ኢሳያሳ ቲንቢቴ 63 - ጋሞ ማጻፋ

ጾሳ ጾኖኔ ኢዚ ኣሺዛ ዎልቃ

¹ ኤዶሜ ቢታን ዲዛ ቦጺራ ካታማፔ ዞኦ ሴሎ ማይኦ ማይኢዲ ዪዛይ ሄሲ ኢዚ ኦኔ? ሃይሲ ቦንቾ ማይኢዲ ባ ዎልቃ ጊታቴን ሄሜቲሼ ዪዛይ ኢዚ ኦኔ? «ጺሎ ሃሳይዛይኔ ኣሻናስ ዎልቃይ ዲዛይ ታና ጊዲኪና!» ጌስ ጎዳይ።

² ኔ ሴሎ ማይኦይ ዎይኔ ጉምኢዛ ኣሳታ ማይኦ ማላ ኣይስ ዞኢዴ?

³ «ጉምኢዛሶሆዛን ዎይኔ ታኒ ታርካ ዬዲስ፤ ካዎቴታፔ ኦኒካ ታናራ ዴና፤ ታኒ ኢስታ ታ ሃንቆን ዬዲስ፤ ታ ባሻንካ ኢስታ ዲርጼሬዲስ፤ ኢስታ ሱ ታ ሴሎ ማይኦ ቦላ ጬቲዴስ፤ ታ ማይኦይ ኡባይ ሞሬቲዴስ።

⁴ ታኒ ሃሎ ኬሳና ጋላሳይ ታ ዎዚናን ዴስ፤ ታ ዎዛና ጋላሳይካ ጋኪዴስ።

⁵ ታኒ ጼላዲስ ሺን ማዲዛይ ቤቲቤና፤ ማዲዛዴይ ባይንዳ ጊሻስ ታኒ ማላሌታዲስ ታስ ኣቶቴ ኤሂዴስ፤ ታ ሃንቆይካ ታና ሚንዴስ።

⁶ ታ ሃንቆን ካዎቴታ ዬዲስ፤ ታ ባሻን ኢስታ ማሳዲስ፤ ኢስታ ሱካ ቢታን ጉሳዲስ» ጋና።

ጾሳይ ኢስራኤሌስ ኦዳ ኪያቴ

⁷ ጎዳ ኪያቴ፥ ጎዳይ ኑስ ኦዳ ኦሶ ኡባ ጊሻስ፥ ኢዚ ጋላቴቲዛ ኦሶዛ ጊሻስ፥ ኢዛ ሲቆዛኔ ኢዛ ኪያቴ ኬና፥ ኢስራኤሌ ኬስ ኢዚ ኦዳይሳ፥ ኤ ኢዚ ኦዳ ሎኦ ኦሶታ ጊሻስ ታ ዮታና።

⁸ ጎዳይካ፥ «ቱሙካ፤ ኢስቲ ታ ዴሬታ፤ ኢስቲ ታስ ዎርዶቶንታ ኣቱማ ናይታ» ጊዴስ። ሄሳ ጊሻስ ኢዚ ኢስታ ኣሺዛዴ ጊዲዴስ።

⁹ ኢስታ ሜቶ ኡባን ጬጪዴስ፤ ኢዛ ዱሳ ኤሪሲዛ ኪታንቻይ ኢስታ ኣሺዴስ፤ ኢዚ ባ ሲቆኒኔ ባ ማሮቴን ኢስታ ዎዚዴስ። ካሴ ኣዳ ዎዴ ኡባን ኢስታ ዴንዴሲኔ ቶኪዴስ።

¹⁰ ኢስቲ ጊዲኮ ማካሊዳ፤ ኢዛ ጌሻ ኣያናካ ሚሺሲዳ ሄሳ ጊሻስ ኢዚ ሲሚዲ ኢስታስ ሞርኬ ጊዲዴስ፤ ኢስታ ኦሊዴስ።

¹¹ ሄሳፌ ጉዬ ኣሳይ ቤኒ ዎዴዛኔ ሙሴ ዎዴ ዩሺ ቆፒዴስ፤ ባ ዶርሳታ ሄንንቻታራ ኡባፌ ኬሲዳይሲ ኢዚ ኣዋን ዲዜ? ባ ጌሻ ኣያና ኢስታ ጊዶን ዎዳይሲ ሃኢ ኣዋን ዲዜ?

¹² ቦንቼቲዳ ዎልቃማ ቄሴ፥ ሙሴስ ኡሻቻ ኩሼ ቦላ ዎዴስ፤ ባስ ሜርናስ ሱን ኬሳናስ፥ ሃታ ኢስታ ሲንን ሻኪዴስ።

¹³ ፓራይ ኣይኮይ ባይንዳ ባዞ ቢታራ ካን ቢዛ ማላ፥ ኢስታካ ጪማ ጊዶራ ካሌ ፒንዴስ፤ ሄሳ ጊሻስ ኢስቲ ጴቲቤቴና።

¹⁴ ዱጌ ዙሌ ዎዛ ሜሄ ዉዴ ማላ፥ ጎዳ ኣያናይ ኢስታስ ሼምፖ ኢሚዴስ፤ ኢዚ ዴራ ሄሳ ካሌዳይ፥ ኔ ሱን ቦንቺሳናሳ።

ማዶ ዴማናስ ዎሲዛ ዎሳ

¹⁵ ኣቤት ጎዳዉ፥ ዱማቲዳ፥ ቦንቼቲዳኔ ቁ ጊዳ ኔ ኣራታፔ ሳሎፔ ዱጌ ጼላ፤ ኔ ዎልቃይኔ ኔ ሚሼቲዛ ሚሾይ ኣዋኔ? ኔ ኣሽኬቴይኔ ኔ ቃቴ ኑፔ ሃኪዴስ።

¹⁶ ኣብራሃሜይ ኑና ኤሮንታ ኣጊኮ፥ ኢስራኤሌይካ ኑና ኣኬኮንታ ኣጊኮካ ኔኒ ኑስ ኣዋ። ኣቤት ጎዳዉ፥ ኔኒ ኑስ ኣዋ፤ ቤኒሶፌካ ዶሚዲ ኔ ሱንይ ኑና ዎዚዛይሳ።

¹⁷ ኣቤት ጎዳዉ፥ ኑኒ ኔ ኦጌፔ ኬዛና ማላ፥ ኑ ዎዚና ቱሊሳዳ ኔስ ያዮንታ ማላ ኣይስ ኦይ? ኔ ኣይሌታ ጊሻስ ጋዳ፥ ኔስ ጺንጾ ጊዲዳ ቆሞታ ጊሻስ ጋዳ ኑኮ ሲማ።

¹⁸ ጉ ዎዴስ ኔ ዴሬይ ጌሻሶሆዛ ላቲዴስ፤ ሃኢ ጊዲኮ ኑ ሞርኬቲ ኔ ኬ ዬዳ።

¹⁹ ሄኮ ቤኒሶፌ ኑኒ ኔይታ፤ ጊዶ ኣቲን ኢስታ ኔኒ ሃራቤካ፤ ኢስቲ ኔ ሱንንካ ጼይጌቲቤቴና።