ኢሳያሳ ቲንቢቴ 56 - ጋሞ ማጻፋ

ኣዛዜቲዛ ኡባስ ኢሜቲዳ ኣቶቴ

¹ ጎዳይ፥ «ቱሙ ፒርዳ ናጊቴ፤ ሎኦ ኦቴ፤ ጋሶይካ ታ ኣቶቴይ ማታን ዴስ፤ ታ ጺሎቴይካ ኤሶን ቆንጫና።

² ሳምባታ ቱኒሶንታ ቦንቺዛይ፥ ኢታ ኦሶፔ ባ ኩሼ ሺሺዛይኔ ናጊዛይ፥ ሃይታንታ ፖሊዛይ ኣንጄቲዳዴ» ጌስ።

³ ጎዳኮ ሺቂዳ ቤቴይ፥ «ጎዳይ ታና ባ ኣሳፔ ቱሙ ሻካና» ጎፖ። ጉንዱላይካ፥ «ታኒ ሜሊዳ ሚ» ጎፖ።

⁴ ጎዳይ፥ «ታ ሳምባታታ ቦንቺዛ ጉንዱላታስ፥ ታና ኡፋይሲዛ ሚሽ ዶሪዛይታስ፥ ታ ጫቆ ቃላ ናጊዛይታስ፥

⁵ ታ ኬኒኔ ታ ጊምቤታ ጊዶን ኣቱማ ናይታፔኔ ማጫ ናይታፔ ኣዛ ሃሳኢሲዛ ሚሺኔ ሱን ኢስታስ ኢማና፤ ሜርናስ ዮንታ ሱን ታ ኢስታስ ኢማና።

⁶ ጎዳስ ሃጋዛናስ፥ ባና ጎዳራ ጋ ዋጺዳ ቤቴ ኣሳታ ጎዳ ሱን ሲቂዛይታኔ ኢዛስ ጎይኒዛይታ፥ ሳምባታ ቱኒሶንታ ቦንቺዛ ኡባታኔ ጫቆ ቃላ ናጊዛይታ፥

⁷ ታኒ ታ ጌሻ ዙማ ቦላ ኢስታ ኤሃና፤ ታ ዎሳ ኬ ጊዶን ታ ኢስታ ኡፋይሳና። ታስ ያርሾ ያርሺዛሶዛ ቦላን ኢስቲ ሺሺዛ ጹጌቲዛ ያርሾኔ ሃራ ያርሾታ ታ ኤካና፤ ጋሶይካ ታ ኬይ ኡባ ኣሳ ዎሳ ኬ ጌቴታና» ጌስ።

⁸ ላሌቲዳ ኢስራኤሌ ሺሺዛ፥ ኡባ ሃሪዛ ጎዳይ፥ «ሺቂዳይታ ቦላ ጉጃ፥ ታኒ ሃራታካ ዛራ ሺሻና» ጌስ።

ኢታታ ቦላ ጾሳ ዋላሴ

⁹ ኢንቴኖ ዶኣቶ፥ ኢንቴኖ ዎራ ዶኣቶ ኡባይካ ሃ ዪቴ፤ ኢንቴ ኣቻራካ ፑዜሬቴ።

¹⁰ ኢስራኤሌ ኣሳ ናጊዛይቲ ቆቄ፤ ኢስታስ ኤራቴ ዴና ኢስቲ ኡባይ ቦጮንታ ካና ማላ፤ ቦጫናስ ዳንዳዬቴና፤ ኢስቲ ኢቺዲ ኣጉሜቴቴስ፤ ኢስቲ ስካንቻ።

¹¹ ኢስቲ ጋንጃማ ካና ማላ፤ ሚዲ ካሊ ኤሬቴና። ኢስቲ ኣኬካይ ባይንዳ ሄንንቻታ፤ ኢስቲ ኡባይ ባንታ ኦጌ ኦጌ ቤቴስ፤ ኢሶይ ኢሶይ ባ ጎኣ ጻላ ጼሌስ።

¹² ኢስቲ ኢሶይ ኢሳራ፥ «ሃ ዪቴ፤ ዎይኔ ኡሹ ኣኔ ኡዮስ። ኣኔ ማታና ጋካናስ ኡዮስ! ዎንቶይካ ሃቻ ማላ ጊዳና፤ ዎይኮ ሃቺፌካ ኣ ሎኦ ጊዳና» ጌቴታና።