ኢሳያሳ ቲንቢቴ 9 - ጋሞ ማጻፋ

ሲንፌ ካዎታና ሳሮቴ ካዎ

¹ ጬጪሼ ዲዛይታስ ሃይሳፌ ጉዬን ሂዶታይ ዬና፤ ቤኒ ዎዴ ዛቢሎኔ ቢታኔ ኒፍታሌሜ ቢታ ካዉሺዴስ፤ ሲንፌ ያና ዎዴን ጊዲኮ ሜዲቴራኔ ኣባ ኦጌን ዴኢዛ ቢታኔ ዮርዳኖሴ ሻፋፔ ሄ ፒንን ዴኢዛ፥ «ኣይዛቤቲ ዴኢዛ ጋሊላ ቢታ» ኢዚ ቦንቻና።

² ማን ዴኢዛ ዴሬይ ዎልቃማ ፖኦ ቤኢዴስ፤ ሃይቆ ኩዋ ጋርሳን ዲዛ ዴሬታስ ፖኦይ ፖኢዴስ።

³ ኔኒ ካዎቴ ዳርሳዳሳ፤ ኢስታስ ኡፋይሳ ቦላ ኡፋይስ ጉጃዳሳ፤ ኣሳይ ካ ሺሺሼኔ ዲኢ ኤኪዳ ሚሽ ጊሼቲሼ ኡፋዬቲዛ ማላ ኢስቲካ ኔ ሲንን ኡፋዬታና።

⁴ ካሴ ኔኒ ሚዲያሜ ቢታ ጾኒዳ ማላ ኢስታ ዴጺዛ ቃምባራ፥ ኢስታ ሃሼ ቦላ ዎዳ ዱርቃኔ ኢስታ ዋዪሲ ሃሪዳ ጉፌ ሜንዳሳ።

⁵ ኦላንቻታ ጫማይ ኡባይ፥ ሱን ሞሬቲዳ ማይኦ ኡባይካ ታማን ዱኔ ጊዲ ኤጻና።

⁶ ሄኮ ኑስ ናይ ዬሌቲዴስ! ኣቱማ ናይካ ኑስ ኢሜቲዴስ! ሃላቃቴ ኢዛ ሃሼ ቦላ ጊዳና፤ ኢዛ ሱን፥ «ማላሊሲዛ ዞራንቻ፥ ዎልቃማ ጾሳ፥ ሜርና ኣዋ፥ ሳሮቴ ሃላቃ» ጌቴታና።

⁷ ኢዛ ካዎቴ ኣኮቴሲኔ ኢዛ ሳሮቴስ ዛዋይ ዴና፤ ሃቺፌ ዶሚዲ ሜርና ጋካናስ ባ ካዎቴ፥ ሱሬ ፒርዳኒኔ ጺሎቴን ኤሳና፤ ሎኤ ኦይኪዲ ሚንና፤ ዳዊቴ ካዎቴ ኣራታን ኢዚ ኡታና፤ ዴራ ኡባ ሃራና፤ ኡባፌ ዎልቃማ ጎዳ ቃናቴይ ሄሳ ፖላና።

ኢስራኤሌ ቦላ ጾሳ ሃንቆ

⁸ ጎዳይ ያቆቤ ዛሬታ ቦላ ፒርዳ ቃላ ኪቲዴስ፤ ኢዚካ ኢስራኤሌ ቦላ ፖሌታና።

⁹ ኤፍሬሜኒኔ ሳማሪያን ዴኢዛ ዴሬ ኡባይ ሄሳ ጾሲ ኦዳይሳ ኤራና፤ ኦቶሮኒኔ ሞቴን ዴንዲዲ፥

¹⁰ «ጹቤፔ ኦሴቲዳ ጊምቤቲ ላሌቲዳ፤ ኑኒ ጊዲኮ ማሴቲዳ ሹቻን ዛሪ ጊምባና፤ ኤቲ ቃንጼቲዳ፤ ኑኒ ጊዲኮ ኢስታሶሆን ዚጋ ላማና» ጊዳ።

¹¹ ሄሳ ጊሻስ ጎዳይ ኤራሶኔ ሞርኬታ ሚንና፤ ኢስታ ሞርኬታ ኢስታ ቦላ ዴንዲ ኤሃና።

¹² ኣርሼይ ሞኪዛ ባጋፌ ኣራሜ ቢታ ኣሳቲኔ ኣርሼይ ዉሊዛ ባጋፌ ፊሊስጼሜ ቢታ ኣሳቲ ባንታ ዶና ሃንጊዲ ኢስራኤሌ ሚታና። ሄሲ ኡባይ ሃኒንካ ጎዳ ሃንቆይ ኢርጺቤና፤ ኢዛ ኩሼይካ ዴንዲዳሶፔ ሲሚቤና።

¹³ ዴሬዚ ጊዲኮ ባና ሾጪዳ ጎዳኮ ሲሚቤና፤ ኡባፌ ዎልቃማ ጎዳካ ኮዪቤና።

¹⁴ ሄሳ ጊሻስ ጎዳይ ሁኤኔ ጎይና፥ ዛምባ ሃጋኔ ማቃ ኢስራኤሌፔ ኢሲ ጋላስ ቄጻና።

¹⁵ ጪማቲኔ ቦንቼቲዳይቲ ሁኤ፤ ዎርዶ ታማርሲዛ ናቤቲ ጎይና።

¹⁶ ሃይሳ ዴራ ካሌዛይቲ ባሌቴስ፤ ካሊዛ ዴሬይካ ኦጌፔ ካሬ ኬዚዲ ቶይላቴስ።

¹⁷ ሄሳ ጊሻስ ጎዳይ ናቴ ናይታን ኡፋዬቴና፤ ዪኦታሲኔ ኣምኤታስ ቃቴና፤ ኡባይካ ኢታ ኦዛይታኔ ጾሳ ያሻቴ ባይንዳይታ፤ ኡባ ኣሳ ዶናፔ ሃራሲዛ ቃላይ ኬዜስ፤ ሄሲ ኡባይ ሃኒንካ ጎዳ ሃንቆይ ኢርጺቤና፤ ኢዛ ኩሼይካ ዴንዲዳሶፔ ሲሚቤና።

¹⁸ ዴራ ኢታቴ ኪንዲቾኔ ኣጉን ጹጊዛ ታማ ማላ፤ ፒ ጊዳ ዎራይ ጹጌቲሺን ኬዚዛ ጩዋ ቱሳ ማላ ሲቲ ጊዲ ፑዴ ኬዜስ።

¹⁹ ኡባፌ ዎልቃማ ጎዳ ሃንቆን ቢታይ ጹጌታና፤ ዴሬይካ ታማን ጌሊዛ ሚ ማላ ጊዳና፤ ኢሻይ ኢሻስ ቃቴና።

²⁰ ኡሻቻ ባጋራ ቱጻና፤ ጊዶ ኣቲን ጋፋ ቴቄና። ሃዲርሳ ባጋራ ማና፤ ጊዶ ኣቲን ካሌቴና። ኢሶይ ኢሶይ ባ ዬሊዳ ናይታ ማና።

²¹ ሚናሴይ ኤፍሬሜ ማና፤ ኤፍሬሜይካ ሚናሴ ማና፤ ኢስቲ ኢሲፌ ጊዲዲ ዩሁዳ ቦላ ዴንዳና። ሄሲ ኡባይ ሃኒንካ ጎዳ ሃንቆይ ኢርጺቤና፤ ኢዛ ኩሼይካ ዴንዲዳሶፔ ሲሚቤና።