ኢሳያሳ ቲንቢቴ 27 - ጋሞ ማጻፋ

¹ ሄ ጋላስ ጎዳይ ሌዋታኔ ጌቴቲዛ ጾንጌቲዛ ሾሻኔ ጻጼቲዛ ሾሻ ባ ሚኖ፥ ጊታኔ ዎልቃማ ጊ ማሻን ቃጻያና፤ ኣባን ዲዛ ዎጋ ዶኣ ቃንጼሬ ዬጋና።

² ሄ ጋላስ፥ «ዎይኔ ሚ ቶኪዛ ሎኦሶዛስ ዬጺቴ!

³ ታኒ ጎዳይ ኢዛ ናጋይስ፤ ታኒ ኡባ ጋላስ ሃ ኡሻይስ፤ ኦማርሲኔ ጋላስ ኢዛ ናጋይስ፤ ሄሳ ጊሻስ ኦኒኔ ኢዛ ቆሄና።

⁴ ታኒ ሃንቄቲኬ፤ ታናራ ኦሌታናስ ኣጉንኔ ኪንዲቾይ ኬዚዳኮ ታ ኢስታ ኢሲ ቦላ ጹጋና!

⁵ ዎይኮ ታኮ ዪዲ ታና ባንታስ ቆቴቲዛሶ ኬሴቶ፤ ታናራ ጊጌቶ፤ ኤ ታናራ ጊጌቶ» ጌቴታና።

⁶ ያና ጋላሳታን ያቆቤይ ጻጶ ዬዳና፤ ኢስራኤሌይ ኣጫናኔ ጪያና፤ ሂስቲን ኢስታ ኣይፌይ ሳኣ ኩማና።

⁷ ኢዞ ሾጪዳይታ ሾጪዳ ማላ ጎዳይ ኢዞ ሾጪዴ? ኢዞ ዎዳይታ ኢዚ ዎዳ ማላ ኢዞ ዎዴ?

⁸ ኦላኒኔ ዲኦን ኔ ኢዞ ቃጻያዳሳ፤ ኣርሼይ ሞኪዛ ባጋ ጫርኮይ ጫርኪዛ ማላ ዎልቃማ ጎቴ ጫርኮን ኔ ኢዞ ጎዳዳሳ።

⁹ ያቆቤይ ያርሾ ያርሺዛሶ ሹቻታ ቦቂንታ ሹቻ ማላ ጋጪ ሊቂሲሺን ኣሼሮ ጌቴቲዛ ኤቃ ጾሳይ ሚስሌኔ ኤጻኔ ጩዋሲዛ ሶሆታ ኢስቲ ዲዛሶሆታፔ ሾዲ ኦሊሺን ሄ ጋላስ ሞሮይ ኣቶ ጌቴታና፤ ሄሲ ኢዚ ባ ናጋራ ዲጎይሳስ ኩሜ ኣይፌ ጊዳና።

¹⁰ ጊምቤቲዳ ካታማያ ካይዛዱስ፤ ባዞ ቢታ ማላ ኦሌቲዳሶ ጊዳዱስ፤ ማራቲ ሄን ሄሜቲዲ ሄን ኢቻና፤ ኢዚ ሃጋታካ ፖቂ ማና።

¹¹ ኢዚ ጼራይ ሜሊዲ ሜቃና፤ ማጫሳቲካ ሚጺ ኤና፤ ኣኬካይ ባይንዳ ዴሬ ጊዲዳ ጊሻስ ኢዛ ሜዳይ ኢዛስ ቃቴና፤ ኦዳይሲካ ኢዛ ማሬና።

¹² ሄ ጋላስ ኤፊራጺሴ ሻፋፔ ሃ ባይንዳ ጊብጼ ሻፋ ጋካናስ ጎዳይ ባ ካ ቡካና፤ ኢንቴኖ ኢስራኤሌ ኣሳቶ፥ ኢንቴ ኢሶይ ኢሶይ ሺቃና።

¹³ ሄ ጋላስ ጊታ ዛዬይ ፑኔታና፤ ኣሶሬን ዲኤቲዳይቲኔ ጊብጼን ኡንኤቲዳይቲ ጉዬ ዬሩሳላሜ ሲሚ ዪዲ ጌሻ ዙማ ቦላ ጎዳስ ጎይናና።