ኤርማሳ ቲንቢቴ 13 - ጋሞ ማጻፋ

ላይኖፔ ኦሴቲዳ ዳንጮ

¹ ጎዳይ ታና፥ «ባዳ ላይኖፔ ኦሴቲዳ ዳንጮ ሻማዳ ኔ ጼሳን ዳንጫ፤ ጊዶ ኣቲን ሃን ቦሺሶፓ» ጊዴስ።

² ሄሳ ጊሻስ ታኒ ጎዳይ ኣዛዚዳ ማላ ዳንጮ ሻማዳ ታ ጼሳን ዳንጫዲስ።

³ ጎዳ ቃላይ ናምኣን ታኮ ዪዲ፥

⁴ «ኔኒ ሻማ ዳንጪዳ ዳንጮዛ ኤካዳ ኤፊራጺሴ ሻፋ ባ፤ ሂስታዳ ዛላ ዛኣ ጊዶን ቆታ» ጊዴስ።

⁵ ሂስቲን ታኒ ጎዳይ ታስ ዮቲዳ ማላ ኤፋዳ ኤፊራጺሴ ሻፋ ላንቄን ቆታዲስ።

⁶ ዳሮ ጋላሳፌ ጉዬ ጎዳይ፥ «ዴንዳ ኤፊራጺሴ ሻፋ ባዳ ታኒ ኔና፥ ‹ሄን ቆታ› ጊዳ ዳንጮዛ ኬሳ» ጊዴስ።

⁷ ሂስቲን ታኒ ኤፊራጺሴ ሻፋ ባ ቦካዳ ዳንጮዛ ታ ቆቲዳሶፔ ኬሳዲስ፤ ጊዶ ኣቲን ሄ ዳንጮዚ ሞሬቲዲ ሙሌራ ጎኦንታዝ ጊዲዴስ።

⁸ ሄሳፌ ጉዬ ጎዳ ቃላይ ታኮ ዪዲ፥

⁹ «ጎዳይ ታኒ ዩሁዳ ኣሳ ኦቶሬቴኔ ዬሩሳላሜ ኣሳ ጬቄቴ ሄሳ ማላ ይሳና።

¹⁰ ታ ቃላ ሲዮንታ ኢጺዲ፥ ባንታ ዎዚና ሙሜቴ ካሊዲ፥ ኤቃ ጾሳታስ ኦናሲኔ ጎይናናስ ቢዛ ሃ ኢታ ኣሳይ ሃይሳ ዳንጮዛ ማላ ሙሌካ ጎኦንታይሳ ጊዳና።

¹¹ ዳንጮይ ኣሳ ጼሳ ባቂ ኦይኪዛ ማላ ዩሁዳ ኣሳይ ኡባይኔ ኢስራኤሌ ኣሳይ ኡባይ ታኮ ሺጵ ጋና ማላኔ ታ ሱንስ ጋላታኔ ቦንቾ ኢማና ማላ ታ ኦን ኢስቲ ታ ጊዛዝ ሲዪቤቴና» ጌስ።

ዎይኔ ኡሻ ኦቶ

¹² ቃሴካ ጎዳ ኢስራኤሌ ጾሳይ፥ «ኤርማሳ! ኣሳስ፥ ‹ኦቶ ኡባን ዎይኔ ኡሻይ ኩማና› ጌስ። ኢስቲ ኔስ ዛሪዲ፥ ‹ኦቶ ኡባን ዎይኔ ኡሺ ኩማናይሳ ዋኒ ኑ ኤሮኮኒ?› ጊኮ፥

¹³ ኔኒ ኢስታስ፥ ‹ጎዳይ ታኒ ሃ ቢታን ዲዛ ኣሳ ኡባ፥ ዳዊቴ ካዎቴ ኣራታን ኡቲዛ ካዎታ፥ ቄሴታ፥ ናቤታኔ ዬሩሳላሜን ዲዛ ኣሳ ኡባካ ታ ዎይኔ ኡሻን ማሳና።

