ኢሳያሳ ቲንቢቴ 38 - ጋሞ ማጻፋ

ሃርጌፌ ሂዝቂያሳ ፓጾ

¹ ሄ ዎዴ ካዎ ሂዝቂያሲ ሃርጊዲ፥ ሃይቃና ማቲዴስ። ሂስቲን ኣሞጼ ና ናቤ ኢሳያሲ ኢዛኮ ቢዲ፥ «ጎዳይ ኔና፥ ‹ኔኒ ሃይቃናፔ ኣቲን ሃርጌዛፔ ፓጻካ፤ ሄሳ ጊሻስ ኔ ኬ ጊጊሳ› ጌስ» ጊዴስ።

² ሂስቲን ሂዝቂያሲ ኬ ጎዳኮ ሲሚዲ ጎዳ ዎሲዴስ።

³ ዎሲሼ፥ «ኣቤት ጎዳዉ፥ ታኒ ኔ ሲንን ኣማኔቴኒኔ ኩሜ ዎዚናፔ ኔና ኡፋይሲዛ ሚሽ ኦሼ ታ ዋና ዴኢዳኮ ኔኒ ኣኬካና ማላ ታኒ ኔና ዎሳይስ» ጊ ዎሲዴስ፤ ሂዝቂያሲካ ኬሂ ጫሞ ዬሆ ዬኪዴስ።

⁴ ሄሳፌ ጉዬ ጎዳ ቃላይ ኢሳያሳኮ ዪዴስ።

⁵ ሂስቲዲ፥ «ኔኒ ባዳ ሂዝቂያሳ፥ ‹ጎዳይ ኔ ኣዋ ዳዊቴ ጾሳይ፥ ታኒ ኔ ዎሳ ሲያዲስ፤ ኔ ኣፉንካ ቤኣዲስ። ኔ ላይ ቦላ ታኒ ኔስ ታማኔ ኢቻሹ ላይ ጉጃና።

⁶ ኔናኔ ሃ ካታማዮ ኣሶሬ ቢታ ካዎዛ ኩሼፔ ኣሻና፤ ታኒ ሃ ካታማይ ቦላ ዪዛይሳ ቴቃና› ጌስ» ጊዴስ።

⁷ ኢሳያሲ ጉጂዲካ፥ «ጎዳይ ኔስ ጊዳ ቃላ ፖላናይሳስ ማላታይ ሃይሳፌ ካሊዛይሳ፤

⁸ ቤያ፥ ኣካዜይ ፑዴ ኬኣናስ ጊግሲዳ ኬቻታ ቦላ ዎዛ ኣዋ ኩዋይ ታሙ ኬች ጉዬ ሲሚ ባና ማላ ታኒ ኦና» ጊዴስ። ሂስቲን ኩዋይ ታሙ ኬች ጉዬ ሲሚዲ ቢዴስ።

⁹ ዩሁዳ ካዎ ሂዝቂያሲ ሃርጊ ፓጺዳፔ ጉዬን ጻፊዳ ቃላይ ሃይሳፌ ካሊዛይሳ፤

¹⁰ ታኒ፥ «ታ ዴኦ ላይስ ቡሮን ባጋ ጋኪዛ ዎዴ፥ ሃይቆ ፔንጌራ ጌላና ቤሲዜ? ታስ ኣቲዳ ላይይ ታፔ ቦንቄታናስ ቤሲዜ?» ጋዲስ።

¹¹ ቃሴካ፥ «ታኒ ሼምፖራ ፓጻ ዴኢዛይታ ቢታን ኔና ጎዳ ዛራ ቤኢኬ፤ ሃይሳፌ ጉዬን ታ ኣሳ ዜሬ ቤኢኬ፤ ሃ ሳኣን ዴኢዛይታ ጊዶንካ ዴኢኬ።

¹² ታ ኬ ሄንንቻታ ዱንካኔ ማላ ሾዴቲዴስ፤ ታፔካ ኤኬቲዴስ፤ ሼማኔይ ኣፋላ ዎንዲራሼን ጻጺዛ ማላ፥ ታኒ ታ ዴኦ ጻጻዲስ፤ ኢዚካ ታና ዎንዲራሼፔ ዱዴስ። ማላዶፔ ኦማርስ ጋካናስ፥ ኔኒ ታና ይሳናስ ኤሶታዳሳ።

¹³ ሳኣይ ዎንታና ጋካናስ ታኒ ኔና ዳንዳያን ናጋዲስ፤ ጊዶ ኣቲን ጋሞ ማላ ኢዚ ታ ሜቄ ኡባ ሜንሬዴስ። ቃሴ ማላዶፔ ኦማርሲ ጋካናስ ኔኒ ታና ይሳናስ ኤሶታዳሳ።

¹⁴ ታኒ ጪራሻኔ ሃ ካፎ ማላ ዋሳዲስ፤ ሃራጴ ማላካ ጉጉማዲስ። ታ ኣይፌቲ ፑዴ ሳሎ ጼሊዲ ዳቡርዳ። ኣቤት ጎዳዉ፥ ታኒ ኡንኤታዲስ፤ ኔኒ ታና ሃኒፌ ኬሳ!» ጋዲስ።

¹⁵ ሂስቲን ታ ኣይ ጋኔ? ኢዚ ባ ሁኤራ ታስ ዮቲዴስ፤ ቃሴካ ባ ሁኤራ ሃይሳ ኦዴስ፤ ታ ሼምፖያ ኬሂፔ ጬጪዳ ጊሻስ፥ ታ ዴኦ ላይ ኡባን ኣሽኬቴን ባና።

¹⁶ ኣቤት ጎዳዉ ሄይታንታ ማላ ዮኦታን ኣሳይ ፓጻ ዴስ። ታ ኣያናይካ ሄይታንታን ዴኦ ዴማና። ኔ ታና ፓዳሳ፥ ታና ሼምፖራ ፓጻ ዎዳሳ!

¹⁷ ሄኮ ታ ሜቶን ጬጪዳይሲ ታስ ጎኣስ ጊዲዴስ። ኔኒ ታ ሼምፖ ባሻ ኦላፌ ኔ ሲቆን ናጋዳሳ፤ ኔኒ ታ ናጋራ ኡባ ኔፔ ጉዬ ዛራዳ ኦላዳሳ።

¹⁸ ዱፎይ ኔና ጋላቴና፤ ሃይቆይካ ኔና ሳቤና። ዱጌ ኦላን ዎዛይቲ ኔ ኣማኔቴ ሂዶታ ኦሴቴና።

¹⁹ ታኒ ሃች ኔና ጋላቲዛይሳ ማላ ሼምፖራ ፓጻ ዴኢዛይቲ ጻላ ኔና ጋላታና፤ ኔ ኣማኔቴ ጊሻስ ኣዋቲ ባ ናይታስ ዮቴቴስ።

²⁰ ጎዳይ ታና ኣሻና፤ ሄሳ ጊሻስ ኑኒ ኑ ዴኢዛ ላይታ ኡባን፥ ጎዳ ኬን ዋጼቲዳ ዲን ዬጻና።

²¹ ኢሳያሲ ካሴ፥ «ባላሴ ሚ ኣይፌ ዳጺዲ፥ ኢዛ ኪጻ ቦላ ዎቴ። ሂስቲኮ ኢዚ ፓጻና» ጊ ዎዴስ።

²² ሂዝቂያሲካ፥ «ታኒ ፓጻዳ ጎዳ ኬ ፑዴ ኬዛናይሳስ ማላታይ ኣዜ?» ጊዲ ኢሳያሳ ኦይቺ ዎዴስ።