ኢሳያሳ ቲንቢቴ 25 - ጋሞ ማጻፋ

ጾሳስ ሺቂዛ ጋላታ

¹ ኣቤት ጎዳዉ! ኔኒ ታ ጾሳ። ታኒ ኔና ቁ ቁ ሂስታና፤ ኔ ሱንካ ሳባና። ጋሶይካ ቤኒፔ ቆፌቲዳይሳ ማላሊሲዛ ሃኖ ኩሜ ኣማኔቴን ኦዳሳ።

² ኔኒ ካታማዮ ሹቻ ዶሬ ኦዳሳ፤ ጊምቤቲዳ ካታማዮካ ላላዳሳ፤ ሃይሳፌ ሲንን ጊምቤቲዳ ኣላጋታ ካታማቲ ዴቴና፤ ሲሚዲ ሙሌካ ኦሴቴቴና።

³ ሄሳ ጊሻስ ሚኖ ዴሬቲ ኔና ቦንቻና፤ ሜንጼ ኢታ ካዎቴቲ ኔስ ያያና።

⁴ ኔኒ ሂዬሳታስ ዜምፖ፤ ሜቶታንቻታስ ሜቶ ዎዴ ኔኒ ዜምፖ፤ ጎቴ ጫርኮፌ ጌሚ ኣቲዛሶ፤ ኣዋ ሴላፔ ኩዋቲዛሶ ጊዳዳሳ። ጋሶይካ ሜንጼ ኢታታ ፔኖይ ኬ ጎዳራ ኢጬቲዛ ጎቴ ጫርኮ ማላ።

⁵ ባዞ ቢታ ሴላ ማላ። ኣላጋ ኦቶሬቴ ዋሶ ጮኡ ኦሳ። ኣዋ ሴላይ ሻራ ኩዋን ኢርጺዛ ማላ ሜንጼ ኢታታ ማዛሙሬ ሲርጲ ጋና።

⁶ ጎዳይ ኡባፌ ዎልቃማ ጾሳይ ሃይሳ ዙማ ቦላ ዴሬ ኡባስ ጊዲዛ ጊታ ጊቢራ፥ ሎኢ ካጺዳ ዎይኔ ኡሹ፥ ሎኦ ኣሾኔ ዶሬቲዳ ዎይኔ ኡሹ ጊጊሳና።

⁷ ሃይሳ ሃ ዙማን ዴሬ ኡባ ቦላን ዎዳ ማጋላሻ፥ ካዎቴታ ኡባ ጎዚ ኦይኪዳ ጎሳ ኢዚ ይሳና።

⁸ ሃይቆ ኢዚ ሜርናስ ሚታና፤ ኡባ ሃሪዛ ጎዳይ ኣሳ ኡባ ኣይፌፔ ኣፉን ቁጫና፤ ባ ዴራ ካዉሻቴ ቢታ ኡባፌ ዲጋና። ሃይሳ ጎዳይ ሃሳይዴስ።

⁹ ሄ ጋላስ ኢስታስ፥ «ቤኢቴ ኑ ጾሳይ ሃይሳ፤ ኑኒ ኢዛን ኣማኔቲዶስ፤ ኢዚካ ኑና ኣሺዴስ፤ ሃይሲ ጎዳ፤ ኑኒ ኢዛን ኣማኔቲዶስ፤ ኢዚ ኣሺዳይሳን ኡፋዬቶስ፤ ኡፋይሳን ሆምቦጮስ» ጋና።

ሞኣቤ ቃጻዬቴ

¹⁰ ጎዳ ኩሼይ ሃ ዙማ ቦላ ሼምፓና። ጊዶ ኣቲን ኡቱላይ ኡርቃን ዬቲዛ ማላ ሞኣቤይካ ዬታና።

¹¹ ሃ ዋዛይ ባ ኩሼ ሚጪዛ ማላ ኢዛ ጊዶን ዲዛይቲ ባንታ ኩሼ ሚጫና፤ ጾሲ ኢስታ ጌኔ ኦሶ ባሌቶንታ ኢስታ ኦቶሬቴ ካዉሻና።

¹² ኢስቲ ቁ ሂስቲ ጊምቢዳ ጊምቤዛ ኢዚ ዱጌ ዚቂ ሂስታና፤ ዱጌ ዎና፤ ካዉሺዲ ዱጌ ሳኣን ዎዲ ጉዱላ ቦላ ዬጋና።