ኢሳያሳ ቲንቢቴ 50 - ጋሞ ማጻፋ

ኢስራኤሌ ናጋራኔ ጾሳ ኣይሌ ኣዛዜቴ

¹ ጎዳይ፥ «ታኒ ኢንቴ ኣዮ ኣንጃ ዬዲዳ ዋራቃታይ ኣዋን ዲዜ? ዎይኮ ታ ኢንቴና ኣይ ታልኣ ኤኪዳዴስ ባይዛዲና? ቤኢቴ ኢንቴ ኢንቴ ናጋራ ጊሻስ ባይዜቲዴታ፤ ኢንቴ ሞሮ ጊሻስ ኢንቴ ኣያ ኣንጄታ ባዱስ።

² ታኒ ዪዛ ዎዴ ሄን ኣሲ ኣይስ ይዴ? ታ ጼይጊዛ ዎዴ ዛሮ ኢሚዛ ኣሲ ሄን ዋኒ ይዴ? ኢንቴና ዎዛና ሚሽ ጪጋናስ ታ ኩሼይ ቃማዴ? ዎይኮ ኢንቴና ኣሻናስ ታስ ዎልቃይ ጉ? ቤኢቴ ታ ሃንቆን ኣባ ሜሊሳይስ፤ ሻፋታካ ባዞ ኬሳይስ ኢስታን ዲዛ ሞሌቲ ሳሞን ሃይቂዲ ዜቄቴስ።

³ ታኒ ሳሎ ሚሳና፤ ታኒ ኢዛ ማቃ ማይዛና» ጌስ።

⁴ ኡባ ሃሪዛ ጎዳይ ታስ ኢንጻርሳ ኤራቴ ኢሚዴስ፤ ሄሳ ጊሻስ ዳቡራንቻታስ ታ ኣይ ጋና ቤሲዛኮ ታ ኤራይስ፤ ማላዶ ማላዶ ታና ቤጎስ፤ ታማርሼ ዲዛ ታማሬ ማላ ሲያናስ ታ ሃይ ዶዬስ።

⁵ ኡባ ሃሪዛ ጎዳይ ታ ሃይ ዶይዴስ፤ ታኒ ማካላንቻ ዲኬ፤ ጉዬካ ባቃታቤኬ።

⁶ ታ ዞኮ ሾጪዛይታስ፥ ታ ቡቻ ሾዲዛይታስ ኣ ኢማዲስ፤ ታ ኣይፌሶ ጩቻፌ ጌንቤኬ።

⁷ ኡባ ሃሪዛ ጎዳይ ታና ማዲዛ ጊሻስ ታኒ ካዉይኬ፤ ሄሳ ጊሻስ ታ ኣይፌሶ ዳልዳቻ ሹቻ ማላ ኦዲስ፤ ታኒ ዬላቶንታይሳ ኤራይስ።

⁸ ታ ጺሎቴ ቆንጪሲዛዴይ ታ ማታን ዴስ፤ ሂስቲን ታና ሞታና ዳንዳይዛይ ኢዚ ኦኔ? ኣኔ ኢሲፌ ቲራን ጋይቶስ! ታ ባልጋራይ ኦኔ? ኣኔ ሃዮ!

⁹ ቤኢቴ፥ ኡባ ሃሪዛ ጎዳይ ታና ማዴስ፤ ሂስቲን ታ ቦላ ፒርዳናይ ኦኔ? ቤኢቴ፥ ኢስቲ ኡባይካ ማይኦ ማላ ጬጋና፤ ቢላይ ኢስታ ማና።

¹⁰ ኢንቴ ጊዶፌ ጎዳስ ያዪዛይ፥ ኢዛ ኣይላ ቃላስ ኣዛዜቲዛይ ኦኔ? ሄሳዴይ ማን ቢዛ ጊዲኮኔ ፖኦይ ኢዛስ ባይንዳ ኣጊኮ ኢዚ ጎዳ ሱንን ኣማኔቶ፤ ባ ጾሳንካ ዜምፖ።

¹¹ ሃኢ ጊዲኮ ኢንቴ ታማ ኤዲ፥ ላጪዛ ኢንቴ ጾምፔ ጾምፔ ኦይኪዳ ኡባቲ ኢንቴ ፖኦን ቢቴ፤ ኢንቴ ኦይዳ ጾምፔ ፖኦን ሲሜሬቲቴ፤ ኢንቴ ታ ኩሼፔ ኤካናይሲ ሃይሳ፤ ኢንቴ ኢታ ሜቶን ኩንዳና።