ኢሳያሳ ቲንቢቴ 28 - ጋሞ ማጻፋ

ኤፍሬሜስ ኢሜቲዳ ሴራ

¹ ኤፍሬሜን ዲዛ ማቲዛይታስ፥ ኦቶሬቴስ፥ ካላቻ ጊዲዳሪስ፥ ጪሊላ ሾባ ሁኤን ኪፒ ጋ ኡቲዳ፥ ኢዛስ ቦንቾ ሴሎ ጊዲዳ ሹላ ጪሻይስ፥ ዎይኔ ኡሻይ ኢስታ ዜሬስ ኦቶሬቴስ ጊዲዳ ካታማይስ ኣዬ ኣና!

² ቤኢቴ፥ ጎዳስ ዎልቃማኔ ሚኖ ጊዲዳ ኢሶይ ዴስ፤ ሄሲካ ሻቻ ኡሾ ማላ፥ ይሲዛ ጎቴ ጫርኮ ማላ፥ ዎልቃማ ዳምባላ ማላኔ ዎልቃማ ኢራ ማላ ዎልቃን ኢዚ ኢዞ ዱጌ ቢታን ዬጋና።

³ ማቲዛ ኤፍሬሜ ኣሳታ ኦቶሮ ካላቻይ ቶሆን ዬታና።

⁴ ጪሊላ ሾባ ሁኤን ኪፒ ጋ ኡቲዳ ኢዛስ ቦንቾ ሴሎ ጊዲዳ ሹላ ጪሻያ፥ ካ ሺሾፔ ሲንን ጋኪን ኣሲ ቤኢዳ ማላ ጹጲ ኤኪዲ ሄራካ ሚቲዛ ባላሴ ማላ ጊዳና።

⁵ ሄ ጋላስ ኡባፌ ዎልቃማ ጎዳይ ባ ኣሳፔ ጫሻ ኣቲዳይታስ ቦንቾ ካላቻኔ ፑላ ኣኪሊሌ ጊዳና።

⁶ ኢዚ ፒርዲዛይታስ ሱሬ ፒርዳ ፒርዲዛ ኣያና ኦላ ካታማ ፔንጌፌ ዛሪዛይታስ ዎልቃ ጊዳና።

ማቲዛ ዩሁዳ ናቤታኔ ቄሴታ፥

⁷ ሃይቲ ዎይኔ ኡሹ ኡዪዲ ዪጮቴቴስ፤ ማሲዛ ኡሻን ጋንዲጋሬቴስ። ቄሴቲኔ ናቤቲ ማሲዛ ኡሻን ጋንዲጋርዳ፤ ዎይኔ ኡሻ ጋሶን ዮኦይ ኢስታፌ ባሌቲዴስ፤ ማሲዛ ኡሻን ጋንዲጋርዳ፤ ኣጁታ ሊኬራ ቤኤቴና፤ ፒርዳ ፒርዲሼ ጴቴቴስ።

⁸ ኢስታ ማዳ ኡባይ ጮሽ ጻላ፤ ጮሻን ሞሬቶንታሶይ ዴና።

⁹ ኢስቲ፥ «ኢዚ ኦና ታማርሲዜ? ኪታካ ኦስ ቆንጪሲዜ? ማ ኣጊዳ ናይታሴዬ ን ዱሶ ናይታሴ?

¹⁰ ኣዛዞ ቦላ ኣዛዞ፥ ኣዛዞ ቦላ ኣዛዞ ዎጋ ቦላ ዎጋ፥ ዎጋ ቦላ ዎጋ፥ ሃንካ ጉራ፥ ሄንካ ጉራ ኦስ» ጋና።

¹¹ ሂስቲኮ ሲንፌ ጾሳይ ኣላጋታ ቃላኒኔ ኢማታ ዶናን ሃ ኣሳስ ሃሳያና።

¹² ኢዚ ኢስታስ፥ «ሃና ሼምፖሶ፤ ዳቡርዳይ ሼምፖ፤ ሃና ሼምፖሶ» ጊዳይ ኦናሴ? ኢስቲ ጊዲኮ ሲያና ኮዪቤቴና።

¹³ ሄሳ ጊሻስ ጎዳ ቃላይ ኢስቲ ቢዲ ጉዬ ኩንዳና ማላ፥ ማዱንጻና ማላኔ ዎጺማዴን ኦይኬታና ማላ፥ ዲኤታና ማላ ኣዛዞ ቦላ ኣዛዞ፥ ኣዛዞ ቦላ ኣዛዞ፥ ዎጋ ቦላ ዎጋ፥ ዎጋ ቦላ ዎጋ ጊዲዲ፥ ሃን ጉራ፥ ሄን ጉራ ሃናና።

