ኤርማሳ ቲንቢቴ 14 - ጋሞ ማጻፋ

ኮሻ፥ ጋፋኔ ኦላ

¹ ጎዳይ ኮሻ ጊሻስ ኤርማሳስ ዮቲዳ ቃላይ ሃይሳፌ ካሊዛይሳ፤

² «ዩሁዳ ቢታይ ዬኬስ፤ ካታማቲካ ፖርቁ ጌቴስ፤ ኣሳይ ቢታ ቦላ ኡቲዲ ጬጬስ፤ ዬሩሳላሜፔካ ዋሶይ ሴቴቴስ።

³ ዱሬቲ ባንታ ኣይሌታ ሃ ዱቃናስ ኪቴቴስ። ኢስቲካ ሃ ኦላይ ዲዛሶ ቤቴስ፤ ጊዶ ኣቲን ሃ ዴሜቴና፤ ባንታ ኦቶ ሜላ ቶኪ ኤኪዲ ሲሜቴስ። ዬላቲዲኔ ሂዶታ ቃንጺዲ ባንታ ሁኤ ጉሉንቴቴስ።

⁴ ኢራይ ቡኮንታ ጊሻስ ቢታይ ሜሊዲ ዛኤስ። ጎሻንቻቲ ዬላቲዲ ባንታ ሁኤ ጉሉንቴቴስ።

⁵ ማታይ ባይንዳ ጊሻስ ቆርኬይ ባ ዬሊዳ ማራ ዴምባን ዬጋዳ ባዉስ።

⁶ ሃርዲዳቲ ኣይኮይ ባይንዳ ዙምቡላታ ቦላ ኤቂዳ፤ ዎራካናታ ማላ ሃ ኮዪዲ ሌሶቴቴስ። ኢስታስ ሚዛ ሚሺ ይዳ ጋሶን ኢስታ ኣይፌይ ጼላናስ ዳቡርዴስ» ጊዴስ።

⁷ ኣሳይ፥ «ኣቤት ጎዳዉ! ኔ ሲንፌ ባቃታ ዳርሲዶስ፤ ኔ ሱን ጊሻስ ኑስ ኢሲ ሚሽ ኦ፤ ኑኒ ኔፔ ዳሮቲ ጉዬ ሲሚዶስ፤ ኔ ቦላን ናጋራ ኦዶስ።

⁸ ኣቤት ኢስራኤሌ ሂዶታዉ! ሜቶ ዎዴ ኣሺዛይሶ! ኔኒ ቢታን ኢማ ማላ፥ ኢሲ ኦማርስ ኣቂዲ ቢዛ ኦጌ ኣሳ ማላ ኣይስ ሃናይ?

⁹ ኔኒ ሃኒዛዚ ይዳ ኣሳ ማላ፥ ኣሻናስ ዎልቃይ ይዳ ኦላንቻ ማላ ኣይስ ጊዳይ? ኣቤት ጎዳዉ! ኔኒ ኑ ጊዶን ዳሳ፤ ኑኒካ ኔ ሱንን ጼይጌቲዶስ፤ ኑና ኔኒ ኣጎፋርኪ!» ጊዴስ።

¹⁰ ሃ ኣሳታ ጊሻስ ጎዳይ፥ «ኢስቲ ቶይላቴቴ ኬሂ ዶሴቴስ፤ ባንታ ቶሆ ናጌቴና። ሄሳ ጊሻስ ጎዳይ ኢስታን ኡፋዬቴና፤ ሃኢ ኢዚ ኢስታ ቆሆ ቆፔስ፤ ኢስታ ናጋራ ጋሶን ኢስታ ቃጻዬስ» ጌስ።

¹¹ ሄሳፌ ጉዬ ጎዳይ ታና፥ «ሃ ዴራ ሎኦቴስ ዎሶፋ።

¹² ኢስቲ ጾሚ ዎሲኮካ ታኒ ኢስታ ዋሶ ሲዪኬ፤ ጹጌቲዛ ያርሾኔ ካ ያርሾዛ ኢስቲ ያርሺኮካ ታኒ ኢስታ ያርሾዛ ኤኪኬ። ታኒ ኢስታ ማሻን፥ ኮሻኒኔ ኢታ ሃርጌን ይሳና» ጊዴስ።

