ኢሳያሳ ቲንቢቴ 17 - ጋሞ ማጻፋ

ዳማስቆ ቦላኔ ኢስራኤሌ ቦላ ጾሳ ቂጻቴ

¹ ዳማስቆ ጊሻስ፥ «ቤኢቴ፥ ሃይሳፌ ሲንን ዳማስቆ ካታማቴ ኣታና፤ ላሌ ዶሬ ጊዳና።

² ኣሮኤሬ ካታማቲ ካይስ ጊዳና፤ ሜሄ ሄንሶሆ ጊዳና፤ ኢስታ ባቢሲዛ ሚሺካ ዴና።

³ ጊምቤቲዳ ካታማይ ኤፍሬሜፔ፥ ካዎቴ ማታይ ዳማስቆፌ ያና፤ ኣራሜፔ ጫሻ ኣቲዳይታ ቦንቾይ ኢስራኤሌታይሳ ማላ ካዉያና» ጌስ ኡባፌ ዎልቃማ ጎዳይ።

⁴ «ሄ ዎዴ ያቆቤ ቦንቾይ ሻሩማታና፤ ኢዛ ሞቴይካ ሹማና።

⁵ ካ ማጺዛዴይ ኤቂዳ ካ ሺሺዲ ሞ ባ ኩሼን ማጺዛ ማላ ኤራፋይሜ ሾባፌ ማጼቲዛ ፑሹሎ ማላ ጊዳና።

⁶ ዎጋራ ሚ ሾጪን ናምኡ ዎይኮ ሄ ኣይፌቲ ሃጋ ጼራ ቦላ ኣቲዛ ማላ ኦይዱ ዎይኮ ኢቻሽ ኣይፌቲ ፒ ጊዳ ሃጋታ ቦላ ኣቲዛ ማላ ጉ ሃጋቲ ኣታና» ጊ ጎዳ ኢስራኤሌ ጾሳይ ሃሳይዴስ።

⁷ ሄ ዎዴ ኣሳይ ባና ሜዳይሳኮ ጼላና፤ ኢስታ ኣይፌይ ኢስራኤሌ ጌሻኮ ጼላና።

⁸ ኢስቲ ባንታ ኩሼን ኦዳ ያርሾሶሆታ ጼሌቴና፤ ኢስቲ ባንታ ኤቃታስ ኤጻኔ ጩኣሲዛሶሆታሲኔ ኣሼሪስ ጎይናና ኤሲዳ ቱሳታስ ቦንቾ ኢሜቴና።

⁹ ሄ ዎዴ ኢስራኤሌ ኣሳ ጋሶን ቦሼቶንታ ኣቲዳ ሚኖ ካታማቲ ዎራኔ ኣይኮይ ባይንዳሶ ጊዳና።

¹⁰ ኔና ኣሺዛ ጾሳ ባላዳሳ፤ ኔ ኢዛን ቆቴታ ኣቲዛ ኔ ዛላካ ኣኬካቤካ፤ ሄሳ ኔኒ ዶሬቲዳ ኣታኪልቴ ቶኪኮካ፥ ኦራ ዜሬ ኔ ዜሪኮካ፥

¹¹ ኔ ቶኪዳ ጋላስ ኢዚ ሞካና ማላ ኔ ኦኮካ፥ ኔ ዜሪዳ ዎንቴ ጋላስ ኢዚ ጪያና ማላ ኔ ኦኮካ ሄ ካይ ሃርጌኒኔ ፓጾንታ ሳኮን ሙሌራ ያና።

ሞርኬ ካዎቴታ ጾኔቴ

¹² ቤኣ፥ ዳሮ ኣሳ ሃንቆ ጊሪሲ ኣባ ዳምባላ ማላ ጊሬስ፤ ቤኣ፥ ኣሳ ዋሶ ዳሮይ ዎልቃማ ሃ ማላ ጉሜስ።

¹³ ኣሳይ ዎልቃማ ሃ ማላ ጉሚኮካ፥ ኢዚ ኢስታ ሴሪኮ ዙምቡላ ቦላራ ጫርኮን ቢዛ ጉዱላ ማላ ጎቴ ጫርኮይ ላሊዛ ሃፓ ማላ ላሌታና።

¹⁴ ሄኮ ሳኣይ ቃሚሺን ቆፋይ ባይንዳ ሺሮ ጊዲዴስ፤ ሳኣይ ዎንታናፔ ካሴቲዲ ኦኒካ ቤቲቤና። ኑ ኣቆታ ቦንቂዳይታ፥ ኡባ ዎልቃን ኤኪዛይታ ቃዳይ ሄሳ።