ዳናታ ማጻፋ 14 - ጋሞ ማጻፋ

ሳምሶኔይ ማቾ ኤኪዴስ

¹ ኢሲ ጋላስ ሳምሶኔይ ቴሚና ጌቴቲዛሶ ዎዴስ፤ ሄንካ ኢሲ ፊሊስጼሜ ማጫ ናዮ ቤኢዴስ።

² ሶ ሲሚዲ ባ ኣዋኔ ባ ኣዮ፥ «ታኒ ቴሚናን ኢሲ ፊሊስጼሜ ማጫ ናዮ ቤኣዲስ፤ ሃኢ ኢዞ ታስ ኦይቺዲ ታና ኤኪሲቴ» ጊዴስ።

³ ኢዛ ኣዋይኔ ኣዬያ ኢዛ፥ «ሃ ቃጻሬቲ ኤሮንታ ፊሊስጼሜ ዴሬ ባዳ ኢስታ ጊዶፌ ማቾ ኤካና ኔ ኮይዛይ ሃን ኑ ዴሬ ኣሳፔ ኔስ ማጫይ ይኔ?» ጊዳ። ሳምሶኔይካ ባ ኣዋስ፥ «ታ ዎዚና ሚዳይ ኢዞ ጊዲዳ ጊሻስ ታና ኢዞ ኤኪሳ» ጊዴስ።

⁴ ፊሊስጼሜታ ኦላናስ ጎዳይ ጋሶ ኮዪዲ ሃይሳ ኢስታ ቦላ ኦዛይሳ ሳምሶኔ ኣዋይኔ ኣዬያ ኤሪቤቴና፤ ሄ ዎዴ ፊሊስጼሜቲ ኢስራኤሌ ኣሳ ሃሬቴስ።

⁵ ሄሳፌ ጉዬ ሳምሶኔይ ባ ኣዋራኔ ባ ኣዬይራ ዱጌ ቴሚና ዎይኔ ሚ ዲዛ ሄራ ጋኪሺን ኢሲ ዎዳላ ጋሞይ ጻጊሼ ኢዛ ቦላ ኬዚዴስ።

⁶ ጎዳ ኣያናይ ሳምሶኔ ቦላ ዎዲ ኢዛስ ዎልቃ ኢሚዴስ፤ ቄሪ ዴይሻ ላቃ ማላ ባ ኩሼን ኣይኮካ ኦይኮንታ ጋሞዛ ፔሬ ዬጊዴስ። ሄሳካ ባ ኣዋሲኔ ባ ኣዬይስ ዮቲቤና።

⁷ ሄሳፌ ጉዬ ዱጌ ናይኮ ቢዲ ኢዞ ሃሳይሲዴስ፤ ኬሂፔ ኢዞ ዶሲዴስ።

⁸ ጉ ዎዴፔ ጉዬ ኢዞ ኤካናስ ሲሚ ቢዴስ፤ ባ ዎዳ ጋሞዛ ኣሃ ቤኣናስ ኦጌፔ ሼርኢ ጊዲ ቢዛ ዎዴ ጋሞዛ ኣሃ ጊዶን ማ ኤስ ኤሲ ዲዛይሳ ቤኢዴስ።

⁹ ኤሳፌ ኣማርዳይሳ ካሺ ኤኪዲ ኦጌን ሚሼ ቢዴስ። ባ ኣዋኮኔ ባ ኣዬይኮ ጋኪዲ ባ ኦይኪዳ ኤሳፌ ኣማርዳይሳ ኢስታስ ኢሚን ኢስቲካ ሚዳ፤ ጊዶ ኣቲን ሳምሶኔይ ሄ ኤሳ ጋሞዛ ኣሃ ጊዶፌ ኤኪዳይሳ ኢስታስ ዮቲቤና።

¹⁰ ኢዛ ኣዋይ ናዮ ቤኣና ኢዚሶ ቢን ሳምሶኔይ ሄን ዲዛ ሚሺራቴ ዎጋ ማላ ቡላቻ ጊግሲዴስ፤ ሄሲ ካሴሶፌ ሄ ዴራን ሎሴ ጊዲ ዲዛ ዎጋ።

