ኢሳያሳ ቲንቢቴ 39 - ጋሞ ማጻፋ

ባቢሎኔፔ ኪቴቲ ዪዳ ኣሳታ

¹ ሄ ዎዴ ባቢሎኔ ካዎይ ባሊዳኔ ና፥ ማሮዶኬ-ባልዳኔይ ሂዝቂያሲ ሃርጊ ፓጺዳ ጊሻስ ዳብዳቤኔ ኢሞታ ኢዛስ ዬዲዴስ።

² ሂዝቂያሲ ኪቴቲዳይታ ኡፋይሳን ሞኪ ኤኪዴስ፤ ሂስቲዲ ካዎ ሚንጃ ኬን ዲዛ ቢራ፥ ዎርቃ፥ ዱማ ዱማ ሳዎታ፥ ዶሬቲዳ ዛይቴ፥ ቃሴ ኦላ ሚሻ፥ ኢዛስ ዲዛ ሚሽ ኡባ ኢሲኖካ ኣሾንታ ዲሼ ቤሲዴስ። ኢዛ ሚንጃ ኬን ዲዛ ሚሽ ጊዲን ኢዛ ካዎቴ ጋርሳን ዲዛ ሚሽ ኡባ ቤሶንታ ኣሺዳ ሚሺ ዴና።

³ ሄሳፌ ጉዬ ናቤ ኢሳያሲ ካዎ ሂዝቂያሳኮ ዪዲ፥ «ሃ ኣሳቲ ኔና ኣይ ጊዶ? ኢስቲ ኔኮ ኣዋፔ ዪዶ?» ጊ ኦይቺዴስ። ሂዝቂያሲካ ዛሪዲ ኢዛስ፥ «ሃ ኣሳቲ ታኮ ሃኮ ቢታፌ ባቢሎኔፔ ዪዳ» ጊዴስ።

⁴ ኢሳያሲ ቃሴካ፥ «ኔ ካዎቴ ኬፌ ኣይ ቤኢዶ?» ጊዴስ። ሂዝቂያሲ፥ «ታ ካዎቴ ኬን ዲዛ ኡባ ቤኢዳ፤ ታ ቤሶንታ ኣሺዳ ኢሲ ሚሺካ ዴና» ጊዴስ።

⁵ ሄሳፌ ጉዬ ኢሳያሲ ሂዝቂያሳስ፥ «ኡባፌ ዎልቃማ ጎዳይ ጊዛይሳ ሲያ፤

⁶ ‹ኔ ካዎቴ ኬን ዲዛ ኡባይ፥ ካሴ ኔ ኣዋቲ ሃች ጋካናስ ሺሺዳ ኡባይ ዲኤቲዲ ባቢሎኔ ባና ዎዴይ ያና፤ ኢሲኖካ ኣሾንታ ማጺ ኤፊዛ ዎዴይ ያና› ጌስ ጎዳይ።

⁷ ኔፔ ዬሌቲዳይቲኔ ኔ ዜሬፌ ዬሌቲዳይቲ ዲኤቲ ቢዲ ባቢሎኔ ካዎ ኬን ጉንዱላ ጊዲዲ ኦና» ጊዴስ።

⁸ ሂዝቂያሲ ዛሪዲ፥ «ኔኒ ዮቲዳ ጎዳ ቃላይ ሎኦ» ጊዴስ። ሂዝቂያሲ፥ «ታኒ ዴኢዳ ላይን ታስ ሳሮኔ ዎፓ ጊዶ» ጊ ቆፒዳ ጊሻሳ።