¹⁴ ታኒ ኢሲ ኣስ ሃራ ኣሳራ፥ ኣዋ ናራ ኦሻና፤ ታኒ ኢስታ ይሳና ኣቲን ኢስታስ ሚሼቲኬ፤ ቃቲኬኔ ማሪኬ› ጌስ ጋ» ጊዴስ።

ኦቶሬቴ ኤሂዛ ኣይፌ

¹⁵ ጎዳይ ዮቲዴስ፤ ዎዚናን ዎ ሲዪቴ፤ ኣጊቴ ኦቶራንቻ ጊዶፒቴ።

¹⁶ ኢዚ ማ ኤሆንታ ዲሺን ሚዳ ዙማታ ቦላ ኢንቴ ቶሆይ ጴቶንታ ዲሺን ጎዳስ ኢንቴ ጾሳስ ቦንቾ ኢሚቴ፤ ኢንቴ፥ «ፖኦይ ያና» ጊዲ ናጌታ፤ ጊዶ ኣቲን ኢዚ ማን ላማና፤ ሳካና ማ ኦና።

¹⁷ ኢንቴ ሲዮንታ ኢጺኮ፥ ኢንቴ ኦቶሬቴ ጊሻስ ታ ሼምፖያ ጌማን ዬካና፤ ጎዳ ዉዴይ ዲኤቲ ቢቺዳ ጊሻስ ታኒ ጫሞ ዬሆ ዬካይስ፤ ታ ኣይፌፔ ኣፉን ሃ ማላ ጎጌስ።

¹⁸ ጎዳይ ታና፥ «ካዎዛሲኔ ኢዛ ኣዮ ጎዳቴይስ፥ ‹ኢንቴ ቦንቾ ካላቻይ ኢንቴ ሁኤፔ ዎና ጊሻስ፥ ኢንቴ ካዎቴ ኣራታፔ ዱጌ ዎቴ።

¹⁹ ኔጌቤ ቢታን ዲዛ ካታማቲ ኡባይ ጎርዴታና። ኢስታ ዶያናዴይካ ዴና፤ ዩሁዳ ኣሳይ ኡባይ ዲኤቲዲ ባና፤ ኢስታ ኦጌይካ ጎርዴታና› ጋ» ጊዴስ።

²⁰ ቃሴካ ጎዳይ፥ «ኣኔ ቁ ጊዲ ፑዴሃ ባጋፌ ዪዛይታ ጼሊቴ፤ ኢንቴስ ኢሜቲዳ ዉዴይ፥ ኢንቴ ጬቄቲዛ ዶርሳቲ ኣዋን ዲዞ?

²¹ ኔኒ ኔስ ዳቦ ጊዳና ማላ ኮዪዳይቲ ኔና ጾኒዲ ሃሪዛ ዎዴ ኔ ኣይ ጋኔ? ዬሎ ሚጻይ ኦይኪዳ ማጫሳ ማላ ኔና ሚጻይ ኦይኬኔ?

²² ኔኒ ኔ ዎዚናን፥ ‹ሃይሲ ኡባይ ታ ቦላ ኣይስ ጋኪዴ?› ጊኮ፥ ኔ ማይኦይ ቃሬቲን ኔ ሱጌቲዳይ፥ ኔ ኣሳ ኩሼን ዋዬ ቤኢዳይ ኔ ናጋራይ ዳሪዳ ጊሻሳ።

²³ ቱሙ ቶጵያ ኣሲ ባ ሜ፥ ዎይኮ ማሄይ ባ ማሳራቴ ላማናስ ዳንዳይዜ? ኢንቴ ኢታ ኦ ሜዜቲዳይቲ ሎኦ ኦናስ ዳንዳዬኬታ» ጊዴስ።

²⁴ ጎዳይ፥ «ባዞ ጫርኮይ ሱላ ላሊዛ ማላ ታኒካ ኢንቴና ላላና።

²⁵ ኢንቴ ታና ዶጊዳ ጊሻሲኔ ዎርዶ ጾሳታን ኣማኔቲዳ ጊሻስ ኢንቴ ሳማይኔ ኢንቴ ቃዳይ ሃይሳ።

²⁶ ኢንቴ ካሎቴ ቤታናሼ ጋካናስ ታኒ ኢንቴ ማይኦ ቃራዳ ኢንቴ ሲን ካማና።

²⁷ ኢንቴ ዙምቡላታ ቦላኔ ዴምባን ኦዳ ሃራሲዛ ኦሶ ታኒ ቤኣዲስ፤ ኢንቴ ላይማቴኔ ኢንቴ ዚታ ሃኖታ ታ ቤኣዲስ፤ ዬሩሳላሜ ኔስ ኣዬ ኣና! ኔኒ ኣይዴ ጋካናስ ኔ ቱናቴፌ ጌዮንታ ዳኔ?» ጌስ።