ኢሳያሳ ቲንቢቴ 18 - ጋሞ ማጻፋ

ቶጵያ ቦላ ዮቴቲዳ ቲንቢቴ

¹ ቶጵያ ሻፋታ ማታን ዲዛ ጊሬቲዛ ቄፌይ ዲዛ ቢታይስ ኣዬ ኣና!

² ሄ ቢታያ ቃስታኔታ ሻጫፌ ኦሴቲዳ ዎጎሎን ኣባ ቦላራ ሻፋፔ ሄ ፒን ኪታ ዬዲዛሮ። ኢንቴኖ ፒላታ ቃስታኔቶ! ኣዱሳኔ ቦላ ሹጎ ኣሳታኮ፥ ሃኮኒኔ ማታን ዲዛይ ኢስታስ ያዪዛ ዴሬታኮ፥ ዎልቃማኔ ቃላይ ኤሬቶንታ ዴሬታኮ፥ ሻፋ ሃቲ ኢዛ ዴሬ ሻኪ ቢዛ ካዎቴኮ ቢቴ።

³ ኢንቴኖ ሳኣ ቦላ ዲዛ ኣስ ኡባቶ! ዙማታ ቦላ ማላታይ ካቄቲሺን ኢንቴ ቤኣና፤ ዛዬይ ፑኔቲሺን ኢንቴ ሲያና።

⁴ ጎዳይ ታስ፥ «ታ ጮኡ ጋ ኡታና፤ ሴታ ጋላስ ኣዋ ሴላን ጾልቄቲዛ ሚሻ ማላ ቦኔ ሆምቤ ማላ፥ ሻራፔ ቡኪዛ ኢራ ማላ ጊዳዳ ታ ጼላና» ጊዴስ።

⁵ ካ ማጺዛ ዎዴፔ ካሴ ጪሻ ዎዴይ ኣሺን፥ ጪሻይ ጋኪዲ ዎይኔይ ኣይፌ ኣይፋና ጊሺን፥ ዎይኔ ቦላ ዲዛ ኮሾንታይሳ ጹንቃና፤ ዳዪዳ ሃጋታካ ቃንጼሬ ዲጋና።

⁶ ኢስቲ ኡባይካ ዙማ ቦላ ዲዲ ባቂ ሚዛ ካፎታሲኔ ባዞ ዶኣታስ ኣታና፤ ካፎቲ ቦኔ ኩሜ ሚሼ ሻጫና፤ ባዞ ዶኣቲ ባልጎ ኡባን ሚሼ ሻጫና።

⁷ ሄ ዎዴ ጎዳስ ኡባፌ ዎልቃማ ጾሳስ ኣዱሳኔ ሊቆ ኣሳፔ፥ ማታፔ ሃሆፔ ያዪዛ ዴሬፔ፥ ዎልቃማኔ ኢዛ ቃላይ ኤሬቶንታ ዴሬፔ፥ ሻፋቲ ሻኪ ቢዛ ካዎቴፌ ኢሞታይ ያና፤ ሜቴ ጎዳይ ዲዛሶ ፑዴ ጺዮኔ ዙማ ቦላ ያና።