ኢሳያሳ ቲንቢቴ 8 - ጋሞ ማጻፋ

ኣሶሬ ካዎ ዩስ

¹ ጎዳይ ታና፥ «ጊታ ጻ ዋራቃታ ኤካዳ፥ ‹ማሄር-ሻላል ሃሽ-ባዝ› ጋዳ ናባቤቲዛ ፒዳሌን ጻፋ።

² ቄሴ ኦሪያኔ ባራኪዮ ና ዛካራሳ ታስ ኣማኔቲዳ ማርካታ ጊዳና ማላ ታ ኢስታ ጼይጋና» ጊዴስ።

³ ሄሳፌ ጉዬ ባ ማቾ ናቤይራ ኣቂዴስ፤ ኢዛካ ሻራዳ ኣቱማ ና ዬላዱስ፤ ሂስቲን ጎዳይ ታና፥ «ኢዛ ሱን፥ ‹ማሄር-ሻላል ሃሽ-ባዝ› ጋዳ ሱን።

⁴ ናዚ፥ ‹ኣቦ! ኣዬ!› ጊ ጼይስ ኤራናፔ ካሴ ኣሶሬ ቢታ ካዎይ ሳማሪያኔ ዳማስቆ ኣቆታ ዲኢ ኤፋና» ጊዴስ።

⁵ ቃሴካ ጎዳይ ታስ፥

⁶ «ሃ ዴሬይ ጮኡ ጊ ጎጊዛ ሴሊሆሜ ሃታ ኣጊዲ ኤራሶኔኒኔ ኤሮሜሊዮ ናዛን ኡፋዬቲዴስ።

⁷ ሄሳ ጊሻስ ታኒ ጎዳይ ሚኖኔ ዎልቃማ ጊዲዳ ኤፊራጺሴ ሃ ሃሮ፥ ኣሶሬ ካዎ ኢዛ ቴማራኔ ቦንቾዛራ ኢስታ ቦላ ኤሃና፤ ሃዚ ሻፋዛ ኩሚ ፖሊችዲ ሻፋ ዶናን ዲዛ ቢታ ኡባ ሚታና።

⁸ ቡሪ ኤኪዲ ዱጌ ዩሁዳ ዎና፤ ቢታ ኩሚዲ ኣና፤ ቆ ጋካናስ ሚታና» ጊዴስ። ጊዶ ኣቲን ኣማኑኤሌ! ሚጬቲዳ ኢዛ ቄፌይ ኔ ቢታ ጋጻፔ ጋጻ ጋካናስ ካሚ ኦይኪዴስ።

⁹ ኢንቴኖ ካዎቴቶ! ኦላስ ዴንዲዲ ዋሲቴ፤ ኢንቴ ዲፒ ጋና፤ ሃሆ ዴሬን ዲዛይቲ ኤዝጊቴ! ኦላስካ ጊጌቲቴ! ኢንቴ ዲፒ ጋና፤ ኦላስካ ጊጌቲቴ! ኢንቴ ሜቄሬታና፤

¹⁰ ኦላስ ዞሬቲቴ፤ ጊዶ ኣቲን ኢንቴስ ሱሬና፤ ሃልቾ ኬሲቴ፤ ጊዶ ኣቲን ኢንቴስ ሚኔና። ጋሶይካ ጾሳይ ኑናራ ዴስ።

ጎዳን ኣማኔቴ

¹¹ ጎዳይ ባ ሚኖ ኩሼ ታ ቦላ ዎዲ ታኒ ሃ ኣሳ ኦጌ ካሎንታ ማላ ሴሪዴስ፤

¹² «ሃይሲ ኣሳይ፥ ‹ኢታ ማቆ› ጊ ጼይጊዛ ሚሽ ኢንቴ ኣይኮካ፥ ‹ኢታ ማቆ› ጎፒቴ፤ ኢስቲ ባቢዛይሳስ ኢንቴ ባቦፍቴ፤ ኢዛስ ያርኪያርኮፍቴ።

¹³ ኢንቴ ዱማሳና ቤሲዛይ ኡባፌ ዎልቃማ ጎዳ ጻላ፤ ኢንቴ ያያናሲኔ ኮኮራናስ ቤሲዛይ ኢዛ።

¹⁴ ኢዚ ጌሻሶሆ ጊዳና፤ ጊዶ ኣቲን ኢዚ ዩሁዳ ቢታ ኣሳሲኔ ኢስራኤሌ ኬ ኣሳስ ጲዛ ሹቺኔ ኩንዲሲዛ ዛላ ጊዳና፤ ዬሩሳላሜን ዲዛ ኣሳስ ኢዚ ጊቴኔ ዎጺማዴ ጊዳና።

¹⁵ ኢስታፌ ዳሮቲ ጴታና፤ ኩንዲዲካ ሜቃና፤ ዎጺማዴን ጌሊ ኦይኬታና» ጊዴስ።

¹⁶ ማርካቴ ሎኤ ኦይካ፤ ታ ታማሬታ ጊዶን ዎጋ ማታሜን ሾጫ።

¹⁷ ታኒ ባ ሲን ያቆቤ ዛሬታፔ ጌንዳ ጎዳ ናጋና፤ ኢዛካ ሂዶታ ኦና።

¹⁸ ታናኔ ታስ ጎዳይ ኢሚዳ ናይታ ቤኢቴ። ኑኒ ጺዮኔ ዙማን ዲዛ ኡባፌ ዎልቃማ ጎዳፔ ኢስራኤሌስ ማላታኔ ማርካ።

¹⁹ ኣሳይ ኢንቴና፥ «ቤሶንታዝ ታታፌቲሼኔ ሳሱኬቲሼ ሃሳዬቲዛ ቢቲዛይታኔ ሞይቲሌ ጼይጊዛይታ ኦይቺቴ» ጊኮ ዴሬይ ባ ጎዳ ኦይቻናስ ቤሴኔ? ዴኦ ጾሳ ኣጊዲ ሃይቂዳይታ ኦይሾ ኣይስ ኮሺዜ?

²⁰ ዎጋኮኔ ማርካቴ ቃላኮ ቢቴ! ኢስቲ ሃይሳ ማላ ቃላ ኢንቴስ ዮቶንታ ኣጊኮ ዎንታ ፖኦይ ኢስታስ ፖኤና።

²¹ ኢስቲ ጬጪሼኔ ጋፊሼ ቢታ ቦላ ቶይላታና፤ ኢስቲ ኬሂ ጋፊዳ ዎዴ ሃንቄታና፤ ፑዴ ጼሊዲ ባንታ ካዋኔ ባንታ ጾሳ ቃንጋና።

²² ሄሳፌ ጉዬ ኢስቲ ዱጌ ቢታ ጼላና፤ ኢስቲ ጼላናይሲካ ዋዬ፥ ማኔ ፒ ጊዳ ባቢሲዛ ሚሽ ጻላ፤ ኢስቲ ጊርዲ ጊዳ ማን ዬጌታና።