ዳናታ ማጻፋ 5 - ጋሞ ማጻፋ

ዲቦራይኔ ባራቄይ ዬጺዳ ዬ

¹ ሄ ጋላስ ዲቦራይኔ ኣቢኖኣሜ ና ባራቄይ ሃይሳፌ ካሊዛ ዬ ዬጺዳ።

² «ካሌዛይቲ ኢስራኤሌ ካሌሺን፥ ዴሬይካ ባ ሼኔን ሃሬቲሺን ጎዳ ጋላቲቴ!

³ «ኢንቴኖ ካዎቶ! ሃይሳ ሲዪቴ! ኢንቴኖ ዴሬ ሃሪዛይቶ! ኤዝጊቴ! ታኒ ጎዳስ ዬጻና፤ ኢስራኤሌ ጎዳስ ጋላታ ማዛሙሬ ዬጻና።

⁴ «ኣቤት ጎዳዉ! ኔኒ ሴይሬ ዴሬፔ ዴንዲዳ ዎዴ፥ ኔኒ ኤዶሜ ቢታፌ ኬዚዳ ዎዴ፥ ቢታይ ቃጺዴስ። ሳሎፔ ኢራይ ቡኪዴስ፤ ኤ፥ ኢራይ ሻራታፔ ዱጌ ቡኪዴስ።

⁵ ጎዳ ኢስራኤሌ ጾሳ ሲንኒኔ ሲና ጎዳ ሲንን ዙማቲ ቃጺዳ።

⁶ «ኣናቴ ና ሻምጋሬ ዎዴኒኔ ያኤሌ ዎዴን ኦጌይ ሳሚዴስ፤ ዛልኣንቻቲካ ሄ ቢታራ ካን ቤቴና። ኦጌዛራ ቢዛይቲካ ኦጋ ኣጊዲ ሃራሶራ ቢዳ።

⁷ ኢስራኤሌ ማንዳራቲ ኣሲ ዶንታ ባዞ ጊዲዳ። ታኒ ዲቦራይ ኢስራኤሌ ኣሳስ ኣዮ ጊዳዳ ዴንዳና ጋካናስ ጾኒዲ ኣቲዳይ ባዋ።

⁸ ኢስራኤሌ ኣሳይ ኣላጋ ጾሳታ ዶሪዳ ዎዴ፥ ቢታን ኦላይ ዴንዲዴስ፤ ኦይዱ ታሙ ሺ ኢስራኤሌ ኦላንቻታ ጊዶን ኢሲ ጎንዳሌይ ዎይኮ ኢሲ ቶራይ ቤቲቤና።

⁹ ታ ዎዚናይ ኢስራኤሌ ዳናታራ ዴስ፤ ኣሳ ጊዶን ዶሳን ባና ኣ ኢሚዳይታራ ዴስ። ጎዳይ ጋላቴቶ!

¹⁰ «ኢንቴኖ ኮሬቲዳ ቦ ሃሬ ቶጊዛይቶ! ኢንቴኖ ሎኦ ኣራታን ኡቲ ኣሌቄቲዛይቶ! ኢንቴኖ ቶሆን ሄሜቲዛይቶ!

¹¹ ሃ ፑልቶታ ሄራን ዬጼቲዛ ዬ ሲዪቴ፤ ኢስታ ጎዳይ ጾኒዳይሳ ኣኬኪሴስ፤ ቃሴ ኢስራኤሌ ኣሳይ ጾኒዳይሳ ናሼስ። «ጎዳ ኣሳይካ ካታማ ጌሊዛ ፔንጌታኮ ዱጌ ዎዴስ።

¹² ‹ዲቦራ! ቤጋ! ቤጋ! ቤጎታዳ ዬ ዬጻ። ኔኖ፥ ኣቢኖኣሜ ና ባራቄ፥ ዴንዳ! ኔ ዲኢዳይታ ኤካዳ ሲን ጉጃ።›

¹³ «ሄሳፌ ጉዬ ኣቲዳ ኣሳቲ ሃላቃታኮ ዱጌ ዎዳ። ጎዳ ኣሳቲ ኦሌታናስ ጊጊዲ ባራቄኮ ዪዳ።

¹⁴ ካሴ ኣማሌቄ ዛሬቲ ዲዛሶን ዲዛ ኤፍሬሜ ኣሳፔ ኢሲ ኢሲ ኣሳቲ ዪዳ። ቃሴ ሃራቲ ቢኒያሜ ዜሬታፔ ኢስታ ካሊዳ። ማኪሬ ዛሬታፔ ዳናቲ፥ ዛቢሎኔ ዛሬታፔ ካዎቴን ኡቲዛይቲ ዪዳ።

¹⁵ ዪሳኮሬ ዜሬፌ ዳናቲ ዲቦሪራ ዪዳ፤ ኤ፥ ዪሳኮሬይኔ ባራቄይካ ዪዳ፤ ኢስቲካ ባራቄ ካሊዲ ዱጌ ዙሌዛ ዎዳ። ጊዶ ኣቲን ኦሮቤሌ ዛሬቲ ቆፋን ሻኬቲ ዎዳ፤ ያናኮኔ ዮንታኮ ሲዳ።

¹⁶ ኔ ኣይስ ዶርሳ ዪሬ ጊዶን ኡታዲ? ዶርስ ሄሚዛይታ ዋይቄ ሲያናስ ኡታዲ? ኦሮቤሌ ዛሬቲ ቆፋን ሻኬቲ ዎዳ፤ ያናኮኔ ዮንታኮ ሲዳ።

