ኢሳያሳ ቲንቢቴ 11 - ጋሞ ማጻፋ

ሳሮቴ ኩሚዳ ካዎቴ

¹ ኢሴዬ ዱሩማፔ ኣጫይ ፑርጫና፤ ኢዛ ጻጶታፔ ኢሲ ሃጋይ ኣይፌ ኢማና።

² ጎዳ ኣያናይ፥ ኣ ኤራቴኔ ኣኬካ ኣያናይ፥ ዞሬ ኣያናይኔ ዎልቃ ኣያናይ፥ ኤራቴ ኣያናይኔ ጎዳስ ያሺሲዛ ኣያናይ ኢዛ ቦላ ሼምፓና።

³ ጎዳስ ያሻን ኢዚ ኡፋዬታና፤ ባ ኣይፌን ቤኢዳ ማላኔ ባ ሃይን ሲዪዳ ማላ ፒርዴና።

⁴ ጊዶ ኣቲን ሂዬሳታስ ጺሎ ፒርዳና፤ ሳኣ ቦላ ማንቆታስ ሱሬ ፒርዳና፤ ባ ኢንጻርሳ ጻምኣን ሳኣ ሾጫና፤ ባ ዶና ፔኖን ኢታታ ዎና።

⁵ ጺሎቴ ኢዛስ ጼሳ ዳንጮ ጊዳና፤ ኣማኔቴይ ኢዛስ ዳባላ ዳንጮ ጊዳና።

⁶ ካና ሱይቴይ ዶርሳ ላቃራ ኢሲፌ ዳና፤ ማሄይካ ዴይሻ ላቃራ ኢሲፌ ኢቻና፤ ሚዛ ማሪ፥ ጋሞ ማሪኔ ሞ ሜሄይ ኢሲፌ ሄሜታና፤ ጉ ናይ ኢስታ ሄማና።

⁷ ሚዚኔ ዛርዶይ ኢሲፌ ሄሜታና፤ ኢስታ ማራቲካ ኢሲፌ ኢቻና፤ ጋሞይ ቦራ ማላ ሃፓ ማና።

⁸ ሚዛ ናይ ኢታ ሾሻ ኦላን ካኣና፤ ን ዱንታ ናይ ባ ኩሼ ጎፔ ሾሻ ኦላን ዬዳና።

⁹ ጌሺ ጊዲዳ ታ ዙማ ቦላ ቆሄቴና ዎይኮ ኦኒካ ዬና፤ ሃ ኣባ ኩሚዛ ማላ ሳኣ ኡባይ ጎዳ ኤሮን ኩማና።

ዲኤቲ ቢዳይታ ሲሞ

¹⁰ ሄ ዎዴ ኢሴዬ ዜሬ ካዎቴታስ ማላታ ጊዲ ኤቃና፤ ካዎቴቲ ኢዛኮ ያና፤ ኢዛ ሼምፖሶይ ቦንቼታና።

¹¹ ሄ ዎዴ ጎዳይ ናምኣን ባ ኩሼ ሚጪዲ ኣቲዳ ኣሳ ኣሶሬፔ፥ ፑዴሃ ጊብጼፔ፥ ዱጌሃ ጊብጼፔ፥ ቶጵያፔ፥ ኤላሜፔ፥ ሳናኦሬፔ፥ ሃማቴፔኔ ኣባ ጋጻን ዲዛ ዴሬታፔ ሺሻና።

¹² ካዎቴታስ ማላታ ኤሳና፤ ቁ ኦዲ ዴንና፤ ኢስራኤሌፔ ጎዴቲ ቢዳይታ ዛሪ ኤሃና፤ ላሌቲዳ ዩሁዳ ኣሳ ኦይዱ ባጋ ቢታ ጋጻፔ ኢዚ ሺሻና።

¹³ ኤፍሬሜ ቃናቴቴ ኤቃና፤ ዩሁዳ ሞርኬቲካ ቃንጼታና፤ ኤፍሬሜይ ዩሁዳ ቦላ ቃናቴና፤ ዩሁዳይካ ኤፍሬሜ ኢጼና።

¹⁴ ኢስቲ ኣርሼይ ዉሊዛ ባጋራ ፊሊስጼሜታ ዱጉን ዎና፤ ናምኣይካ ኢሲፌ ጊዲዲ ኣርሼይ ሞኪዛ ዴሬዛ ቦንቃና፤ ኢስቲ ኤዶሜ ቦላኔ ሞኣቤ ቦላ ባንታ ኩሼ ዴንና፤ ኣሞኔ ኣሳይ ኢስታስ ሃሬታና።

¹⁵ ጎዳይ ኢታ ጫርኮን ጊብጼ ኣባ ሜሊሳና፤ ኢዚ ባ ኩሼ ኤፊራጺሴ ሻፋ ቦላ ዬዳና፤ ላፑን ኬሲ ሻኬሬ ዬጋና፤ ሄሳ ጊሻስ ኣሳይ ቶሆፔ ጫማ ኬሶንታ ፒናና።

¹⁶ ካሴ ኢስራኤሌይ ጊብጼፔ ኬዚሺን ሃኒዳይሳ ኣሶሬን ኣቲዳ ኣሳይ ኬዛና ኦጌ ኢስታስ ጊጊሳና።