ኤርማሳ ቲንቢቴ 10 - ጋሞ ማጻፋ

ጾሴኔ ኤቃ ጾሳታ

¹ ኢንቴኖ ኢስራኤሌ ኣሳቶ! ጎዳይ ኢንቴስ ዮቲዛ ቃላ ሲዪቴ!

² ጎዳይ፥ «ካዎቴታ ኦጌ ኢንቴ ታማሮፒቴ። ኢስቲ ሳሎ ቦላ ማላታ ቤኢዲ ሺሮቲኮካ፥ ኢንቴ ሺሮቶፒቴ።

³ ጋሶይካ ዴሬታ ዎጋይ ሃዳ። ኢስቲ ሚ ዎራፔ ቃንጼቴስ፤ ሂላይ ማሲ ጊጊሴስ።

⁴ ኢስቲ ቢራኒኔ ዎርቃን ኣሌቂሴቴስ፤ ቃጾንታ ማላ ናሪቃራ ሚሲማሬን ሺኪዲ ኦይቴስ።

⁵ ኢስታ ኤቃ ጾሳቲ ኢስታ ካ ጊዶን ዶኣ ዳጋንናስ ኤሲዛ ሚስሌ ማላ። ሃሳያናስ ዳንዳዬቴና። ሄሜታናስ ኢስቲ ዳንዳዮንታ ጊሻስ ኣሳይ ኢስታ ቶኬስ። ኢስቲ ኢታ ጊዲን ዎይኮ ሎኦ ሚሽ ኢንቴ ቦላ ኦናስ ዳንዳዮንታ ጊሻስ ኢስታስ ሙሌካ ያዮፍቴ» ጌስ።

⁶ ኣቤት ጎዳዉ! ኔ ማላይ ኦኒካ ዴና። ኔኒ ጊታ፤ ኔ ሱንይካ ጊታኔ ዎልቃማ።

⁷ ኣቤት ካዎቴታስ ካዎ! ኔስ ያዮንታይ ኦኔ? ኔስ ቦንቾይ ቤሴስ፤ ጋሶይካ ኣ ኤራንቻታ ጋርሳኒኔ ኢስታ ካዎቴታ ኡባ ጋርሳን ኔ ማላይ ዴና።

⁸ ሃዳ ጊዲዳ ሚፌ ማሴቲዳ ኤቃ ጾሳታፔ ቲሚርቴ ታማርዛ ኡባይ ኤያኔ ዳማ።

⁹ ሄ ኤቃ ጾሳቲ ታርሴሴፔ ዪዳ ቢራኒኔ ኡፋዜፔ ዪዳ ዎርቃን ኣሌቄቲዳ። ኢስቲ ዎይኔ ኡሻኒኔ ኦቻ ቴራ ሚሳቲዛ ሜራ ዲዛ ማይኦን ካሜቲዳ። ኢስቲ ኡባይ ኩሼ ኦሶ ሂላታን ኦሴቲዳ።

¹⁰ ጊዶ ኣቲን ጎዳይ ቱሙ ጾሳ፤ ኢዚ ዴኦ ጾሳኔ ሜርና ካዎ። ኢዚ ሃንቄቲዛ ዎዴ ቢታይ ቃጼስ፤ ካዎቴቲካ ኢዛ ዪሎ ዳንዳዬቴና።

¹¹ ጎዳይ፥ «ኢንቴካ፥ ‹ሄይቲ ሳሎኔ ሳኣ ሜንታ ጾሳቲ ሳኣፔኔ ሳሎ ጋርሳፌ ያና› ጌታ» ጌስ።

¹² ባ ዎልቃን ሳኣ ሜዳይ፥ ባ ኣ ኤራቴን ኣላሜ ኤሲዳይ፥ ባ ኣኬካን ሳሎ ሚጪዳይ ጎዳ።

¹³ ኢዚ ጉሚዛ ዎዴ፥ ሳሎን ዲዛ ኡባይ ቃጼስ። ኢዚ ሻራ ሳኣ ጋጻፔ ፑዴ ዴንስ። ኢዚ ኢራራ ዳዳ ዬዴስ፤ ጫርኮካ ባ ሚንጃሶፔ ኬሴስ።

