

¹² ኣሲ ቢራታ፥ ፑዴሃ ባጋፌ ዪዳ ቢራታ ዎይኮ ጻርቂማላ ሜንና ዳንዳይዜ?

¹³ ኔ ዴሬ ኡባን ኦሴቲዳ ናጋራ ጊሻስ ኔ ኣቆታ ኡባ ዲኢዛይታስ ጮ ኣ ኢማና።

¹⁴ ታ ሃንቆይ ኢንቴ ቦላ ታማ ማላ ኤጻና፤ ሄሳ ጊሻስ ኔኒ ኔ ኤሮንታ ቢታን ኔ ሞርኬታስ ታኒ ኔና ኣይሌሳና» ጊዴስ።

¹⁵ ኣቤት ጎዳዉ! ኔ ኤራሳ። ታና ቆፓ፤ ሞካካ ጼላ፤ ታና ዬዴዛይታ ቦላ ሃሎ ኬሳ፤ ኔ ዳንዳያንቻ ጊዲዳ ጊሻስ ታና ይሶፋ፤ ኔ ጋሶን ታና ጋኪዛ ካዛ ኔ ቆፓ።

¹⁶ ኣቤት ኡባፌ ዎልቃማ ጎዳዉ! ታኒ ኔ ሱንን ጼይጌቲዳ ጊሻስ ኔ ቃላይ ታኮ ዪን ማዲስ፤ ሂስቲን ኔ ቃላይ ታስ ፓሽካኔ ዎዚና ኡፋይስ ኢሚዴስ።

¹⁷ ጉፒዛይታራ ኡታቤኬ፤ ኢስታራካ ጉፓቤኬ። ኔኒ ኔ ኩሼ ታ ቦላ ዴንዳ ጊሻሲኔ ኔ ሃንቆ ታ ቦላ ዬዲዳ ጊሻስ ታኒ ታርካ ኡታዲስ።

¹⁸ ታ ቦላ ሃርጌይ ኣይስ ሚኒዴ? ታ ማዱንይ ኣይስ ዳሪ ዳሪ ቢዴ? ኣይስ ፓጾንታ ኢጺዴ? ኔኒ ታስ ባሌዛ ሻፋ ማላኔ ጪሚዛ ፑልቶ ማላ ኣይስ ጊዳዲ?

¹⁹ ሄሳ ጊሻስ ጎዳይ፥ «ኔኒ ሲሚኮ ታ ኔና ዛራ ኤሳና፤ ኔካ ታስ ኦና። ሃዳ ዮኦ ኣጋዳ ቦንቾ ቃላ ጻላ ሃሳይኮ ኔኒ ታ ዶና ጊዳና። ኢስቲ ኔኮ ሲማና ኣቲን ኔ ኢስታኮ ሲማካ።

²⁰ ታ ኔና ሃ ዴራስ ጊምቤ ኦና፤ ጻርቂማላፔ ኦሴቲዳ ጊምቤ ማላ ሂስታና፤ ታኒ ኔና ኣሻናሲኔ ዎ ኤካናስ ኔናራ ዲዛ ጊሻስ ኢስቲ ኔናራ ኦሌታና ሺን ኔና ጾኔቴና።

²¹ ኢታታ ኩሼፔ ታኒ ኔና ዎዛና፤ ሜንጼ ኢታታ ቆሆፔካ ታ ኔና ኣሻና» ጌስ።