ኢሳያሳ ቲንቢቴ 47 - ጋሞ ማጻፋ

ባቢሎኔ ቦላ ያና ፒርዳ

¹ ጎዳይ፥ «ሃኔ ባቢሎኔ ጌላኦዬ፥ ጉዱላ ቦላ ዎ ኡታ፤ ሃኔ ባቢሎኔታ ናዬ፥ ኔ ኣራታፔ ዎ፤ ቢታን ኡታ፤ ሃይሳፌ ጉዬ ኔኒ ማላ ሎኦኔ ዳልቂዳልቃ ጌቴታ ጼይጌታካ።

² ዎጻ ኤካዳ ካ ጋጫ፤ ኔ ጎሳ ቃራ፤ ኔ ቃሚሳዛ ቃራ፤ ኔ ጺፋ ቤሳ፤ ጋዲጋዳሼ ሻፋ ፒና።

³ ኔ ካሎቴ ቆንጮ፤ ዬላቺዛ ኔ ካሎይ ቤቶ፤ ታኒ ሃሎ ማካና፤ ታ ኦናካ ኣጊኬ» ጌስ።

⁴ ኑና ዎዚዛ ኢስራኤሌ ጌሻስ፥ ሱንይ ጎዳ ኡባፌ ዎልቃማ ጾሳ።

⁵ «ሃኔ ባቢሎኔታ ናዬ፥ ማሶ ጌላዳ ጮኡ ጋ ኡታ፤ ሃይሳፌ ጉዬ ኔ ካዎቴታ ጎዳቴዮ ጌቴታ ጼይጌታካ።

⁶ ታኒ ታ ዴራ ሃንቄታዲስ፤ ታኒ ጺንጾዛካ ቱኒሳዲስ፤ ታኒ ኢስታ ኔ ኩሼን ኣ ኢማዲስ። ኔኒ ጊዲኮ ኢስታስ ቃታቤካ፤ ጪሚዳይታ ቦላካ ኬሂ ዴጾ ቃምባራ ዎዳሳ።

⁷ ኔኒ፥ ‹ታኒ ሜርናስ ጎዳቶ ጊዳና› ጋዳሳ። ጊዶ ኣቲን ሃይታንታ ኣኬካቤካ፤ ኢስታ ዉርሴ ኣይ ጊዳናኮ ቆፓቤካ።

⁸ «ሃኔ ኢሻሎ ዱስ ዲዛሬ! ኔርካ ኔናን ኣማኔታ ኡቲዳሬ! ኔ ዎዚናን፥ ‹ታና፤ ታፔ ኣቲን ሃራይ ባ። ሃኒፌ ጉዬ ታኒ ኣምኦ ጊዲኬ፤ ዬላዳ ሚዳሮ ጊዲኬ› ጊዛሬ ሲያ!

⁹ ሃ ናምኡ ዮኦቲ፥ ኣምኤቴኔ ዬሊ ን ቆፋይ ባይንዳ ኢሲ ጋላስ ኔ ቦላ ጋኪ ዎና፤ ኔ ኣይ ኬና ቢቲኮካ፥ ኔ ኣይ ኬና ሙሬኒኮካ ኢስቲ ኔ ቦላ ኩሜ ዎልቃራ ያና።

¹⁰ ኔኒ ኔ ኢታቴን ኣማኔታዳ፥ ‹ታና ኦኒኔ ቤኤና› ጋዳሳ። ቃሴ፥ ‹ታና፤ ታፔ ኣቲን ሃራይ ዴና ኔ ጊዳ ዎዴ ኔ ኣ ኤራቴይኔ ጪንጫቴ ኔና ባሌዳ› ጋዳሳ።

¹¹ ባሺ ኔ ቦላ ያና፤ ኔኒ ዎስታ ሙሬና ዛራናኮ ኤራካ፤ ኔ ቃንጾ ኢማዳ ኔ ዳንዳዮንታ ቆሆይ ኔ ቦላ ጋካና። ኔ ቆፖንታ ሜቶይ ኔ ቦላ ዲንጋቴ ያና።

¹² ሄኮ ቤኣ፤ ኔኒ ናቴፌ ዶማዳ ኦሼ ዳቡርዳ ቢታታኔ ዳሮ ሙሬኖታ ጉጃ ጉጃ ኦ፤ ኦኔ ኤሪዛይ ኔስ ሃናናኮ፥ ኦኔ ኤሪዛይ ኔኒ ኔ ሞርኬታ ሺሮሳናኮ?

¹³ ኔ ኤኪዳ ዞሬ ኡባይ ኔና ዳቡራራ ኣሺዴስ፤ ኣጊናፔ ኣጊና ጋካናስ ጾሊንቴ ጼሊ ካዪዛይቲ፥ ጾሊንቴ ታይቢዛይቲ ኣኔ ሃ ዬቶ፤ ኔና ጋኪዛ ሜቶፔ ኣኔ ኢስቲ ኔና ኣሼቶ።

¹⁴ ሄኮ ኢስቲ ሃፓ ማላ፤ ታማይ ኢስታ ማና። ታማ ላጮፔ ዴንዲዳይሳን ባና ኣሻናስ ዳንዳዬቴና። ኣሲ ሆኣና ቦንቆይ ዴና፤ ኡቲዲ ሆኣና ታማይካ ዴና።

¹⁵ ናቴፌ ዶማዳ ኔ ኢስታራ ዳቡርዳይቲ፥ ኔ ኢስታራ ዛልኢዳይቲ፥ ኢስቲ ኦና ዳንዳይዛይ ሃይሳ ጻላ፤ ኢሶይ ኢሶይ ባ ሞሮ ጉጂ ጉጂ ባና፤ ጊዶ ኣቲን ኔና ኣሻናይ ዴና» ጌስ።