ጺዮኔን ጉላ ሹች

¹⁴ ሄሳ ጊሻስ ኢንቴኖ ዬሩሳላሜን ዲዛ ኣሳ ሃሪዛ ቂልጪዛይቶ! ጎዳ ቃላ ሲዪቴ።

¹⁵ ኢንቴ፥ «ኑኒ ሃይቆራ ጫቄቲዶስ፤ ዱፎራካ ሲጌቲዶስ፤ ዎርዶ ኑስ ዜምፖሶኔ ቆቴቲዛሶ ኦዶስ፤ ዎልቃማ ቦሻይ ፒቲ ኤኪ ቢሼ ኑና ቦቻናስ ዳንዳዬና» ጊ ኦቶሬቲዴታ።

¹⁶ ሄሳ ጊሻስ ኡባ ሃሪዛ ጎዳይ፥ «ቤኢቴ! ታኒ ጺዮኔን ፓጬቲዳ ሹች፥ ዮቻ ሹች፥ ሚኖ ዮቻስ ጊዲዛ ቦንቼቲዳ ጉላ ሹች ዎና፤ ኢዛን ኣማኒዛይ ዬላቴና።

¹⁷ ታኒ ሱሬ ፒርዳ ዋ ዎዶሮ፥ ጺሎቴካ ቱምቤ ማላ ኦና፤ ኢንቴ ዎርዶ ዜምፖሶ ኦዳይሳ ሻቻ ኢራይ ሜጫና፤ ኢንቴ ቆቴቲ ኣቲዛሶዛካ ሃ ሚታና» ጌስ።

¹⁸ ኢንቴ ሃይቆራ ጫቄቲዳ ጫቆይ ኣታና፤ ኢንቴ ዱፎራ ሲጌቲዳ ሲጋይ ላሌታና፤ ዎልቃማ ቦሻይ ፒቲ ኤኪ ቢሼ ኢንቴናካ ፒቲ ኤኪ ባና።

¹⁹ ኢዚ ዪዳ ዎዴ ዎዴ ኢንቴና ኤኪ ባና፤ ማላዶ ማላዶ፥ ቃማኔ ጋላስ ኢንቴና ፒቲ ኤፋና፤ ሃ ቃላ ኢንቴ ኣኬኪዛ ጊዲኮ ሺሮ ቦላ ሺሮ ኤሃና።

²⁰ ቶሆ ጮጎቲ ኢቾንታ ማላ ሂጻይ ቃን፤ ጋ ማይኣናስ ኣፋላይካ ጉ።

²¹ ጎዳይ ፓራጺሜ ዙማን ኦዳ ማላ፥ ባ ኦሶ፥ ባ ኢማ ኦሶ፥ ሄሲካ ባ ኦራ ኦሶ ኦናስ ዴንዳና። ቃሴ ጌባኦኔ ዙሌን ኦዳ ማላካ ኦና።

²² ጎዳይ፥ ኡባፌ ዎልቃማ ጎዳይ ኢዚ ቦሻ ቢታ ኡባ ቦላ ኤሃናስ ኣዋጂዳይሳ ታኒ ሲዪዳ ጊሻስ ሃኢ ኢንቴ ቂልጪዛይሳ ኣጊቴ፤ ኣካይ ጊኮ ኢንቴ ቦላ ቃሾይ ሚናና።

ጾሳ ኣ ኤራቴ

²³ ኤዝጊዲ ታ ዮቲዛይሳ ሲዪቴ፤ ኣኬኪዲ ታ ቃላ ሲዪቴ።

²⁴ ጎሻንቻይ ካ ዜራናስ ኡባ ዎዴ ሄ ሶሆ ጎዪሼ ዴኢዜ? ቃሴ ኢዚ ሄምኤ ሊቂሲሼኔ ኡባቶ ፒጺሼ ዴኢዜ?

²⁵ ጎሻ ሊቂሲዲ ኣሱታኔ ኣኑጋ ዜሬኔ? ጊስቴዛ ኢዛስ ጊጊዳሶሆን፥ ባንጋ ኢዛስ ጊጊዳሶሆን ኣርዳ ኢዛስ ጊጊዳሶሆን ዜሬኔ?

²⁶ ኢዛ ጾሳይ ኢዛ ታማርሴስ፤ ሱሬ ኦጌካ ኢዛ ቤሴስ።

²⁷ ኣሱታይ ሎዳን ቡኬቴና፤ ኣኑጋይ ፓራ-ጋሬን ቡኬቴና፤ ኣሱታይ ጉፌን፥ ኣኑጋይ ቄሪ ሎዳን ቡኬቴስ።

²⁸ ሶሎ ኡካናስ ካ ጋጬቴስ፤ ሄሳ ጊሻስ ኢሲ ኣሲ ሜርናስ ካ ቡኬና፤ ካ ቡኪዛ ፓራ-ጋሬታ ኢዛ ቦላራ ላጊኮካ ካ ጋጬቴና።

²⁹ ሃይሲ ኡባይ ባ ዞሬን ማላሊሲዛዝ፥ ባ ኣ ኤራቴን ማላሊሲዛዝ ጊዲዳ ኡባፌ ዎልቃማ ጎዳፔ ሃኔስ።