¹³ ሂስቲን ታኒ፥ «ኣቤት ኡባፌ ዎልቃማ ጎዳዉ! ኣዬ ኣና! ናቤቲ ኢስታስ፥ ‹ኢንቴ ኦላ ቤኤኬታ ዎይኮ ኮሻይ ኢንቴና ዴሜና፤ ታኒ ኢንቴስ ዉርሴ ጋካናስ ሳሮቴ ኢማና› ጌቴስ» ጋዲስ።

¹⁴ ሂስቲን ጎዳይ ታስ፥ «ናቤቲ ታ ሱንን ዎርዶ ዮቴቴስ። ታኒ ኢስታ ኪታቤኬ፥ ኣዛዛቤኬ፥ ኢስታስካ ዮታቤኬ። ኢስቲ ኢንቴስ ዎርዶ ኣጁታ፥ ሙሬኖ ዮኦ፥ ሃዳ ዮኦኔ ባንታ ዎዚናን ዲዛ ባሌ ዮኦ ዮቴቴስ።

¹⁵ ሄሳ ጊሻስ ታ ኪቶንታ ዲሺን፥ ‹ኦላይኔ ኮሻይ ሃ ቢታይ ቦላ ዬና› ጊዲ ታ ሱንን ዎርዶ ቲንቢቴ ዮቲዛ ናቤታ ታኒ ኦላኒኔ ኮሻን ይሳና።

¹⁶ ቃሴ ኢስቲ ቲንቢቴ ዮቲዳ ዴሬይካ ኮሻኒኔ ኦላ ጋሶን ዬሩሳላሜ ዱቡሻታን ኩንዳና፤ ኢስታስ፥ ኢስታ ማቼታ፥ ኢስታ ኣቱማ ናይታኔ ማጫ ናይታ ኣሃ ሞጊዛይ ያና፤ ታኒ ኢስታ ሞሮ ማላ ኢስታ ቦላ ቂጻቴ ኤሃና» ጊዴስ።

¹⁷ ሃ ቃላ ኢስታስ፥ « ‹ታ ዴሬይ ኬሂ ዴሼቲዲ ማዱንጺዳ ጊሻስ፥ ታ ኣይፌቲ ኦማርሲኔ ጋላስ ሼምፖንታ ኣፉንጼቴስ።

¹⁸ ታኒ ጋጻሬ ቢኮ፥ ማሻን ሃይቂዳይታ ቤኣይስ፤ ካታማ ጌሊኮ ኮሻይ ዉርሲዳይታ ቤኣይስ። ናቤቲኔ ቄሴቲ ባ ኤሮንታ ዴሬ ባቃቲዳ› ጌስ ጎዳይ» ጊዴስ።

¹⁹ ኣቤት ጎዳዉ! ኔኒ ዩሁዳ ሙሌካ ኣጋዲ? ጺዮኔ ኣሳ ሃራሴታዲ? ኔኒ ኑና ፓጾንታ ማላ ኦዳ ኣይስ ዴቻዲ? ኑኒ ሳሮቴ ናጊዶስ፤ ጊዶ ኣቲን ሳሮቴ ዴሚቤኮ፤ «ፓጻና ዎዴይ ያና» ጊዲ ናጊዶስ፤ ጊዶ ኣቲን ዳጋማ ጻላ ጊዲዴስ።

²⁰ ኣቤት ጎዳዉ! ኑኒ ኑ ኢታቴ ኤሪዶስ፤ ኑ ኣዋታ ቆሆካ ኣኬኪዶስ፤ ቱማፔካ ኔ ቦላ ናጋራ ኦዶስ።

²¹ ኑና ኔ ሱን ጊሻስ ጋዳ ካፓርኪ! ኔ ቦንቾ ኣራታ ካዉሾፋ። ኔኒ ኑናራ ጫቄቲዳ ጫቆዛ ቆፓ፤ ኔ ጫቂዳ ቃላ ሞፓ።

²² ካዎቴታ ኤቃ ጾሳቲ ኢራ ቡኪሳና ዳንዳይዞ? ሳሎቲ ባ ሼኔን ፑሴ ዱጌ ዬዳናስ ዳንዳይዞ? ዳንዳዬቴና፤ ኣቤት ኑ ጎዳዉ! ሄሳ ኡባ ኦና ዳንዳይዛይ ኔና፤ ሄሳ ጊሻስ ኑኒ ኔናን ሂዶታ ኦስ።