ኢሳያሳ ቲንቢቴ 15 - ጋሞ ማጻፋ

ሞኣቤ ቦላ ዮቴቲዳ ቲንቢቴ

¹ ሞኣቤ ቢታ ጊሻስ ጎዳይ ዮቲዳ ቃላይ ሃይሳ፤ ቂሬ-ሞኣቤን ዲዛ ኤሬያ ላሌታዱስ፤ ኢሲ ጋላሳ ኦማርሳን ዲፒ ጋዱስ፤ ቃሴ ቂሬ-ሞኣቤን ዲዛ ቂሬያ ላሌታዱስ፤ ኢሲ ጋላሳ ኦማርስ ዲፒ ጋዱስ።

² ዲቦኔ ኣሳይ ጾሳ ኬ ኬዚዴስ፤ ዬካናስ ፑዴ ዙምቡላታ ቦላ ኬዚዴስ፤ ሞኣቤ ኣሳይ ኔቦ ጊሻሲኔ ሜዴባ ጊሻስ ዋሴስ፤ ሁኤይኔ ቡቻይ ሚልጺ ጊ ሜዴቲዴስ።

³ ኦጌይ ዲዛሶ ኡባን ማቃ ማይኤቴስ፤ ፖቄታ ቦላኒኔ ዳባባይ ዲዛሶን ዬኬቴስ፤ ኣፉን ጉሴቴስ።

⁴ ሃሴቦኔይኔ ኤልኤሌይ ዋሲዳ፤ ኢስታ ዋሶይካ ያሃጼ ጋካናስ ሴቴቲዴስ። ሄሳ ጊሻስ ሞኣቤ ኦላንቻቲ ዋሲዳ፤ ኢስታ ዎዚናይካ ኮኮሪዴስ።

⁵ ታ ዎዚናይ ሞኣቤ ጊሻስ ዬኪዴስ፤ ኢዚፔ ጎዴቲዳ ኣሳቲ ዞኣሬ ጋካናስ፥ ኤጊላቴ-ሻሊሺያ ጋካናስ ባቃቲዳ፤ ኢስቲ ኣፉን ጉሲሼ ፑዴ ሉሂቴ ኬዚዳ፤ ቃሴ ሆሮናይሜ ኤፊዛ ኦጌራ ቢሼ ባንቲ ያናይሳስ ዋሲዳ።

⁶ ኒሚሪሜ ሃቲ ሚጪዳ፤ ማታይ ሹሊዴስ፤ ጫሬቻይካ ይዴስ፤ ጪሊላ ሚሺካ ቤቴና።

⁷ ሄሳ ጊሻስ ኢስቲ ሃሪዳ ኣቆታኔ ኢስቲ ሺሺዳ ሃሮ ኣሃያ ሻፋ ቶኪ ፒንቴስ።

⁸ ኢስታ ዋሶይ ሞኣቤ ዛዋ ጋካናስ ሴቴቴስ፤ ኢስታ ዋሶይ ኤጊላይሜ ጋካናስ ኢስታ ዚላሳይካ ቢኤሪ-ኤሊሜ ጋኬስ።

⁹ ዲሞና ሻፋቲ ሱን ኩሚዳ፤ ጊዲኮካ ታኒ ዲሞና ቦላ ሄሳፌ ኣዛዝ ኤሃና። ሞኣቤፔ ባቃቲዛይታ ቦላ ቢታይን ጫሻ ኣቲዳይታ ቦላ ጋሞ ዬዳና።