ኢሳያሳ ቲንቢቴ 52 - ጋሞ ማጻፋ

ጾሳይ ዬሩሳላሜ ኣሻና

¹ ሃኔ ጺዮኔ ዴንዳ፤ ዴንዳ፤ ዎልቃ ማይኣ፤ ጌሻ ካታማዬ ዬሩሳላሜ! ኔ ቦንቾ ማይኦ ማይኣ፤ ሃይሳፌ ጉዬ ቃጻሬቶንታይኔ ቱናይ ኔ ጊዶ ጌሌና።

² ሃኔ ዬሩሳላሜ፥ ዴንዳ፤ ጉዱላ ፒታ፤ ኔ ኣራታን ኡታ። ዲኤቲዳ ጺዮኔ ናዬ፥ ኔ ቆን ቃሼቲዳ ሳንሳላታ ኬሳ ዬጋ።

³ ጎዳይ፥ «ኢንቴ ጮ ሃዳ ባይዜቲዴታ፤ ሃኢካ ሚሺ ባይንዳ ጮ ኢንቴ ዎዜታና» ጌስ።

⁴ ኡባ ሃሪዛ ጎዳይ፥ «ኮይሮ ታ ዴሬይ ዴኣናስ ዱጌ ጊብጼ ዎዴስ፤ ጉዬፔ ኣሶሬይ ጋሶይካ ባይንዳ ኡንኤ ሃሪዴስ።

⁵ ‹ሂስቲን ታ ዴሬይ ጋሶይካ ባይንዳ ዲኤቲ ቢቺን ታስ ሃን ኣዚ ዲዜ?› ኢስታ ሃሪዳይቲ ኢስታ ቦላ ቂልጪዳ፤ ጋላስ ኩሜ ታ ሱን ፓጬይ ባይንዳ ጫዬቴስ።

⁶ ሄሳ ጊሻስ ታ ዴሬይ ታ ሱን ኤራና፤ ሄ ጋላስ ካሴካ ዮቲዳይ ታና ጊዲዳይሳ ኢስቲ ኤራና። ኤ ሄሲ ታና» ጌስ።

⁷ ዙማ ቦላ ኤቂዳ ቶሆቲ፥ ሚሺራቾ ኤኪ ዪዛ ቶሆቲ፥ ሳሮቴ ዮቲዛይቲ፥ ሎኦ ሚሺራቾ ዮቲዛይቲ፥ ኣቶቴ ኣዋጂዛይቲ፥ ጺዮኖካ፥ «ኔ ጾሳይ ካዎቲዴስ» ጊዛ ቶሆቲ ኣይ ማላ ሎኦ!

⁸ ሃኔ ሲያ! ኔና ናጊይዛይቲ ባንታ ቃላ ቁ ሂስቲዳ። ኢሲ ቦላ ኢሊሊሼ ዬጼቴስ፤ ጎዳይ ጺዮኔ ሲሚዛ ዎዴ፥ ኢስቲ ኢዛ ባንታ ኣይፌራ ቤኣና።

⁹ ኢንቴኖ ዬሩሳላሜን ቆሌቲዳ ሶሆቶ! ኢንቴ ኢሲ ቦላ ኢሊሊሳን ዬጺቴ፤ ጎዳይ ባ ዴራ ሚንዴስ፤ ዬሩሳላሜ ካታማካ ዎዚዴስ።

¹⁰ ጎዳይ ባ ጌሻ ቄሳ ካዎቴታ ኡባ ሲንን ቆንጪሳና፤ ቃሴ ቢታ ጋጻን ዲዛ ኡባይካ ኑ ጾሳ ኣቶቴ ቤኣና።

¹¹ ኢንቴኖ ጎዳ ኬ ሚሻታ ቶኪዛይቶ! ሻኬቲቴ፥ ሻኬቲቴ፤ ሄፔ ኬዚቴ። ቱና ሚሽ ቦቾፍቴ፤ ሄፔ ኬዚቴ፤ ኢንቴ ሁኤሲካ ጌይቴ።

¹² ጊዲኮካ ኤሶን ኬዜኬታ፤ ዎይኮ ቤቲ ቤኬታ፤ ጎዳይ ኢንቴፌ ሲን ኣዲ ኢንቴና ካሌና፤ ኢስራኤሌ ጾሳይካ ጉዬራ ኢንቴና ናጋና።

ሜቶይ ኢዛ ጋኪዛ ኦሳንቻ

¹³ ጎዳይ፥ «ቤኢቴ፥ ታ ኣሽካራይ ኣኬካን ኦና፤ ኢዚ ኤሬቲዳዴ ጊዳና፥ ኢዚ ቁ ቁ ጋና፤ ኢዚ ኬሂ ቦንቼታና።

¹⁴ ዳሮ ኣሳይ ኢዛን ዳጋማናሼ ጋካናስ ኣስ ኡባፌ ቆሄቲዳ ጊሻስ ኢዛ ሜይ ኣሳ ሜፔ ላሜቲዴስ።

¹⁵ ሄሳ ጊሻስ ኢዚ ዳሮ ካዎቴታ ማላሊሳና፤ ኢዛ ጋሶን ካዎቴቲ ባንታ ዶና ኦይካና፤ ኢስታስ ዮቴቶንታይሳ ኢስቲ ቤኣና፤ ኢስቲ ሲዪ ኤሮንታ ሚሽ ኣኬካና» ጌስ።