ኢሳያሳ ቲንቢቴ 55 - ጋሞ ማጻፋ

ጾሳፌ ቤቲዛ ማሮቴ

¹ ጎዳይ፥ «ኢንቴኖ ሳሜቲዳይቶ ኡባይካ ሃ ዪቴ! ሃኮ ሃ ዪቴ፤ ኢንቴኖ ሚሺ ባይንዳይቶ ሻሚቴ፤ ሚቴ። ሃ ዪቴ፤ ሚሺ ባይንዳኔ ቃንጾንታ ዎይኔ ኡሺኔ ማ ሻሚቴ።

² ጎኦንታ ካስ ኣይስ ኢንቴ ሚሽ ይሴቲ? ኢንቴና ካልሶንታ ሚሻስ ኣይ ኤካናስ ኢንቴ ዎልቃ ዉርሴቲ? ሲዪቴ፤ ታ ጊዳዝ ሲዪቴ፤ ሎኦ ጊዲዳዝ ሚቴ፤ ሎኦ ቁማን ኢንቴና ኡፋይሲቴ።

³ ኢንቴ ሃይ ዶይዲ ሃ ታኮ ሺቂቴ፤ ኢንቴ ሼምፖራ ፓጻ ዳና ማላ ታ ጊዛ ኤዝጊ ሲዪቴ፤ ካሴ ታ ዳዊቴራ ጫቂዳ ሚኖ ሲቆን ኢንቴናራካ ሜርና ጫቆ ጫቄታና።

⁴ ቤኢቴ፥ ታኒ ኢዛ ዴራስ ማርካ፥ ካሌዛዴኔ ኦላ ጋዳዋ ኦዲስ።

⁵ ቤኣ፥ ኔኒ ኤሮንታ ካዎቴታ ጼይጋና፤ ኔና ኤሮንታ ካዎቴቲ ኔኮ ኤሶን ያና። ጋሶይካ ጎዳ ኔ ጾሳይ ኢስራኤሌ ጌሻይ ባ ቦንቾን ኔና ቁ ቁ ሂስቲዴስ» ጌስ።

⁶ ጎዳይ ቤቲዛ ዎዴ ኢዛ ኮዪቴ፤ ማታን ዲዛ ዎዴ ኢዛ ጼይጊቴ።

⁷ ኢታ ኣሲ ባ ኦጌ፥ ቆሂዛይካ ባ ቆፋ ኣጎ፤ ጎዳኮ ሲሞ። ኢዚካ ኢዛ ማራና፤ ኢዛ ማሮቴይ ዳሮ ጊዲዳ ጊሻስ ኢዚ ኑ ጾሳኮ ሲሞ።

⁸ ጎዳይ፥ «ታ ቆፋይ ኢንቴ ቆፋ ማላ፥ ኢንቴ ኦጌይካ ታ ኦጌ ማላ ጊዴና።

⁹ ሳሎቲ ሳኣፔ ቂዳ ማላ፥ ታ ኦጌይ ኢንቴ ኦጌፔ፥ ታ ቆፋይካ ኢንቴ ቆፋፔ ቄስ።

¹⁰ ኢራይኔ ሻቺ ሳሎፔ ዎዲ ቢታ ካልሲዲ፥ ቢታይ ሞኪሳና ማላኔ ኣይፌ ኢማና ማላ፥ ዜሪዛዴስ ዜሬ፥ ሚዛዴስ ካ ኢሞንታ ዲሼ ጉዬ ሲሞንታይሳ ማላ፥

¹¹ ታ ዶናፔ ኬዚዛ ቃላይካ ጮ ሃዳ ሃ ታኮ ሲሜና፤ ጊዶ ኣቲን ኢዚ ታኒ ኮዪዳይሳ ኦስ፤ ባ ኪቴቲዳ ዋና ቆፋካ ፖሌስ።

¹² ኢንቴ ኡፋይሳን ኬዛና፤ ሳሮን ሞይዜታና። ዙማቲኔ ዙምቡላቲ ኢንቴ ሲንን ኢሊሊሳራ ዬጻና፤ ዴምባን ዲዛ ሚቲ ኡባይካ ባንታ ኩሼ ባቃና።

¹³ ኣጉን ጊሻስ ጺዳይ፥ ኪንዲቾ ጊሻስ ባርሲኔቴ ጌቴቲዛ ሚ ሞካና፤ ሄሲካ ጎዳ ሃሳኢሲዛ ሚሺ ዮንታ ማላ ሜርናስ ማላታ ጊዳና» ጌስ።