ኢሳያሳ ቲንቢቴ 19 - ጋሞ ማጻፋ

ጊብጼ ቦላ ዮቴቲዳ ቲንቢቴ

¹ ጊብጼ ጊሻስ ዮቴቲዳ ቃላይ፥ «ቤኢቴ፥ ጎዳይ ኤሶቲዛ ሻራ ቶጊዲ ጊብጼ ዬስ። ጊብጼ ኤቃ ጾሳቲ ኢዛ ሲንን ኮኮሬቴስ፤ ጊብጼ ዎዚናይ ኢስታ ጊዶን ሴሬስ» ጌስ።

² «ታኒ ጊብጼታ ኢሳ ኢሳ ቦላ ዴንና፤ ኢሻይ ኢሻራ፥ ሾሮይ ሾሮራ፥ ካታማይ ካታማራ፥ ካዎይ ካዎራ ኦሌታና።

³ ጊብጼታ ዎዚናይ ላቤታና፤ ታኒ ኢስታ ሃልቾ ሃዳ ኦና። ኢስታ ኤቃ ጾሳታኔ ሞይቲሌታ፥ ቱና ኣያና ጼይጊዛይታኔ ማሮታ ዞሬ ኦይቻና።

⁴ ቃሴ ሜንጼ ኢታ ኣሳ ኩሼን ታ ጊብጼታ ኣ ኢማና፤ ባቢሲዛ ካዎይ ኢስታ ሃራና» ጌስ ጎዳይ፥ ኡባፌ ዎልቃማ ጾሳይ።

⁵ ኣባዬ ሻፋ ሃ ፓጫና፤ ሃ ጉጺ ጉጺ ሜላና።

⁶ ዛራ ሃቲ ጺንቃና፤ ጊብጼ ካንቼቲ ሚጪ ያና፤ ሻጫቲኔ ጫሬ ማታቲ ሹላና።

⁷ ኣባዬ ሻፋ ላንቄን ሃ ማታን ዲዛ ሚቲ ሹላና፤ ሻፋ ማታን ዜሬቲዳ ካ ኡባይ ጫርኮን ፒቴቲ ያና፤ ኣይኮይካ ኣቴና።

⁸ ሞሌ ኦይኪዛይቲ ጬጫና፤ ኣባዬ ሻፋን ጋቲሌ ዬጊዛይቲ ኡባይ ዬካና፤ ሃ ቦላ ባንታ ጊቴ ዬጊዛይታ ኡባ ዎልቃይ ኢጻና።

⁹ ፓቴቲዳ ታልባ ሱቂዛይቲ ያና፤ ቃሴ ቦ ፑቶፌ ማይኦ ዳዲዛይቲ ሂዶታ ቃንጻና።

¹⁰ ማይኦ ዳዲዛይቲ ጬጫና፤ ዳሞዛን ኣቂዛይታ ዎዚናይ ሜቃና።

¹¹ ጻኖሴ ቢታ ሃላቃቲ ኬሂ ኤያ፤ ኣ ኤራንቻ ጊዲዳ ካዎ ፓሮኔ ኣ ኤራንቻታ ዞሬይ ሃዳ። ፓሮኔስ፥ «ታኒ ኣ ኤራንቻታፔ ኢሳ፤ ታኒ ካሴ ካዎታ ካሊዛዴ» ዋኒዲ ጌቲ?

