ሆሴኤ ቲንቢቴ 7 - ጋሞ ማጻፋ

¹ «ታኒ ታ ዴሬ ኢስራኤሌ ኣሳ ፓናሲኔ ዛራዳ ዱሬሳናስ ኮይዛ ዎዴ፤ ኤፍሬሜ ናጋራይኔ ሳማሪያ ኣሳ ኢታቴ ኬሂ ዳሪ ቤቲዴስ። ኢስቲ ኢሶይ ኢሳስ ዎርዶቴቴስ፥ ካይሶቲ ኬ ቦኪ ጌሊዲ ካይሶቴቴስ፥ ፓንጋቲ ኦጌ ቦላ ኣሶን ኣሶን ቦንቄቴስ።

² ጊዶ ኣቲን ታኒ ሃይሳ ኢስታ ኢታቴ ዉርሳ ኤሪዛይሳ ኢስቲ ኣኬኪቤቴና። ሄሳ ጊሻስ ኢስታ ኢስታ ናጋራይ ጊዶ ዎዴስ፤ ኢስታ ኢታ ኦሶይ ታፔ ጌሚቤና» ጌስ።

ካዎ ኬን ዴንዲዳ ኢታ ማቆ

³ ጎዳይ፥ «ኢስቲ ካዎዛ ባ ኢታቴን ሃላቃታካ ባንታ ዎርዶን ባሌቴስ።

⁴ ኢስቲ ዉሪካ ላይማቲዛይታ፥ ቡኬሶይ ዴንዳና ጋካናስ ዳቦ ኡኪዛዴይ ታማ ኤናስ ኮሾንታ ሴሊሲዳ ጮጬ ማላ።

⁵ ኑ ካዎዛ ባኣሌ ጋላስ ሃላቃቲ ዎይኔ ኡሻን ማ ሌላ ጊዳ። ኢዚካ ቂዛይታራ ዙፔቲዴስ።

⁶ ኢስታ ዎዚናይ ጮጬ ታማ ማላ ሴሊዴስ፤ ጌኔን ኢዛኮ ሺቄቴስ። ኢስቲ ኦማርሲ ኩሜ ሃንቆ ጩዋቲሼ ኣቄቴስ ዎንቴ ጋላስ ኤጺዛ ታማ ማላ ፖፖልኡ ጌቴስ።

⁷ ዉሪካ ታማ ጮጬ ማላ ሴሊዳይታ፤ ባንታና ኣይሲዛይታ ዲፒ ሂስቲ ዉርሲዳ። ኢስታ ካዎቲካ ኩንዲዳ፤ ኢስታፌ ኦኒካ ታኮ ሺቂቤና።

ኢስራኤሌ ኣሳይ ሃራ ካዎቴታራ ዋላኬቲዴስ

⁸ «ኤፍሬሜይ ሃራ ካዎቴታራ ዋላኬቲዴስ፤ ኢዚ ሺሬቶንታ ኣቲዳ ኡኬ ማላ።

⁹ ኣላጋቲ ኢስታ ዎልቃ ሚዳ፤ ጊዶ ኣቲን ኢስቲ ሄሳ ኤሪቤቴና። ኢዛ ሁኤይ ፑሉን ጫዲዴስ፤ ጊዶ ኣቲን ኢዚ ሄሳ ኤሪቤና።

¹⁰ ኢስራኤሌ ኣሳ ኦቶሬቴ ኢስታ ቦላ ማርካቴስ፤ ሄሲ ዉሪ ሃኒንካ ኢስቲ ጎዳ ባንታ ጾሳኮ ሲሚቤቴና፤ ኢዛካ ኮዪቤቴና።

¹¹ «ኢስራኤሌ ኣሳይ ኤሌ ባሌቲዛኔ ቆፋይ ባይንዳ ሃራጴ ካፎ ማላ። ኢሲቶ ጊብጼ ጼይጌስ፤ ሃራ ዎዴ ቃሴ ኣሶሬኮ ሲሜስ፤

¹² ኢስቲ ፒራሺን ታ ጊቴ ኢስታ ቦላ ዬጋና፤ ሳሎ ካፎታ ማላ ዱጌ ጎቻ ዎና፤ ኢስቲ ኦዳ ኢታ ኦሶ ጊሻስ ታ ኢስታ ዴሬ ሲንን ቃጻያና።

¹³ ኢስቲ ታፔ ሃኪ ቢዳ ጊሻስ ኢስታስ ኣዬ ኣና! ታ ቦላ ኢስቲ ማካሊዳ ጊሻስ ኢስታ ቦላ ይሲዛዚ ዮ፤ ታኒ ኢስታ ዎዛና ኮያዲስ፤ ኢስቲ ጊዲኮ ታ ቦላ ዎርዶ ሃሳዬቴስ።

¹⁴ ኢስቲ ባ ሂጻ ቦላ ኢቺዲ ዬኬቴስ፤ ጊዶ ኣቲን ዎዚናፔ ታኮ ዎሴቴና፤ ካሲኔ ኡሻስ ሺቄቴስ፤ ጊዶ ኣቲን ታፔ ሼርኢ ጊዳ።

¹⁵ ታኒ ኢስታ ታማርሳዲሲኔ ኢስታ ሚንዲስ፤ ኢስቲ ጊዲኮ ታ ቦላ ዴንዲዳ።

¹⁶ ታፔ ሃኪዲ ሃዳ ሚሻኮ ሲሚዳ፤ ኢስቲ ጫዳና ጾንጊን ዎራ ቢዛ ቶራ ማላ። ኢስታ ካሌዛይቲካ ባንቲ ሃሳይዛ ኢታ ቃላ ጋሶን ማሻን ዉራና፤ ሄሳፌ ዴንዶይሳን ኢስቲ ጊብጼ ቢታን ቂስ ኣታና።