¹¹ ሄ ኣሳይ ኢዛ ቤኢዳ ዎዴ ኢዛ ካሳና ማላ 30 ናቴ ናይታ ዶሪዲ ዬዲዳ።

¹² ሳምሶኔይ ኢስታስ፥ «ኣኔ ኢንቴ ኤሪዛኮኔ ኢሲ ማሌ ታኒ ኢንቴና ማሌይስ፤ ቡላቻ ባኣሌይ ቦንቼቲዛ ላፑን ጋላሳታ ጊዶን ሃ ማሌዛ ቢርሼ ታስ ኢንቴ ዮቲዛ ጊዲኮ ታኒ ኢንቴስ 30 ላይኖ ቃሚሳታኔ 30 ኩሜ ማይኦታ ኢማና።

¹³ ሄ ማሌ ቢርሼ ኢንቴና ጾኒኮ ኢንቴ ታስ 30 ላይኖ ቃሚሳታኔ 30 ኩሜ ማይኦ ኢሜታ» ጊዴስ። ኢስቲ፥ «ኤሮ፥ ኔ ማሌዛ ኣኔ ኑስ ዮታ» ጊዳ።

¹⁴ ሳምሶኔይካ ኢስታስ፥ «ሚዛይሳፌ ሜቴቲዛዚ ቤቲዴስ። ሚኖፔ ማልኦ ሚሺ ኬዚዴስ» ጊዴስ። ሄን ጋላስ ጋካናስ ኢስቲ ኢዛ ማሌ ቢርሼ ኢማናስ ዳንዳይቤቴና።

¹⁵ ኦይዳን ጋላስ ኢስቲ ሳምሶኔ ማቺዮ፥ «ኣኔ ኔ ኬዋ ጪማዳ ማሌዛ ቢርሼ ኢዚ ኑስ ዮታና ማላ ኦ፤ ኔ ሂስቶንታ ኣጊኮ ኑኒ ኔናኔ ኔ ኣዋ ኬ ታማን ጹጋና፤ ኢንቴ ኢንቴ ቡላቻስ ኑና ጼይጊዳይ ኑና ቦንቃናሴ?» ጊዳ።

¹⁶ ሄሳ ጊሻስ ሳምሶኔ ማቺያ ሂቂማ ዬካሼ ኢዛኮ ሺቃዳ፥ «ሄኮ ኔ ታና ሲቃካ ኬሃ ኢጻሳ! ኣይስ ጊኮ ኔኒ ታ ቢታ ኣሳ ማሌ ማሌዳ ኢዛ ቢርሼ ታስ ዮታቤካ» ጋዱስ። ኢዚ ዛሪዲ፥ «ሃራይ ኣቶሺን ሃይሳ ታኒ ታ ኣዋሲኔ ታ ኣዬይስካ ዮታቤኬ፤ ሂስቲን ኣይስ ኔስ ቢርሼ ዮቶ?» ጊዴስ።

¹⁷ ሄሳ ጋሶን ኢዛ ሚሺሬያ ቡላቻ ባኣሌይ ቦንቼቲዛ ላፑን ጋላሳታ ኡባን ዬካ ዬካዳ ሼምፖ ዲጊን ላፑን ጋላስ ማሌዛ ቢርሼ ኢዚስ ዮቲዴስ፤ ኢዛካ ባዳ ባ ቢታ ኣሳስ ዮታዱስ።

¹⁸ ላፑን ጋላስ ኣርሼይ ዉላናፔ ካሴ ካታማ ኣሳይ ሳምሶኔስ፥ «ኤሳፌ ኣ ማልኢዛይ ጋሞፌ ኣ ሚኒዛይ ኣዜ?» ጊዳ። ሳምሶኔይ ኢስታስ፥ «ኢንቴ ታ ኡሳይን ጎዮንታኮ፥ ታ ማሌዛ ቢርሼ ኤሬኬታ» ጊዴስ።

¹⁹ ሄሳፌ ጉዬ ጎዳ ኣያናይ ኢዛ ቦላ ዎዲ ኢዛስ ዎልቃ ኢሚዴስ፤ ኢዚካ ኣስቄሎና ቢታ ዎዲ 30 ኣስ ዎዴስ፤ ኢስታስ ዲዛ ኡባኔ ኢስታ ማይኦካ ቃሪ ኤኪዲ ማሌዛ ቢርሺዳ ኣሳታስ ኤሂዲ ኢሚዴስ። ሃኒዳ ኡባን ሃንቆ ሱሊዲ ባ ኣዋ ሶ ሲሚ ቢዴስ።

²⁰ ሳምሶኔ ማቺያ ኢዛ ላጌታፔ ኢሳ ጌላዱስ።