¹² ኢንቴ ኣ ኤራንቻቲ ሃኢ ኣዋን ዲዞ? ኡባፌ ዎልቃማ ጎዳይ ጊብጼ ቦላ ኦና ቆፒዳይሳ ኣኔ ኢንቴና ቤሴቶኔ ኤሪሴቶ።

¹³ ጻኖሴ ሃላቃቲ ኤይዳ፤ ሜምፒሳ ሹሜቲ ባሌቲዳ፤ ኢዚ ዴሬ ካሌዛ ኤሬቲዳይቲ ጊብጼ ኣሳ ባሌዳ።

¹⁴ ጎዳይ ኢስታ ቦላ ዶቺዛ ኣያና ጉሲዴስ፤ ማቲዳ ኣሲ ባ ጮሻን ጋንዲጋርዛ ማላ ጊብጼይ ባ ኦሶ ኡባን ጋንዲጋራና ማላ ኦዳ።

¹⁵ ካጬ ዎይኮ ጎይና፥ ዛምባ ዎይኮ ሻጫ ሄይቲ ኡባይ ጊብጼስ ኣይኮካ ማዴቴና።

¹⁶ ሄ ዎዴ ጊብጼ ኣሳይ ማጫሳ ማላ ጊዳና። ቃሴ ኡባፌ ዎልቃማ ጎዳይ ኢስታ ቦላ ባ ቄሴ ዴንዛ ዎዴ ኢስቲ ያሻን ኮኮራና።

¹⁷ ዩሁዳ ኣሳይ ጊብጼ ኣሳ ቦላ ሺሮ ዴንና፤ ኡባፌ ዎልቃማ ጎዳይ ኢስታ ቦላን ኦና ሃልቺዳ ሃልቾፌ ዴንዲዳይሳን ዩሁዳ ጊሻስ ሲዪዳ ኡባይ ሺሮታና።

¹⁸ ሄ ዎዴ ጊብጼ ቢታን ዲዛ ኢቻሽ ካታማቲ ካናኔ ቃላን ሃሳያና፤ ኡባፌ ዎልቃማ ጎዳ ባጋ ጊዳናስ ጫቃና። ሄ ካታማታፔ ኢሲኒያ ባሻ ካታማ ጌቴታ ጼይጌታና።

¹⁹ ሄ ዎዴ ጊብጼ ቢታን ጎዳስ ያርሾሶይ ኦሴታና፤ ቃሴ ጊብጼ ቢታ ዛዋን ጎዳስ ቱሲ ኤቃና።

²⁰ ሄሲ ኡባፌ ዎልቃማ ጎዳስ ጊብጼ ቢታን ማላታኔ ማርካ ጊዳና፤ ኢስቲ ባንታና ኡንኤዛይታፔ ዴንዲዳይሳን ጎዳኮ ዋሲዛ ዎዴ ኢዚ ኢስታ ኣሺዛዴኔ ማዲዛዴ ኪቲዲ ኢስታ ኣሻና።

²¹ ጎዳይ ባና ጊብጼታስ ቆንጪሳና፤ ኢስቲካ ሄ ጋላስ ጎዳ ኤራና፤ ያርሾኒኔ ካ ያርሾን ኢዛ ጎይናና። ኢስቲ ጎዳስ ኣዲኔታና፤ ባ ኣዲኔቲዳይሳካ ጋና።

²² ጎዳይ ጊብጼ ቦሻን ሾጫና፤ ዛሪዲካ ኢስታ ፓና፤ ኢስቲካ ጎዳኮ ሲማና፤ ኢዚካ ኢስታ ዎሳ ሲዪዲ ኢስታ ፓና።

²³ ሄ ዎዴ ጊብጼፔ ኣሶሬ ጋካናስ ዎጋ ኦጌይ ኦሴታና፤ ኣሶሬቲ ጊብጼ፥ ጊብጼ ኣሳይ ኣሶሬ ባና፤ ቃሴ ጊብጼቲኔ ኣሶሬቲ ኢሲ ቦላ ጎይናና።

²⁴ ሄ ዎዴ ኢስራኤሌይ ቢታስ ኣንጆ ጊዳናስ ሄን ማራን ጊብጼራኔ ኣሶሬራ ኢሲፌ ቆዴታና።

²⁵ ኡባፌ ዎልቃማ ጎዳይ ኢስታስ፥ «ታ ዴሬ ጊብጼይ፥ ታ ኩሼይ ሜዳ ኣሶሬይ፥ ታ ጺንጾ ኢስራኤሌይ ኣንጄቲዳይታ ጊዴቶ» ጊ ኣንጃና።