ኢሳያሳ ቲንቢቴ 1 - ጋሞ ማጻፋ

¹ ዩሁዳ ካዎታ ኦዚያ፥ ኢዮኣታሜ፥ ኣካዜኔ ሂዝቂያሳ ካዎቴ ዎዴ ኣሞጼ ና ኢሳያሲ ዩሁዳ ጊሻሲኔ ዬሩሳላሜ ጊሻስ ቤኢዳ ኣጁታ።

ጾሳይ ባ ዴሬዛ ሴሪዳ ሴራ

² ጎዳይ፥ «ሳሎቶ ሲዪቴ! ቢታዬ ኔካ ኤዝጋ ሲያ! ታኒ ናይታ ዬላዳ ዲቻ ጋን ኢስቲ ታ ቦላ ማካሊዳ።

³ ቦራይ ባ ጎዳ ኤሬስ፤ ሃሬይ ኢዛ ጎዳይ ኢዛስ ጊግሲዳ ዜካ ኤሬስ፤ ኢስራኤሌይ ጊዲኮ ታና ኤሬና፤ ታ ዴሬይካ ኣኬኬና» ጊዴስ።

⁴ ኢንቴኖ ናጋራንቻ ካዎቴቶ! ቆሆን ኩሚዳይቶ! ኢታ ኦዛ ዜሬቶ! ኢንቴ ኣዋታ ቱናቴ ካሊዛ ናይቶ! ኢንቴና ኣዬ ኣና! ጎዳ ኣጋጊዴታ፤ ኢስራኤሌ ጌሻዛ ዬጊ ኣጊዴታ፤ ዞኮካ ኢዛስ ዛሪዴታ።

⁵ ማካላ ቦላ ማካላ ጉጂዲ ኢንቴ ኣይስ ዛሪ ዛሪ ቃጻዬቴቲ? ኢንቴ ሁኤይ ሙሌ ሳኬቲዴስ፤ ኢንቴ ዎዚናይካ ዳቡርዴስ።

⁶ ሄሳ ጋሶን ሂርኪ ቶሆ ጹጉንፌ ቢዲ ሁኤ ኢስኬ ጋካናስ ፓጻቴ ኢንቴስ ባዋ። ማዱን፥ ኪጻኔ ኡዛስ ጻላ ጊዲዴስ። ሄ ማዱንይ ሜጬቲቤና፤ ቃሼቲቤና፤ ዛይቴንካ ሹጊቤና።

⁷ ኢንቴ ዴሬይ ኣይኮይ ባይንዳ ባዞ ጊዳና፤ ኢንቴ ካታማቲ ታማን ጹጌታና፤ ኢንቴ ኣይፌይ ጼሊሺን ኢንቴ ቢታ ኣላጋይ ቦንቂ ኤካና፤ ኢስቲ ኢንቴ ቢታ ቡላ ኬሳና።

⁸ ጺዮኔ ናያ ዎይኔ ሚ ጊዶን ዲዛ ጋባ ማላ፥ ሌሌሄ ጊዶን ዲዛ ቄሪ ኬ ማላኔ ሞርኬይ ጊዶዳ ካታማ ማላ ጊዳዱስ።

⁹ ኡባፌ ዎልቃማ ጎዳይ ኑስ ዜሬ ኣሾንታኮ፥ ኑኒ ሶዶሜ ማላኔ ጋሞራ ማላ ጊዳናኮሺን።

¹⁰ ኢንቴኖ ሶዶሜ ኣይሲዛይቶ! ጎዳ ቃላ ሲዪቴ፤ ኢንቴኖ ጋሞራ ዴሬቶ! ኑ ጾሳ ቲሚርቴ ኤዝጊ ሲዪቴ።

¹¹ «ኢንቴ ያርሾ ዳሮይ ታስ ኣይ ኦኔ? ሃኖ ጋካናስ ኢንቴ ታስ ሺሺዳ ጹጌቲ ሺቂዛ ርሾ ኣሾኔ ሞ ሜሄታ ኣሾ ካላዲስ፤ ታኒ ቦራ ሱን፥ ዶርሳ ሱኒኔ ዴይሻ ሱን ኡፋዬቲኬ።

¹² ኢንቴ ታስ ጎይናናስ ዪዛ ዎዴ ሄሳ ኡባ ኢንቴ ኤኪ ያና ማላኔ ታ ኬ ዛጎ ኢንቴ ዬና ማላ ኦኒ ኦይቺዴ?

