ኢሳያሳ ቲንቢቴ 16 - ጋሞ ማጻፋ

ሞኣቤስ ሂዶታ ዮ

¹ ባዞ ቢታፌ ሄ ፒንን ዲዛ ሴላፔ ጺዮኔ ማጫ ናይ ዙማን ዴራ ሃሪዛይሳስ ዶርሳ ላቃ ዬዲቴ።

² ባንታ ኬፌ ጎዴቲዲ ዋዬቲዛ ካፎታ ማላ ሞኣቤ ማጫሳቲ ኣርኖኔ ሻፋ ፑርዴን ሄሳ ሃናና።

³ ሞኣቤ ኣሳይ ዩሁዳ ኣሳስ፥ «ኑስ ዞሬ ኢሚቴ፤ ኑስ ፒርዲቴ፤ ሴታ ጋላስ ኢንቴ ኤሾን ኦማርሳ ማ ማላ ኑና ካሚቴ። ባቃቲዳይታ ቆቲቴ፤ ጎዴቲዳይታካ ኣ ኢሞፍቴ።

⁴ ሞኣቤፔ ጎዴቲዳይቲ ኢንቴኮን ታኬቶ፤ ኢስታ ይሲዛይታፔ ኢስቲ ቆቴቲ ኣቲዛሶሆ ጊዲቴ» ጌስ። ኡንኤዛይሳስ ዉርሴ ያና፤ ባሺ ኣታና፤ ኦቶራንቻይ ቢታ ቦላፌ ያና።

⁵ ኣራታይ ሲቆን ሚኔስ፤ ሄ ኣራታን ዳዊቴ ኬፌ ጊዲዳይ፥ ሱሬ ፒርዳ ኣሞቲዛይ፥ ጺሎቴ ኤሶሲዛይ ኢሲ ኣሲ ኣማኔቴን ኢዛ ቦላ ኡታና።

⁶ ዩሁዳ ኣሳይ፥ «ሞኣቤታ ሃላጫ፥ ኦቶሬቴኔ ሞቴ፥ ጬቄቴኔ ካዛ ሲዪዶስ፤ ጊዶ ኣቲን ኢስታ ኦቶሬቴ ሃዳ» ጋና።

⁷ ሄሳ ጊሻስ ሞኣቤቲ ዋሳና፤ ኢሲ ቦላ ሞኣቤስ ዬካና፤ ቂሬ-ሄሬሴቴ ካታማ ኣሳ ጊሻስ ዩሺ ቆፒዲ ካዮቲሼ ዬካና።

⁸ ሃሴቦኔ ጎሻ ጋዴቲ ሴባማ ዎይኔ ሚቲ ሹሊዳ፤ ካዎቴታ ሃሪዛይቲ ኢያዜሬ ኣ ቢዲ ባዞ ቢታ ካንዲ ባንታ ጻጶ ኣባ ጋካናስ ዬዲዳይታ ዶሬቲዳ ዎይኔ ሚታ ዬቲዳ።

⁹ ሴባማ ዎይኔ ሚ ጊሻስ ኢያዜራ ዬኪዛ ማላ ታኒካ ዬካይስ፤ ሃሴቦኔ! ኤልኤሌ! ታኒ ታ ኣፉንን ኢንቴና ሎጺኪሳይስ። ጋሶይካ ኢንቴስ ሚ ኣይፌቲ ጋኪዳ ዎዴ ዲዛ ሆምቦጫይኔ ካ ሺሺዛ ዎዴ ዲዛ ኡፋይሲ ኣቲዴስ።

¹⁰ ኡፋይሳይኔ ኢሊሊሳይ ኔ ኣታኪልቴይ ዲዛሶፔ ኪቺዴስ፤ ዎይኔ ቶኪዛሶሆን ዬጺዛ ዬይ ዴና፤ ኢሊሲካ ኣቲዴስ። ዎይኔ ቴራ ጉምኢዛሶሆይ ዴና፤ ጉምኢዛይታ ሆምቦጫካ ታ ይሳዲስ።

¹¹ ሄሳ ጊሻስ ታ ዎዚናይ ሞኣቤ ጊሻስ ቃታ ሚላስ ሲሳዉስ፤ ቂሬ-ሄሬሴታ ጊሻስ ታ ማራጬያ ዬካዉስ።

¹² ሞኣቤይ ፑዴ ባ ዙምቡላ ቦላ ኬዚኮካ ዳቡራ ጻላ፤ ኢዛ ዎሳስ ባ ኤቃ ኬ ጌሊኮካ ጎኣይ ዴና።

¹³ ጎዳይ ሞኣቤ ጊሻስ ካሴቲ ዮቲዳ ቃላይ ሃይሳ።

¹⁴ ሃኢ ጊዲኮ ጎዳይ፥ ቃጻሬቲ ኦዛ ኦሳንቻይ ጋላስ ቆዲዛ ማላ ሞኣቤ ቦንቾይኔ ኣሳ ጮራቴይ ሄ ላይ ጊዶን ካዉያና፤ ሄን ኣቲዳ ኣሳቲ ጉታኔ ዎልቃይ ባይንዳይታ ጊዳና።