ኢሳያሳ ቲንቢቴ 13 - ጋሞ ማጻፋ

ባቢሎኔ ቦላ ዮቴቲዳ ቲንቢቴ

¹ ኣሞጼ ና ኢሳያሳስ ጎዳይ ባቢሎኔ ጊሻስ ቆንጪሲን ኢዚ ቤኢዳይሲ ሃይሳፌ ካሊዛይሳ፤

² ኣይኮይ ባይንዳ ሜላ ዲዛ ዙምቡላ ቦላ ማላታ ኤሲቴ፤ ኢንቴ ቃላ ቁ ሂስቲ ዋሲቴ፤ ኢስታ ሹሜታ ፔንጌራ ጌላና ማላ ማላታ ቤሲቴ።

³ ታ ጾኖን ኡፋዬቲዛይታ ታ ጌሻታ ኣዛዛዲስ፤ ታ ሃንቆ ኢስቲ ፖላና ማላ ታ ኦላንቻታ ጼይጋዲስ።

⁴ ዳሮ ዴሬይ ዎጫሚዛ ማላ ዙማታ ቦላ ዎጫሚዛ ዎጫማ ሲዪቴ! ካዎቴታ ጊዶን ሜቶቲዳ ዴሬይ ጉጉሚዛ ጉጉን ሲዪቴ! ኡባፌ ዎልቃማ ጎዳይ ኦላንቻታ ኦላስ ሳልፊሲዴስ።

⁵ ጎዳይኔ ኢዚ ባ ሃንቆ ፖሊሳናስ ጎኤቲዛ ሚሻቲ ቢታ ኡባ ይሳናስ ሃሆ ቢታፌ ሳሎታ ጋጻፔ ዪዳ።

⁶ ጎዳ ጋላሲ ማቲዳ ጊሻስ ዬኪቴ! ሄ ጋላስ ኡባ ዳንዳይዛ ጾሳ ማታፔ ባሺ ያና።

⁷ ሄሳ ጊሻስ ኩሼ ኡባይ ሲላና፤ ኣሳ ኡባ ዎዚናይካ ሴራና።

⁸ ኢስቲ ሺሮታና፤ ኢስታ ዋዬይኔ ሜቶይ ጋካና፤ ሚጻይ ኦይኪዳ ማጫሳ ማላ ኢስቲ ሚጻታና፤ ኢሶይ ኢሳራ ዳጋማን ጼሌታና፤ ኢስታ ኣይፌሶይ ዳጋማን ሻላ ማይኢዴስ።

⁹ ቤኢቴ ጎዳ ጋላሳይ ሜንጼ ኢታ፤ ቢታ ሜላ ኣሻናስ ኢዚን ዲዛ ናጋራንቻታ ይሳናስ ባሻራኔ ጊታ ሃንቆራ ያና።

¹⁰ ሳሎ ጾሊንቴቲኔ ኢስታ ቡቴቲ ፖኦ ኢሜቴና፤ ኣርሼይ ቡሮ ሞኪዳ ማላ ማና፤ ኣጊናይካ ባ ፖኦ ኢሙኩ።

¹¹ ጎዳይ፥ «ታኒ ኣላሜ ኢዚ ኢታቴ ጊሻስ ቃጻያና፤ ኢታታካ ኢስታ ናጋራ ጊሻስ ቃጻያና። ታኒ ኦቶራንቻታ ኦቶሬቴ ሻራና፤ ሜንጼ ኢታታ ኦቶሬቴ ታ ካዉሻና።

¹² ኣቲዳ ኣሳቲ ሙሩታ ዎርቃፌ ቦላራ ኣልኦ ጊዳና፤ ኦፊሬ ዎርቃፌካ ኣልኦ ጊዳና።

¹³ ሄሳ ጊሻስ ታኒ ኡባፌ ዎልቃማ ጎዳይ፥ ‹ታኒ ታ ሃንቆ ቆንጪሲዛ ዎዴ ሳሎ ቃና፤ ሳኣካ ኢዚ ዴኢዛሶን ኮኮርሳና› ጌስ።

¹⁴ ሻንካቲዛዴፌ ባቃቲዛ ጌኔሳ ማላ፥ ሄሚዛዴይ ባይንዳ ዶርሳ ዉዴ ማላ፥ ኣሲ ኡባይ ባ ኣሳኮ ኣሳኮ ሲማና፤ ኢሶይ ኢሶይ ባ ዴሬ ባቃታና።

¹⁵ ዲኤቲዳ ኡባይ ጫዴታና፤ ኦይኬቲዳ ኡባይ ማሻን ሃይቃና።

¹⁶ ኢስታ ኣይፌይ ቤኢሺን ኢስታ ናይታ ቡሳካና፤ ኢስታ ኬቲካ ቦንቄታና፤ ኢስታ ማቼታካ ሃራይ ጋይታና» ጌስ።

¹⁷ ቤኢቴ፥ ቢራስ ዉዱ ጎንታይታ፥ ዎርቃንካ ኡፋዬቶንታይታ ሜዶኔ ዴሬ ኣሳ ታ ኢስታ ቦላ ዴንና።

¹⁸ ኢስታ ዎንዳፌቲ ዎዳላታ ዉርሳና፤ ቄሪ ናይታካ ማሬቴና፤ ኢስታ ዎዚናይካ ናይታስ ሚሼቴና።

¹⁹ ካዎቴታስ ቦንቾ፥ ካላዳዌታስ ጬቆ ጊዲዳ ባቢሎኔ ጎዳይ ሶዶሜ ማላኔ ጋሞራ ማላ ኢዞ ሺሪ ዬጋና።

²⁰ ሄ ቢታን ሙሌካ ኣሲ ዴኤና፤ ኢዚን ኡቲዛ ኣሲካ ዴና፤ ኣራቤ ኣሲካ ሄን ባ ዱንካኔ ቶኬና፤ ሜሄ ሄሚዛይቲካ ባንታ ዉዴ ሄን ሼምፒሴቴና።

²¹ ጊዶ ኣቲን ባዞ ዶኣቲ ሄን ኢቻና፤ ኢዚ ኬን ዎራካናቲ ኩማና፤ ሄን ጉቶቲ ዴኣና፤ ባዞን ዴይሽ ሚሳቲዛ ዳይዳንቲ ኢዚ ቦላ ጉፓና።

²² ኢዚ ሚጻን ጎዳሬቲ ዋሳና፤ ሎኢዛ ኢዚ ካዎቴ ኬንካ ዎራካናቲ ዋሳና፤ ኢዚ ዎዴይ ማቲዴስ፤ ኢዚ ጋላሳይካ ኣዱቄና።