¹³ ሃይሳፌ ጉዬ ሃይሳ ሚሳቲዛ ሃዳ ያርሾ ናምኣን ሺሾፍቴ፤ ኢንቴ ጩዋሲዛ ኤጻኔይ ታና ሻቴስ፤ ኣጊና ጼሮን፥ ሳምባታ ጋላሳታኒኔ ኢንቴ ጎይኖስ ሺቂዛ ጋላሳታን ኢንቴ ቦንቺዛ ባኣሌቲ ኢታቴን ኩሚዳ ጊሻስ ታኒ ሄይታ ጌንጫ ኣናስ ዳንዳይኬ።

¹⁴ ኣጊና ጼሮን ኢንቴ ቦንቺዛ ጋላሳታኔ ካሴ ኢንቴ ዎዳ ባኣሌ ጋላሳታ ታ ሼምፖያ ሃራሴታዱስ፤ ሄይቲ ታስ ዳሮ ዴጾ ቶሆ ጊዲዳ ጊሻስ ታ ኢስታ ቶካናስ ዳንዳይኬ።

¹⁵ ኢንቴ ኢንቴ ኩሼ ዎሳስ ታኮ ሚጪኮ ታኒ ታ ኣይፌ ኢንቴፌ ሃራሶ ዛራና፤ ኢንቴ ኩሼን ሱ ኩሚዳ ጊሻስ ኢንቴ ኬሂ ዎሲኮካ ታ ኢንቴ ዎሳ ሲዪኬ።

¹⁶ ሜጬቲቴ፤ ኢንቴና ጌሺቴ፤ ኢንቴ ኢታ ኦሶዛ ታ ሲንፌ ዲጊቴ፤ ኢታ ኦሶካ ኣጊቴ።

¹⁷ ሎኦ ኦሶ ታማርቴ፤ ሱሬ ፒርዳ ኮዪቴ፤ ቆሄቲዳይታ ሚንቴ፤ ዪኦታስ ኤቂቴ፤ ኣምኤታስ ሞቴቲቴ» ጊዴስ።

¹⁸ ቃሴካ ጎዳይ፥ «ሃ ዪቴ ኢሶይ ኢሳራ ኣኔ ቡጼቶስ፤ ኢንቴ ናጋራይ ጼቃ ዞኦ ጊዲኮካ ሻቻ ማላ ቦታና፤ ሱ ማላ ዞኢኮካ ፑቶ ማላ ፑቃ ቦ ጊዳና።

¹⁹ ኢንቴ ታስ ኤኖ ጊ ኣዛዜቲኮ ቢታ ኣንጆ ማና።

²⁰ ኢንቴ ታስ ኣካይ ጊ ማካሊኮ ማሻይ ኢንቴና ማና፤ ሃይሳ ዮቲዳይ ታና ጎዳ» ጊዴስ።

ናጋራይ ኩሚዳ ካታማዮ

²¹ ካሴ ኣማኔቲዳ ካታማያ ዋናዳ ላይማ ጊዳዴ? ካሴ ኢዚን ሱሬ ፒርዳይ ኩሚዳራኔ ጺሎቴ ኢዚን ኩሚዳራ ሃኢ ጊዲኮ ሼምፖ ዎዛይታስ ዱሳሶ ጊዳዱስ።

²² ሃኔ ኔ ቢራይ ሺይዴስ፤ ኔ ዎይኔ ኡሻይ ሃን ዬሌቲዴስ።

²³ ኔና ካሌዛይቲ ማካላንቻታራኔ ካይሶታራ ላጌቲዳ፤ ኢስቲ ኡባይካ ማጋንጾ ዶሴቴስ። ማታኤካ ኬሂ ኮዬቴስ፤ ዪኦታስ ኣ ኤቄቴና፤ ኣምኤታ ማጋና ሲዬቴና።

²⁴ ሄሳ ጊሻስ ጎዳይ፥ ኡባፌ ዎልቃማ ጎዳ ኢስራኤሌ ጾሳይ፥ «ታኒ ታ ሞርኬታ ቦላ ታ ሃንቆ ጉሳና፤ ታና ኮሚዛይታ ቦላካ ታኒ ሃሎ ኬሳና።

²⁵ ታኒ ታ ኩሼ ኔ ቦላ ዴንና፤ ኔ ቦላ ዲዛ ኪንካ ታ ጌሻና፤ ኔ ቂታካ ኔ ቦላፌ ዲጋና።

²⁶ ካሴ ኔና ኣይሲዛይታ ማላ ሃራ ኔና ኣይሳናይታኔ ዞራናይታ ታኒ ኔስ ዴንና፤ ሄሳፌ ጉዬ ኔኒ፥ ‹ጺሎቴ ዲዛ ኣማኔቲዳ ካታማዮ› ጌቴታና።

²⁷ ጺዮና ሱሬ ፒርዳን፥ ማሮቴን ሲሚዛይቲ ጺሎቴን ዎዜታና።

²⁸ ጊዶ ኣቲን ማካላንቻቲኔ ናጋራንቻቲ ኢሲ ቦላ ሊቃና፤ ጾሳ ኣጊዛይቲ ዉሪካ ያና።

²⁹ ካሴ ኢንቴ ዶሲዛ ካሻታን ኢንቴ ዬላታና፤ ካሴ ኢንቴ ዶሪዳ ኣታኪልቴሶሆታን ኢንቴ ካዉያና።

³⁰ ዉርሴን ኢንቴ ቦንጮይ ቆኪዳ ዎላ ማላ፥ ሃ ባይንዳ ኣታኪልቴሶሆታ ማላ ጊዳና።

³¹ ሚኖ ኣሲ ሃፓ ማላ፤ ኢዛ ኦሶይካ ፒልኢ ጊዛ ላጮ ማላ ጊዳና፤ ናምኣይካ ኢሲ ቦላ ጹጌታና፤ ሄ ታማ ቶይሳና ኣሲካ ዴና» ጊዴስ።