ኢሳያሳ ቲንቢቴ 3 - ጋሞ ማጻፋ

ዬሩሳላሜ ቦላኔ ዩሁዳ ቦላ ያና ፒርዳ

¹ ቤኢቴ፥ ጎዳይ ኡባፌ ዎልቃማ ጎዳይ ኣሳስ ኮሺዛ ካ፥ ሃኔ ማዶ ኡባ ዬሩሳላሜፔኔ ዩሁዳፔ ዲጋና።

² ቃራታኔ ኦላንቻታ፥ ፒርዲዛይታኔ ናቤታ፥ ሙሬኒዛይታኔ ጪማታ፥

³ ሃምሳ ሃላቃታኔ ኦላ ጋዳዋታ፥ ዞራንቻታኔ ሂላንቻታ፥ ጪንጫቴን ቢቲዛይታ ኡባ ይሳና።

⁴ ታኒ ዬላጋ ናይታ ኢስታ ቦላ ሹማና፤ ቄሪ ናይቲ ኢስታ ሃራና።

⁵ ዴሬይ ዴሬ ቦላ፥ ኣሲ ኢሶይ ኢሳ ቦላ፥ ሾሮይ ሾሮ ቦላ፥ ዬላጋ ናይቲ ጪማታ ቦላ፥ ሹፉሮይ ቦንቼቲዳይታ ቦላ ዴንዳና።

⁶ ኣሲ ባ ኣዋ ኬን ባ ኢሻንታፌ ኦይኪዲ፥ «ኔስ ማይኦይ ዲዛ ጊሻስ ኑና ካሌዛይሳ ጊዳ፤ ሃ ላሌቲዳ ሶሆዛ ኣዋቴ ኔ ኤካ» ጋና።

⁷ ሂስቲን ኢዚ ሄ ዎዴ ባ ቃላ ቁ ሂስቲዲ፥ «ታኒ ኣይኮካ ማዲኬ፤ ታሶን ማይኦይኔ ሚዛ ካ ባይንዳ ጊሻስ ታና ዴሬ ካሌዛዴ ሂስቶፍቴ» ጋና።

⁸ ዬሩሳላሜይ ጋንዲጋራዉስ፤ ዩሁዳይካ ኩንዳና ማታዱስ፤ ጋሶይካ ኢስቲ ባንታ ሃሳያኒኔ ኦሶን ጎዳራ ኤቄቲሼ ኢዛ ቦንቾዛ ቶቼቴስ።

⁹ ኢስታ ኣይፌሶይ ኢስታ ቦላ ማርካቴስ፤ ኢስቲ ሶዶሜ ኣሳ ማላ ባንታ ናጋራ ቆቶንታ ቆንጬን ሃሳዬቴስ፤ ኢስቲ ባንታ ቦላ ኢታ ሚሽ ኤሂዛ ጊሻስ ኢስታስ ኣዬ ኣና!

¹⁰ ጺሎታስ፥ «ጺሎቲ ባ ሎኦ ኦሶ ኣይፌ ማና፤ ሄሳ ጊሻስ ኢስታስ ሎኦ ጊዳና» ጋ ዮታ።

¹¹ ኢታታስ ኣዬ ኣና! ኢስታ ቦላ ኢታ ሚሺ ያና፤ ኣይስ ጊኮ ኢስቲ ባንታ ኦሶ ማላ ኤካና።

¹² ዬላጋቲ ታ ዴራ ኡንኤቴስ፤ ማጫሳቲካ ኢስታ ሃሬቴስ፤ ታ ዴሬዞ! ኢንቴና ካሌዛይቲ ኢንቴና ባሌዳ፤ ኢንቴ ቢዛ ኦጌፔካ ኢንቴና ካሬ ኬሲዳ።

ጎዳይ ባ ኣሳ ቦላ ፒርዳና ፒርዳ

¹³ ጎዳይ ፒርዳናስ ሺሎታን ኡቲዴስ፤ ዴራ ቦላ ፒርዳናስ ዴንዲዴስ።

¹⁴ ጎዳይ ዴሬ ጪማታኔ ካሌዛይታ ፒርዳናስ ኢሲ ቦላ ሺሺዲ፥ «ታኒ ዎይኔ ቶኪዛሶሆዛ ኢሲዴታ፤ ማንቆታፔ ኢንቴ ቦንቂዳይሲ ኢንቴ ቆልኣን ዴስ።

¹⁵ ታ ዴራ ኣይስ ሜቶን ሊቂሲዴቲ? ማንቆታ ኣይስ ዬሴቲ? ሃይሳ ዮቲዳይ ታና ጎዳ፥ ኡባፌ ዎልቃማ ጎዳ ጾሳ» ጌስ።

ጺዮኔ ማጫሳታስ ኢሜቲዳ ሴራ

¹⁶ ጎዳይ፥ «ጺዮኔ ማጫሳቲ ኦቶሬቲዳ፤ ባንታ ቆ ዋርጺ ሂስቲሼ፥ ባንታ ኣይፌን ሶምኢ ቤሲሼ፥ ባንታ ዱጫ ቃሼ፥ ባንታ ቶሆን ዲዛ ሳጋዮ ጊሪሲሼ ሄሜቴቴስ።

¹⁷ ሄሳ ጊሻስ ታኒ ጎዳይ ጺዮኔ ማጫሳታ ሁኤ ጪቶን ጎኢሳና፤ ታኒ ጎዳይ ኢስታ ሁኤ ቦኣሳና» ጌስ።

¹⁸ ሄ ጋላስ ጎዳይ ጺዮኔ ማጫሳታ ኣሌቆ ሚሻታ፥ ሄይቲካ ቶሆ ሳጋዮታ፥ ሁኤ ኣሌቆታ፥ ቆ ጎዝዳታ፥

¹⁹ ሃይ ጉቲቻታ፥ ኩሼ ሳጋዮታ፥ ኣይፌሶ ካሚዛ ቁራጬታ፥

²⁰ ሁኤ ጎሴታ፥ ሳጋዮታ፥ ሁኤ ኣሌቆታ፥ ጼሳን ዳንጪዛ ዳንጮታ፥ ሺቶ ቢልቃጼታ፥ ኣሼንኪታቤታ፥

²¹ ሲ ሚዲጋታ፥ ቢራ ሚዲጋታ፥

²² ሴሎ ማይኦታ፥ ጋርሳራ ማይኢዛ ማይኦታ፥ ካባታ፥ ኩሼ ካራጺቴታ፥

²³ ሄሬጋታ፥ ላይኖታ፥ ጊዶራ ማይኢዛ ማይኦታ፥ ቢናና ቃቺዛ ኣሌቆታኔ ኣይፌሶ ካሚዛ ቆሌታ ኡባ ዳፊ ኤካና።

²⁴ ሺቶ ጺንቆን፥ ዳንጮ ዎዶሮን፥ ጎፋሬ ቦኣን፥ ሴሎ ማይኦ ማቃን፥ ፑላቴ ፒጌን ላማና።

²⁵ ኢንቴስ ኣቱማ ኣሳቲ ጊ ማሻን፥ ኦላንቻቲ ኦላን ሃይቃና።

²⁶ ጺዮኔ ፔንጌቲ ካሎ ጋዴን ዎ ኡታዳ ዬኪዛ ማጫሳ ማላ ዬካናኔ ዚላላና።