ኢሳያሳ ቲንቢቴ 53 - ጋሞ ማጻፋ

¹ ዴሬዚ፥ «ኑኒ ዮቲዳይሳ ኦኔ ኣማኒዳይ? ጎዳ ቄሴይ ኦናስ ቆንጪዴ?

² ኢዚ ኢዛ ሲንን ጫሬቻ ማላ፥ ሜላ ቢታፌ ሞኪዛ ጻጶ ማላ ሞኪዴስ፤ ኑ ኢዛ ጼላናስ ሺጫቴ ዎይኮ ቴማይ ዴና፤ ኑ ኢዛ ዶሳናስ ኢዛ ማላይ ሎኤና።

³ ኢዚ ኣሳን ካቲዳዴኔ ኢጼቲዳዴ፤ ኢዚ ሃርጌፌኔ ሜቶፔ ሻኬቲ ኤሮንታ ኣሳ፤ ኢዚ ኣሲ ኢዛ ቤኣናፔ ባ ኣይፌሶ ሃራሶ ዛሪዛ ኣሳ ማላ ካቲዳዴ ጊዲዴስ፤ ኑኒካ ኢዛ ቦንቺቤኮ።

⁴ «ቱሙካ ኢዚ ኑ ሃርጌ ባስ ኤኪዴስ፤ ቃሴ ኑ ሳኮካ ኢዚ ቶኪዴስ። ኑኒ ጊዲኮ ኢዛ ጋኪዳ ሜቶይ፥ ዴሼቴይኔ ዋዬይ ጾሳፌ ኢዛስ ኢሜቲዳዛ ጊዲ ቆፒዶስ።

⁵ ጊዶ ኣቲን ኢዚ ኑ ሞሮ ጊሻስ ጫዴቲዴስ፤ ኑ ቆሆ ጊሻስ ሊቂዴስ፤ ኢዛ ቦላ ዎዳ ቂጻቴይ ኑስ ሳሮ ኤሂዴስ፤ ኢዛ ማዱንን ኑ ፓጺዶስ።

⁶ ኑኒ ኡባይ ዶርሳ ማላ ቶይላቲ ይዶስ፤ ኑኒ ኢሶይ ኢሶይ ኑ ኦጌ ቢዶስ፤ ጎዳይ ኑ ኡባ ቆሆ ኢዛ ቦላ ዎዴስ።

⁷ «ኢዚ ኡንኤቲዴሲኔ ዋዬቲዴስ፤ ጊዶ ኣቲን ዶናካ ፖጊቤና። ዶርሳ ላቃ ማላ ሹኬታናስ ላጌቲዴስ፤ ባ ኢስኬ ቃንጺዛይታ ሲንን ጮኡ ጊዛ ዶርሳ ማላ ኢዚ ዶናካ ጶቂቤና።

⁸ ኢዛ ሜቶኒኔ ፒርዳን ኤፊዳ፤ ኢዚ ታ ዴራ ሞሮ ጊሻስ ዴሼቲዲ፥ ፓጻይ ዲዛ ቢታፌ ዲጌቲዳይሳ ኢዛ ዜሬፌ ኣኬኪዳይ ኦኔ?

⁹ ኢዚ ኣይኮ ጌኔ ሃሳዮንታ፥ ኣይ ሞሮካ ኦንታ፥ ኢዛ ሃይቆይ ኢታታራ ኢሲፌ ቆዴቲዴስ፤ ጊዶ ኣቲን ኢዚ ዱሬታ ዱፎን ሞጌቲዴስ።

¹⁰ «ኢዛ ሊቄኔ ዋዬዚ ጎዳ ሼኔ ጊዲዴስ፤ ጎዳይ ኢዛ ሼምፖ ናጋራ ያርሾ ኦኮካ ኢዚ ባ ዜሬ ቤኣና፤ ጎዳ ሼኔይ ኢዛ ኩሼን ፖሌታና።

¹¹ ኢዛ ሼምፖይ ዋዬቲዳፔ ጉዬ ኢዚ ዴኦ ፖኦ ቤኣናኔ ኡፋዬታና። ታ ጺሎ ኣይሌዚ ባ ኤራቴን ዳሮታ ጺሊሳና፤ ኢስታ ሞሮካ ቶካና።

¹² ሄሳ ጊሻስ ኢዛ ጋኪዛ ጊሻ ጊታ ኣሳታ ጊሻራ ኢሲፌ ሂስታና፤ ዲኢ ኤሂዳይሳ ዎልቃማታራ ኢዚ ኢሲፌ ጊሼታና፤ ኢዚ ባ ሼምፖ ሃይቆስ ኣ ኢሚዲ፥ ኢታ ኦዛይታራ ኢሲፌ ቆዴቲዳ ጊሻስ፥ ዳሮታ ናጋራ ቶኪዴስ፤ ቆሂዳይታ ጊሻስ ጋናቲዴስ» ጋና።