ኢሳያሳ ቲንቢቴ 62 - ጋሞ ማጻፋ

ጺዮኒስ ኦራ ሱን

¹ ኢዚ ጺሎቴ ማላዶ ፖኦ ማላ ጶላናሼ ጋካናስ፥ ኢዚ ኣቶቴ ጾምፔ ማላ ፖኣናሼ ጋካናስ ታ ጺዮኒ ጊሻስ ጮኡ ጊኬ፤ ዬሩሳላሜ ጊሻሲካ ሲርጲ ጊኬ።

² ካዎቴቲ ኔ ጺሎቴ፥ ካዎቲካ ኔ ቦንቾ ቤኣና፤ ጎዳይ ባ ዶናን ሱንዳ ኦራ ሱንን ኔ ጼይጌታና።

³ ኔኒ ጎዳ ኩሼ ቦንቾ ኣኪሊሌ፥ ኔ ጾሳ ኩሼን ካዎታ ካላቻ ጊዳና።

⁴ ሃይሳፌ ጉዬ ኔኒ፥ «ኣዚናይ ዬጊ ኣጊዳሮ» ጌቴታካ። ቃሴ ኔ ቢታያካ፥ «ዬጌታ ኣቲዳሮ» ጌቴቱኩ። ጊዶ ኣቲን፥ «ታ ኡፋይሲ ኢዚና» ጌቴታና፤ ኔ ቢታያካ፥ «ኣዚናይ ዲዛሮ» ጌቴታና፤ ጎዳይ ኔናን ኡፋዬታና፤ ኔ ቢታያካ ኣዚናራ ዲዛሮ ጊዳና።

⁵ ፓን ጌላኦ ኤኪዛ ማላ፥ ኔ ናይቲ ኔና ኤካና፤ ሚሺራዚ ሚሺራይን ኡፋዬቲዛ ማላ፥ ኔ ጾሲ ኔናን ኡፋዬታና።

⁶ ሃኔ ዬሩሳላሜ! ናጊዛይታ ኔ ዲርሳታ ቦላ ኤሳዲስ፤ ኢስቲ ጋላሲካ ኦማርስ ጉዬ ጌቴና፤ ኢንቴኖ ጎዳኮ ዋሲዛይቶ፥ ሙሌካ ሼምፖፍቴ፤

⁷ ኢዚ ዬሩሳላሜ ሚንና ጋካናሲኔ ቢታ ኡባ ቦላ ኤሬቲዳ ካታማ ኦና ጋካናስ ኢዛስ ሼምፖ ኢሞፍቴ።

⁸ ጎዳይ ባ ኡሻቻ ኩሼኒኔ ባ ዎልቃማ ቄሴን፥ «ሃይሳፌ ጉዬ ታ ኢንቴ ካ ኢንቴ ሞርኬታስ ቁማ ጊዳና ማላ ኢሚኬ፤ ቃሴ ኢንቴ ዳቡሪ ኬሲዳ ኦራ ኡሻ ኣላጋቲ ኡዬቴና።

⁹ ጊዶ ኣቲን ካ ሺሺዳይቲ ማና፤ ጎዳካ ጋላታና፤ ዎይኔ ቴራ ማጺ ሺሺዳይቲ ታ ኬ ፔንጌን ኡያና» ጊ ጫቂዴስ።

¹⁰ ኣቴ! ኢዛ ፔንጌታ ባጋራ ካን ቢቴ፤ ዴራስ ኦጌ ባሲቴ፤ ጊግሲቴ፤ ሹቻታ ዲጊቴ፤ ካዎቴታስ ማላታ ኤሲቴ።

¹¹ ቤኢቴ፥ ጎዳይ ሳኣ ጋጻ ጋካናስ፥ «ጺዮኔ ማጫ ናይስ፥ ‹ሄኮ ኔና ኣሺዛዴይ ዬስ፤ ኔ ዋጋይ ኢዛ ኩሼን ዴስ፤ ኔ ቃዳይ ኢዛኮን ዴስ› ጊቴ» ጊዲ ኣዋጂዴስ።

¹² ኢስቲ፥ «ጎዳይ ዎዚዳ ጌሻ ዴሬታ፤ ኔካ ዬጌታ ኣቶንታሮ ኮዬቲዛ ካታማዮ» ጌቴታና።