¹⁷ ጋላኣዴ ዛሬቲ ዮርዳኖሴ ሻፋፔ ሄ ፒንን ኣቲዳ፤ ዳኔ ዛሬቲ ኣይስ ማርካቤ ጊዶን ጋምኢዶ? ኣሴሬ ዛሬቲ ባ ዲዛሶን ኣቲዳ፤ ሜዲቴራኔ ኣባ ላንቄንካ ዴኢዳ።

¹⁸ ዛቢሎኔ ዛሬቲ ባንታ ሼምፖ ሃይቆስ ኣ ኢሚዳ። ኒፍታሌሜ ዛሬቲካ ኢስታካ ኦላ ዴምባን ኦዳ።

¹⁹ «ካዎቲ ዪዲ ማጊዶ ፑልቶታ ማታን ዲዛ ታኢናኬን ኦላ ኦይኬቲዳ። ካናኔ ካዎቲካ ሄን ኦሌቲዳ፤ ዲኢ ኤካናስ ኣይኮ ሚሺካ ዴሚቤቴና።

²⁰ ሳሎ ጾሊንቴቲ ኢዛራ ኦሌቲዳ። ባንታ ሃኖታን ሲሳራራ ኦላ ቃቃጱ ጊዳ።

²¹ ቤኒ ቂሶኔ ሻፋ ኪጻይ ኢስታ ዴን ኤፊዴስ፤ ኢስቲካ ሃሮን ሜጬቲ ይዳ፤ ታ ሼምፖዬ ሚና፤ ዎልቃንካ ሲን ጉጃ።

²² ሄሳፌ ጉዬ ቶጋ ኣሳቲ ቶጋን ኣዳራሲ ዪዳ። ቶጋ ፓራታ ጊሪሳይ ዳዳ ጊሪሳ ማላ።

²³ ጎዳ ኪታንቻይ፥ ‹ሜሮዜ ቃንጊቴ! ሄን ዲዛ ኣሳ ኢሲፌ ቃንጊቴ! ጋሶይካ ኢስቲ ጎዳ ኣሳ ኦላን ማዶንታ ኢጺዳ። ዎልቃማ ኢስታ ሞርኬታራ ኦሌታናስ ኬዚቤቴና› ጊዴስ።

²⁴ «ቄናዌ ዴሬ ኣስ ሄቤሬ ማቺያ ያኤላ ማጫሳ ኡባፌ ኣንጄቲዳሮ ጊዱ። ዱንካኔ ጊዶን ዲዛ ማጫሳ ኡባፌ ኢዛ ኣንጄቲዳሮ ጊዱ።

²⁵ ሲሳሪ ኢዞ፥ ‹ታና ሃ ኡሻ› ጊ ዎሲዴስ፤ ኢዛ ጊዲኮ ሜቃ ማ ሺሻዱስ፤ ሎኦ ዋንጫን ኢዛስ ኢማዱስ።

²⁶ ኢሲ ኩሼን ዱንካና ሽኬ፥ ኡሻቻ ኩሼን ኦሳንቻታ ቆይጼ ኦይካዱስ፤ ሲሳራ ሁኤን ሺካዱስ፤ ሃይ ጮርጮሮራ ሉካ ኬሳዱስ።

²⁷ ቦልቁ ጊ ኩንዲዴስ፤ ኢዚ ቶሆ ጋርሳንካ ጉፋኒዴስ፤ ሄ ኩንዲዳ ሶሆን ሃይቂዴስ።

²⁸ «ሲሳራ ኣዬያ ማስኮቴራ ቤኣዱስ፤ ማስኮቴ ጾኤራካ ቲሺ ሂስታ ጼላሼ፥ ‹ታ ናዛ ፓራ-ጋሬይ ኣይስ ጋምኢዴ? ፓራ-ጋሬቲ ኤሶቲዲ ኣይስ ሲሚቤቴኔ?› ጋዳ ዋሳ ኦይቻዱስ።

²⁹ ኣ ኤራቴ ዲዛ ኢዚ ማጫሳቲ ኢዚ ኦይሻ ዛሪዳ፤ ጊዶ ኣቲን ኢዛ ባ ቆፋን ባስ፥

³⁰ ‹ኢስቲ ዲኢዲ ኤሂዳይሳ ጊሼቲ ኤኪሺን ኢሳዴ ኢሳዴ ኢሲ ኢሲ ጌላኦይ ዎይኮ ናምኡ ናምኡ ጌላኦቲ ጋኬቴስ። ሲሳራስ ኢስቲ ዱማ ዱማ ቃላሜን ኦሴቲዳ ኣሌቆ ማይኦ ኢማና፤ ቃሴ ታስካ ቆን ጻጻናስ ጺሊፌን ኣሌቂዲ ሎኢዛ ማይኦታ ኤሃና› ጋዱስ።

³¹ «ኣቤት ጎዳዉ! ኔ ሞርኬቲ ኡባይ ሄሳ ሃይቄቶ! ጊዶ ኣቲን ኔ ሲቆቲ ማላዶ ሞኪዛ ኣርሼዳ ጶሌቶ።» ሄሳፌ ጉዬ ቢታይ ኦይዱ ታሙ ላይ ዎፓ ዴሚዴስ።