ሆሴኤ ቲንቢቴ 4 - ጋሞ ማጻፋ

ኢስራኤሌ ቦላ ዴንዲዳ ሞቶ

¹ ሃኖ ቢታይ ቦላ ዲዛ ኣሳ ኡባ ቦላ ጎዳይ ሺሺዛ ሞቶይ ዴስ። ሄሳ ጊሻስ ኢስራኤሌ ኣሳዉ! ኢዚ ኢንቴና ጊዛይሳ ሲዪቴ፤ «ሃኖ ቢታይ ቦላፌ ኣማኔቴይ፥ ሲቆይኔ ጾስ ኤሮይ ይዴስ።

² ሃን ዲዛይ ቃንጌ፥ ዎርዶ፥ ሼምፖ ዎ፥ ላይማቴኔ ጫቂዳ ቃላ ሙሲ ጻላ ዴስ። ጌኔይኔ ሼምፖ ዎይ ዳሪ ዳሪ ቤስ።

³ ሄሳ ጋሶን ቢታይ ቦላ ኮሻይ ዬስ፤ ኢዚ ቦላ ዲዛይ ዉሪ ጊልቄስ፤ ሜሄቲ፥ ዶኣቲ፥ ካፎቲኔ ኣባ ጊዶን ዲዛ ሞሌቲ ኡባይ ዉሬቴስ።»

ጎዳይ ቄሴታ ቦላ ሃንቄቲዴስ

⁴ ጎዳይ፥ «ኢንቴኖ ቄሴቶ ታ ኢንቴና ሞቲዛ ሚሺ ዴስ፤ ሄሳ ጊሻስ ኦኒካ ሃራ ኣሳራ ፓላሜቶፎ፤ ቃሴ ኦኒካ ሃራ ኣስ ሞቶፖ።

⁵ ኢንቴ ኦማርሲኔ ጋላስ ጴቴታ፤ ናቤቲካ ኢንቴናራ ጴቴቴስ። ሄሳ ጊሻስ ታኒ ኢንቴ ኣዮ ኢስራኤሌ ይሳና።

⁶ ታ ዴሬዛስ ኤራቴ ፓጪዳ ጊሻስ ይዴስ። ኢንቴ ታና ኤራናስ ኮዮንታ ጊሻስ ታኒካ ኢንቴ ታስ ቄሴታ ጊዲ ኦና ማላ ኮይኬ። ኢንቴ ታ ዎጋ ባሌቲዳ ጊሻስ ታኒካ ኢንቴ ናይታ ባላና።

⁷ ቄሴታ ቆዳይ ዳሪ ዳሪ ቢሺን ኢስቲ ታ ቦላ ኦዳ ናጋራይ ዳሪ ዳሪ ቢዴስ፤ ባንታ ቦንቾካ ካዉሻን ላሚዳ።

⁸ ታ ዴሬዛ ናጋራይ ኢስታስ ሙሳስ ኪዪዴስ፤ ሄሳ ጊሻስ ዴሬይ ናጋራ ኦዛይሳ ኬሂ ዶሲዳ።

⁹ ኢንቴ ቄሴቲካ ዴራፔ ዱማቴኬታ፤ ሄሳ ጊሻስ ታ ኡባካ ኢዛዴ ሃኖ ማላ ኢዛ ቃጻያና፤ ኢዛ ኦሶ ማላካ ኢዛስ ኢማና።

¹⁰ ታ ዴሬይ ታና ጎዳ ኣጊዳ ጊሻስ ኢስቲ ማናሺን ካሌቴና፤ ላይማታናሺን ጮራቴቴና» ጌስ።

ጎዳይ ኤቃ ጾሳታስ ጎይኖ ኢጼስ

¹¹ «ላይማቴስ፥ ጫሊዳ ዎይኔ ኡሻስ፥ ማልኦ ዎይኔ ኡሻ ሱኬስ ባንታና ኣ ኢሚዳ፤ ሄሳንቲ ታ ዴሬዛ ዎዚና ኤኪዳ።

¹² ሄሳ ጊሻስ ሚፌ ኦሴቲዳ ኤቃ ጾሳ ዞሬ ኦይቼቴስ፤ ኢስቲ ኢዛን ማሮዛ ጉፌዚካ ኢስታስ ዛሮ ኢሚዛ ሚሳቴስ፤ ላይማቴ ቆፋይ ባሌዴስ፤ ባንታ ጾሳስ ኣማኔቲቤቴና።

¹³ ዙማይ ዲዛሶን ዲዛሶን ያርሾ ያርሼቴስ፤ ዙምቡላታ ቦላ፥ ጊታ ዳሻ ሚታ ኩዋ ጋርሳን ጹጌቲዛ ያርሾ ያርሼቴስ። ሄሳ ጋሶን ኢንቴ ማጫ ናይቲ ላይማን ዳና፤ ኢንቴ ናይታ ማቼቲ ላይማታና።

¹⁴ ኢንቴ ማጫ ናይቲኔ ኢንቴ ናይታ ማቼቲ ላይማቲሺን ታኒ ኢስታ ቃጻይኬ፤ ጋሶይካ ኢንቴ ኣቱማሳቲ ላይማ ማጫሳታራ ሱኬቴቴስ፤ ኤቃ ጾሳታስ ላይማቴ ያርሾ ሺሺዛይታራ ኢንቴካ ኢዛ ያርሼታ። ሄሳ ጊሻስ ኣኬካይ ባይንዳ ዴሬይ ያና።

¹⁵ «ኢንቴኖ ኢስራኤሌ ኣሳቶ! ኢንቴ ላይማቲኮካ ዩሁዳ ኣሳይ ላይማታና ማላ ኦፍቴ፤ ሄሳ ጊሻስ ታስ ጎይናናስ ጌልጌላ ዎይኮ ቤቲ-ኣዌኔ ጌቴቲዛሶ ቦፒቴ፤ ‹ዴኦ ጎዳይ ቤዪን› ጊዲ ታ ሱንን ጫቆፍቴ።

¹⁶ ኢስራኤሌ ዴሬይ ማካላንቻ ኡሳ ማላ ማካሊዴስ፤ ሂስቲን ጎዳይ ኢስታ ዶርሳ ላቃታ ማላ ሎኦሶን ዎስቲ ሄማኔ?

¹⁷ ኤፍሬሜይ ኤቃ ጾሳታ ጎይኖን ኦይኬቲዳ ጊሻስ ኢስታ ጌዴ ኣጋጊቴ።

¹⁸ ዎይኔ ኡሹ ኡዪዳፔ ጉዬ ላይማቴቴስ። ኢስታ ኣይሲዛይቲካ ዬላቺዛ ሚሽ ዶሴቴስ።

¹⁹ ኢስታ ጎቴ ጫርኮይ ፒቲ ኤፋና፤ ኢስታ ያርሾይ ኢስታ ቦላ ዬላ ኤሃና።