¹⁴ ኣሲ ኡባይ ኤራ ይዲ ዳሚዴስ፤ ዎርቃ ሴሪሲዛ ኣሲ ኡባይ ባ ኦዳ ኤቃ ጾሳታን ዬላቲዴስ። ጋሶይካ ኤቃ ጾሳቲ ዎርዶ፤ ኢስታስ ሼምፖይ ዴና።

¹⁵ ኢስቲ ጮ ቂስ ሜቲዳ ሚሻ። ፒርዳይ ኢስታ ቦላ ጋኪዛ ዎዴ ኢስቲ ያና።

¹⁶ ጊዶ ኣቲን ያቆቤ ቃዳይ ሄይታ ማላ ጊዴና። ጋሶይካ ኢዚ ኡባ ሜዳይሳ፤ ኢስራኤሌይ ዶሬቲዳ ዴሬ። ኢዛ ዶሪዳይሳ ሱንይ ኡባፌ ዎልቃማ ጎዳ ጾሳ።

ቡሮፔ ያና ኢታ

¹⁷ ኢንቴኖ ሞርኬይ ጊዶዳይቶ! ዲዛ ሚሽ ዲዛሶፔ ሺሺቴ።

¹⁸ ጋሶይካ ጎዳይ፥ «ታኒ ሃ ሳኣ ቦላ ዲዛ ኣሳ ሃኢ ጌዴ ካሬ ኬሳዳ ጎዳና። ኢስታስ ኤሬታና ማላ ታ ኢስታ ቦላ ሜቶ ኤሃና» ጌስ።

¹⁹ ዋኖ ኣይ ሃኖ! ታ ማዱንይ ፓጾንታ ማዱን። ጊዶ ኣቲን ታ ታና፥ «ሃይሲ ታ ሃርጌ፤ ታኒ ዳንዳያናስ ቤሴስ» ጋዲስ።

²⁰ ታ ዱንካኔይ ላሌቲዴስ፤ ኢዛ ዎዶሮይ ኡባይ ዱጼሬቲዴስ። ታ ናይቲ ኡባይ ታፔ ሻኬቲዲ ቢቺዳ፤ ሃይሳፌ ጉዬ ሲሜቴና፤ ታ ዱንካና ዛሪዲ ቶላናስ ዎይኮ ታ ማጋላሻ ካቃናስ ሃኢ ኢሲ ኣሲኔ ኣቲቤና።

²¹ ሄንንቻቲ ዳሚዳ፤ ኢስቲ ጎዳ ኦይቺቤቴና። ሄሳ ጊሻስ ኢስታስ ኢንጄቲቤና፤ ኢስታ ዉዴ ኡባይ ላሌቲዴስ።

²² ሲዪቴ! ኢታ ዮኦይ ዩሳ ቦላ ዴስ፤ ሄሲ፥ «ፑዴሃ ባጋራ ዲዛ ካዎቴን ጊታ ቡልኣኬቴ ዩሳን ዴስ» ጊዛይሳ። ኢዛ ኦላንቻቲ ዪዲ ዩሁዳ ካታማታ ባዞኔ ዎራካናታ ዱሳሶ ኬሳና።

²³ ኣቤት ጎዳዉ! ኣሳ ዴኦይ ኢዛዴ ኩሼን ዶንታይሳኔ ባ ሄሜታካ ባርካ ባ ሼኔ ማላ ሎኤና ዳንዳዮንታይሳ ታ ኤራይስ።

²⁴ ኣቤት ጎዳዉ! ታና ሴራ፤ ጊዶ ኣቲን ጊናራ ጊዶ። ታኒ ሙሌራ ዮንታ ማላ ኔኒ ሃንቆራ ታ ቦላ ዮፓ፤

²⁵ ያቆቤ ሙሌራ ሚ ሚቲዳይታ ቦላኔ ኔ ሱን ጼይጎንታ ኣሳታ ቦላ ጉሳ። ኢዛ ዱሳሶካ ካይዚሲዳ ጊሻስ ኔኒ ኔ ሃንቆዛ ኔና ኤሮንታ ዴሬታ ቦላኔ ኔ ሱን ጼይጎንታ ካዎቴታ ቦላ ጉሳ።