ሆሴኤ ቲንቢቴ 6 - ጋሞ ማጻፋ

ዎዚናፔ ጊዶንታ ማሮቴ

¹ ዴሬዚ፥ «ሃ ዪቴ፥ ኣኔ ጎዳኮ ሲሞስ! ኢዚ ኑና ሜንዳ ማላ ኢዚካ ኑና ዛሪዲ ኮላና፤ ኢዚ ኑና ማዱንዳ ማላ ዛሪዲካ ኢዚ ኑ ማዱን ፓና።

² ናምኡ ጋላሳታፔ ጉዬ ኢዚ ኑና ቤጎና፤ ሄን ጋላስ ኢዚ ኑና ዴንና፤ ኑኒካ ኢዛ ሲንን ፓጻ ዳና።

³ ኣኔ ኑኒ ጎዳ ኤሮስ! ኑ ኢዛ ሎኤ ኤራናስ ኣኔ ሚኔቶስ! ኢዚ ዎንታ ፖኦ ማላ ኑስ ቆንጫና፤ ቢታ ካልሲዛ ኣሱራ ኢራ ማላኔ ባልጎ ኢራ ማላ ኢዚ ኑኮ ያና» ጌስ።

⁴ ጎዳይ፥ «ኤፍሬሜ ኣሳቶ! ዩሁዳ ኣሳቶ! ታ ኢንቴና ዎስቲኮ ሎኦ? ኢንቴ ታና ሲቂዛ ሲቆይ ማላዶ ሻራ ማላኔ ማላዶ ጻዛ ማላ ጮ ቲምኢ ጊ ኤሶን ዬስ።

⁵ ሄሳ ጊሻስ ታኒ ታ ናቤታ ባጋራ ኢንቴና ቃንጼሬዲስ፤ ታ ዶናፔ ኬኢዛ ቃላን ታ ኢንቴና ዎዲስ። ታ ፒርዳይካ ኢንቴ ቦላ ዎልቃን ማላ ፖኢዴስ።

⁶ ታኒ ያርሾፌ ኣዳ ማሮቴ ዶሳይስ። ጹጌቲዛ ያርሾፌ ኣዳ ጾስ ኤሮ ዶሳይስ።

⁷ ኢስቲ ቃሴ ካሴ ኣዳሜ ጌቴቲዛሶን ታናራ ጌሊዳ ጫቆ ቃላ ላሊዳ፤ ሄንካ ኢስቲ ታናን ኣማኔቲቤቴና።

⁸ ጋላኣዴይ ሱን ሞሬታዱስ፤ ኢታ ኣሳታ ዱሳሶ ጊዳዱስ።

⁹ ፓንጋቲ ኣሴ ዎናስ ዛማዲዛ ማላ ቄሴቲካ ዙፔቲዲ ሄሳ ኦቴስ። ጌዴ ሴኬሜ ኤፊዛ ኦጌ ቦላካ ናጊ ናጊ ኣስ ዎቴስ፤ ዬላቺዛ ኢታ ሚሽ ኦቴስ።

¹⁰ ዲዢጊንዛ ኢታ ሚሽ ኢስራኤሌን ቤያዲስ፤ ኤፍሬሜይ ኤቃስ ጎይኖኒኔ ላይማቴን ቱኒዴስ።

¹¹ «ኢንቴኖ ዩሁዳ ኣሳቶ! ታ ኢንቴና ቃጻያና ጋላስ ባራ ዎዲስ።