ኤርማሳ ቲንቢቴ 12 - ጋሞ ማጻፋ

ኤርማሳ ኦይሻ

¹ ኣቤት ጎዳዉ! ታኒ ኔናራ ፓላሜቲዛ ዎዴ ኡባንካ ኔ ጺሎ። ኢታ ኣሳቲ ኦዛይሲ ኢስታስ ኣይስ ኢንጄቲዜ? ኣማኔቶንታይቲ ኣይስ ኢሻሎ ዱስ ዲዞ?

² ኔኒ ኢስታ ቶካዳሳ፤ ሂስቲን ጻጶ ዬዲዳ፤ ዲጪዲ ኣይፌ ኣይፊዳ። ኢስቲ ኔና ዶናፔ ዬጌቴና፤ ኔኒ ጊዲኮ ኢስታ ዎዚናፔ ሃኮን ዳሳ።

³ ጊዶ ኣቲን ኣቤት ጎዳዉ! ኔኒ ታና ኤራሳ። ታና ቤኣሳ፤ ታኒ ኔስ ኣይ ቆፒዛኮ ፓጫሳ። ሹኬታና ቢዛ ዶርሳታ ማላ ኔኒ ኢስታ ላጋ! ሹካ ጋላሳስ ኢስታ ዱማ ሻካ ዎ!

⁴ ኢራይ ዪን ቢታይ ኣይዴ ጋካናስ ሜላኔ? ማታይካ ኣይዴ ጋካናስ ሜላኔ? ኣሳ ኢታቴፌ ዴንዲዳይሳን ሜዶሳቲኔ ካፎቲ ይዳ። ሄሳ ቦላካ ኣሳይ፥ «ጎዳይ ኑኒ ኦዛይሳ ዴሜና» ጌስ።

ጎዳይ ኤርማሳ ኦይሻስ ኢሚዳ ዛሮ

⁵ ጎዳይ ኤርማሳስ፥ «ኔኒ ቶሆን ዎጺዛ ኣሳታራ ዎጻዳ ዳቡርኮ ፓራራ ዋና ጋዴ ዎጻኔ? ኔኒ ሳሮ ቢታን ጴቲኮ፥ ዮርዳኖሴ ዎራ ጋርሳን ዋና ሄሜታኔ?

⁶ ኔ ኢሻቲኔ ኔ ሶሆ ኣሳቲ ኔና ሂሊዳ፤ ኔ ቦላ ዋሲዳ፤ ሄሳ ጊሻስ ኢስቲ ኔስ ሎኦ ሃሳይኮካ ኔ ኢስታ ኣማኖፓ።

⁷ ታኒ ታ ኬ ኣጋና፤ ታ ጺንጾዮካ ዬጋ ኣጋና፤ ታኒ ታ ሲቂዛ ኣሳ ኢስታ ሞርኬታ ኩሼን ኣ ኢማና።

⁸ ታ ጺንጾያ ዎራ ጊዶን ዲዛ ጋሞ ማላ ታ ቦላ ዴንዳዱስ፤ ታ ቦላካ ጻጋዱስ፤ ሄሳ ጊሻስ ታኒ ኢዞ ኢጻዲስ።

⁹ ታ ጺንጾያ ጲርጮቲ ማና ጊዶዳ ካፎ ማላ ጊዳቤኬ? ቢዲ ዎራ ዶኣታ ኡባ ሺሺቴ፤ ኢስቲ ኢዞ ዱ ማና ማላ ጼይጊቴ።

¹⁰ ዳሮ ሄንንቻቲ ታ ዎይኔ ቱራ ሶሆ ሞሪዳ፤ ታኒ ኢዛን ኡፋዬቲዛ ታ ጋዴዛ ቡላሲዳ።

¹¹ ሄ ቢታይ ታ ሲንን ባዞ፥ ቡላኔ ሜላ ቢታ ጊዳና፤ ኢዚስ ቆፒዛይ ባይንዳ ጊሻስ ቢታያ ባዞ ጊዳና።

¹² ባዞን ዲዛ ዙምቡላታ ቦላፌ ይሲዛይቲ ያና፤ ጋሶይካ ጎዳ ማሻይ ቢታ ሃ ጋጻፔ ሄ ጋጻ ጋካናስ ማና። ሄሳ ጊሻስ ኦኒካ ኣታናስ ዳንዳዬና።

¹³ ኢስቲ ጊስቴ ዜሪዲ ኣጉን ጫካና፤ ኢስቲ ዳሮ ዳቡራናሺን ኣይኮካ ዴሜቴና፤ ዳሮ ዜሪዲ ጎዳ ሃንቆ ጋሶን ኢንቴ ጉ ዴሚዲ ዬላታና» ጊዴስ።

¹⁴ ጎዳይ፥ «ታኒ ታ ዴሬ ኢስራኤሌስ ኢሚዳ ጺንጾ ቢታ ኦይኪዛ ኢታ ሾሮታ ታኒ ኢስታ ኢስታ ቢታፌ ቃላና። ቃሴ ዩሁዳ ኣሳታካ ኢስታ ጊዶፌ ቃላና።

¹⁵ ጊዶ ኣቲን ታኒ ኢስታ ኢስታ ቢታፌ ቃሊዳፔ ጉዬ ዛራዳ ማራና፤ ታኒ ኢስታ ዴሬኒኔ ኢስታ ጺንጾን ጺንጾን ዛራ ኤሃና።

¹⁶ ካሴ ታ ኣሳ ባኣሌ ሱንን ጫቃና ማላ ታማርሶይሳካ፥ ‹ጎዳይ ቤኢን!› ጊዲ ታ ሱንን ጫቂኮ ኢስቲ ታ ኣሳ ጊዶን ጻጵዲ ዳና።

¹⁷ ታ ጊዛዝ ኤኮንታ ካዎቴ ዲኮ ታ ኢዛ ሙሌራ ቃላ ይሳና» ጌስ።