ኢሳያሳ ቲንቢቴ 34 - ጋሞ ማጻፋ

ዴሬ ቦላ ያና ፒርዳ

¹ ኢንቴኖ ካዎቴቶ ሺቂዲ ሲዪቴ! ኔኒ ዴሬዚ ኣኬካ! ቢታይኔ ቢታን ዲዛ ኡባይ፥ ኣላሜይኔ ኣላሜፔ ዪዳ ኡባይ ሲዮ!

² ጎዳይ ካዎቴ ኡባ ሃንቄቲዴስ፤ ኢዛ ሃንቆይካ ኢዛ ኦላንቻታ ኡባ ቦላና። ኢዚ ኢስታ ሙሌራ ይሳና፤ ሹካስካ ኣ ኢማና።

³ ኢስታፌ ሃይቂዳይቲ ካሬ ኦሌታና፤ ኢስታ ኣሃይ ጺንቃና። ዙማቲ ሱ ጻላ ጊዳና።

⁴ ሳሎ ጾሊንቴቲ ኡባይ ሴራና፤ ሳሎይ ጋልባ ማላ ጻጼታና፤ ጮራ ጾሊንቴቲ ኡባይ ሹሊዲ ቆቆፌቲዛ ዎይኔ ሃይ ማላኔ ሜሊዲ ሳኣን ዎዛ ባላሴ ሃይ ማላ ጊዳና።

⁵ ታ ጊ ማሻይ ሳሎታ ጊዶን ባስ ጊዳና ጋካናስ ኡያዱስ፤ ቤኢቴ፤ ኤዶሜ ቦላ፥ ታኒ ቃንጊዳ ኣሳ ቦላ ፒርዳናስ ዎዱስ።

⁶ ጎዳ ጊ ማሻይ ሱ ማይኣዱስ፤ ሞካ ካላዱስ፤ ዶርሳ ላቃ ሱኒኔ ዴይሻ ሱን ጎዜታዱስ፤ ርሾ ኪላሆ ሞን ጎዜታዱስ፤ ጎዳይ ቦጺራ ካታማን ያርሾ፥ ኤዶሜን ዎልቃማ ሹካ ጊግሲዳ ጊሻሳ።

⁷ ቃሴ ኢስታራ ሜን፥ ኮርማይ ዎፋኖራ ኢሲፌ ኩንዳና፤ ቢታያ ሱን ጫጳና፤ ኢስታ ቢታይ ሞን ኣራዳና።

⁸ ሄሲካ ጎዳይ ሃሎ ኬሲዛ ጋላሲኔ ጺዮኔ ጊሻስ ሞርኬታ ኦሊዛ ላይ ጊዳና።

⁹ ኤዶሜ ካንቼቲ ሺዳ ጊዳና፤ ኢዚ ቢታይ ጹጌቲዛ ዲኔ ጊዳና፤ ኢዚ ቢታይ ሺዳ ማላ ኤጻና።

¹⁰ ኢዞ ሚዛ ታማይ ቃማኔ ጋላስ ቶኤና፤ ጩዋይካ ሜርናስ ቱሉ ጋና፤ ዬሌታፔ ዬሌታ ጋካናስ ካይስ ጊዳና። ኦኒካ ናምኣን ሄራ ኣና።

¹¹ ጺሎይኔ ቁጻርሲ ኢዞ ላታና፤ ጉቶይኔ ቁሮይ ኢዚን ኬ ኬጻና፤ ጾሲ ኤዶሜ ቦላ ኢዞ ላላና ዎዶሮኔ ኢዞ ይሳና ቱምቤ ዬዳና።

¹² ኢዚ ዳናቲ ካዎ ጌቴቲ ጼይጌታናስ ዳንዳይዛ ሚሺ ዴና፤ ኢዚ ሃላቃቲ ሙሌራ ፒቴቲ ያና።

¹³ ጊምቤቲ ዩዪዳ ካታማታ፥ ኢዚ ሚጻታ ዶዮይኔ ኦካይ ላታና፤ ዎራካናታ ኦላኔ ጉቶታ ዱሳሶ ጊዳና።

¹⁴ ባዞ ዶኣቲ ጎዳሬታራ ኢሲፌ ዳና፤ ባዞ ዴይሽ ሚሳቲዛ ዳይዳንቲ ባንታ ጊዶን ጼይጌታና፤ ኦማርሳ ሜታቲ ሄን ሼምፓና፤ ባንታስ ዱሳሶ ሄን ዴማና።

¹⁵ ጉቶይ ሄ ኬን ጱጱሌታ ዬጋና፤ ዛራዳካ ጱቂሳና፤ ባ ጪዬታካ ሃጳና፤ ዎሌቲ ዋን ዋን ሄን ሺቃና።

¹⁶ ጎዳ ማጻፋን ጼሊቴ፤ ናባቢቴ። ሃይታፔ ኢሶይካ ፓጬና፤ ኢሶይ ኢሶይ ባስ ዋ ላጌ ዬና፤ ሃይሲ ሃ ኣዛዞዚ ኢዛ ዶናፔ ኬዚዴስ፤ ኢዛ ኣያናይ ኢስታ ኢሲ ቦላ ሺሻና።

¹⁷ ኢስታ ጊሻ ጊሻ ኢስታስ ዎና፤ ኢዛ ኩሼይ ሜዛኔን ሜዛኔን ጊሻና፤ ኢዛ ሜርናስ ኢስታስ ጊዳና፤ ዬሌታፔ ዬሌታ ጋካናስ ኢስቲ ኢዚን ዴኣና።