ሆሴኤ ቲንቢቴ 9 - ጋሞ ማጻፋ

ኢስራኤሌ ቦላ ያና ቂጻቴ

¹ ኢስራኤሌ ኣሳዉ! ኡፋዬቶፍቴ! ሃራ ካዎቴታ ማላ ኡፋይስ ኖጮጩ ጎፒቴ! ኣይስ ጊኮ ኢንቴ ኢንቴ ጾሳስ ኣማኔቲቤኬታ ካ ባሌ ኡባን ላይማቴስ ኢሚዛ ዋጋ ዶሲዴታ።

² ሄሳ ጊሻስ ሃይሳፌ ጉዬ ኢንቴ ካ ባሌፔ ካ፥ ዎይኔ ጉምኢዛሶሆፔ ዎይኔ ኡሹ ዴሜኬታ። ኦራ ዎይኔ ኡሺካ ኢንቴስ ፓጫና።

³ ኢስራኤሌ ዴሬይ ጎዳይ ኢስታስ ኢሚዳ ቢታን ኡቴና። ኤፍሬሜይ ዱጌ ጊብጼ ሲማና፤ ኣሶሬካ ቢዲ ቱኒዳ ካ ማና።

⁴ ሄን ጎዳስ ዎይኔ ኡሹ ያርሻናስ ዳንዳዬቴና፤ ኢስታ ያርሾይካ ጎዳ ኡፋይሴና። ሄሳ ጊሻስ ኢስታስ ያርሾዚ ሾቻ ካ ጊዳና፤ ኢዛ ሚዛ ኡባይ ቱናና። ሄ ካዚ ጮ ጋፋስ ሚዛ ካ ጊዳና ኣቲን ጎዳ ኬ ያርሾስ ሺቄና።

⁵ ሂስቲን ኢንቴ ዱማ ዱማ ባኣሌ ጋላሳታኒኔ ጎዳ ባኣሌ ጋላሳታን ኣይ ኦቲ?

⁶ ኢስቲ ባሻፌ ኣታናስ ቤቲኮካ ጊብጼይ ኢስታ ሺሻና፤ ሜምፒሳ ጌቴቲዛሶን ኢስታ ሞጋና፤ ኢስቲ ሃሪዳ ቢራይ ዉሪካ ሻራፋ ማይኢ ኣታና፤ ኢስታ ዱሳሶ ኡባ ኣጉን ላታና።

⁷ ቃጻያና ዎዴይ ጋኪዴስ፤ ፒርዳ ጋላሲካ ጋኪዴስ፤ ሄሳ ኢስራኤሌ ኣሳይ ኤሮ። ኢንቴ ኦዳ ናጋራይ ዳሮ ጊዲዳ ጊሻሲኔ ኢንቴ ሞርኬቴ ጊታ ጊዲዳ ጊሻስ ናቤይ ኤያ ማላ፥ ጾሳ ኣያናይ ኢዛ ቦላ ሼምፒዳዴይ ጎሻ ማላ ቆዴቲዴስ።

⁸ ናቤይ ጾሳራ ጊዲዲ ኤፍሬሜ ናጊዛዴ፤ ጊዶ ኣቲን ኢዛ ኦጌ ኡባን ዎጺማዴይ፥ ኢዛ ጾሳ ኬን ኢጾይ ኢዛ ናጌስ።

⁹ ኢስራኤሌ ኣሳይ ካሴ ጊቢኣ ዎዴ ዲዛ ኣሳ ማላ ኬሂ ቱኒዴስ፤ ጾሲ ኢስታ ቆሆዛ ቆፒዲ ኢስታ ናጋራ ጊሻስ ኢስታ ቃጻያና።

ናጋራ ጋሶን ኢስራኤሌ ኣሳ ኩንዴ

¹⁰ ጎዳይ፥ «ታኒ ኢስራኤሌ ኣሳ ዴሚዳ ዎዴ ታስ ባዞ ቢታን ዎይኔ ሚ ኣይፌ ዴሚዳ ሚሳቲዴስ። ታኒ ካሴ ኢንቴ ኣዋታ ቤኢዳ ዎዴ ታስ ኮይሮ ካጺዳ ባላሴ ሚ ኣይፌ ቤኢዳ ሚሳቲዴስ። ኢስቲ ባኣሊ-ፔኦሬ ጋኪዳ ዎዴ ባንታናቴ ዬላቺዛ ኤቃ ጾሳስ ዱማሲዳ። ኢስቲካ ሄ ባ ሲቂዛ ኤቃ ጾሳ ማላ ቱኒዳ።

¹¹ ኤፍሬሜ ቦንቾይ ካፎይ ፒራዛ ማላ ፒራ ያና፤ ሃይሳፌ ጉዬ ና ቃንቴ፥ ሻራይኔ ና ዬሎይካ ዴና።

¹² ና ዬሊዲ ዲቺኮካ ኢስቲ ማና ጋካናስ ታ ኢስታ ዎና። ታ ኢስታፌ ታ ኣይፌሶ ዛሪዳ ዎዴ ኢስታስ ኣዬ ኣና!

¹³ ኤፍሬሜይ ጺሮሴ ማላ ሎኦ ጋዴን ቶኬቲን ቤኣዲስ፤ ሃኢ ጊዲኮ ኤፍሬሜይ ባ ናይታ ሼምፖ ዎዛይታስ ኣ ኢማና።

¹⁴ ጎዳዉ! ኔ ሃ ዴራስ ኣይ ኢማኔ? ኣዉጫዪዛ ኡሎኔ ሹላ ን ኢማ!

ኢስራኤሌ ኣሳ ቦላ ጾሳ ፒርዳ

¹⁵ «ኢስቲ ጌልጌላን ኦዳ ኢታቴ ጋሶን ታ ኢስታ ኢጻዲስ፤ ኢስቲ ኦዳ ኢታ ኦሶ ጊሻስ ታ ኬፌ ታ ኢስታ ጎዳና፤ ሃይሳፌ ጉዬካ ታ ኢስታ ዶሲኬ፤ ኢስታ ካሌዛይቲ ኡባይ ማካላንቻታ።

¹⁶ ኤፍሬሜይ ሾጬቲዴስ፤ ኢስታስ ጻጶይካ ሜሊዴስ፤ ኢስቲ ኢሻሎን ዲቺዳ ናይታ ታ ዎና» ጌስ።

ሆሴኤይ ኢስራኤሌ ኣሳ ሴሪዴስ

¹⁷ ኢስቲ ኣዛዜቶንታ ኢጺዳ ጊሻስ ታ ጾሲ ኢስታ ዬጊ ኣጋና፤ ኢስቲካ ካዎቴታ ጊዶን ጮ ቶይላታና።