ሆሴኤ ቲንቢቴ 2 - ጋሞ ማጻፋ

¹ ሄሳ ጊሻስ ኢንቴ ኢንቴ ኢሻታ ኢስራኤሌ ናይታ፥ «ኣሚ» ኢንቴ ሚቼታካ «ኡሩሃማ» ጊ ሱንቴ።

ኣማኔቶንታ ኢጺዳ ኢስራኤሌ ኣሳ ቃጻዬቴ

² «ታ ናይቶ! ኢንቴ ኣዮ ዞሪቴ፤ ሃይሳፌ ጉዬ ኢዛ ታስ ማቾ ጊዱኩ፤ ታኒካ ኢዚስ ኣዚና ጊዲኬ፤ ባ ሲንፌ ላይማ ሱኬ ሃኖ፥ ባ ዎዲራ ጊዶፌ ላይማቴ ዲጉ።

³ ኢዛ ሲሞንታ ኢጺኮ ኢዛ ባ ኣዬይ ኡሎፔ ካሎ ዬሌቲዳ ማላ ታ ኢዞ ጺሬ ካሎ ኣሻና። ባዞ ማላኔ ሜላ ቢታ ማላ ታ ኢዞ ኦና። ታ ኢዞ ሃ ሳሞን ዎና።

⁴ ላይማ ማጫሳፌ ዬሌቲዳ ጊሻስ ኢዚ ናይታስ ታ ሚሼቲኬ።

⁵ ኢስታ ኣያ ላይማ፤ ካዉሻ ሃኖን ሻራዱስ። ኢዛ ባ ዶናራ፥ ‹ታኒ ታ ላጌታኮ ባይስ፤ ኢስቲ ታስ ካኔ ሃ፥ ሱፌፔኔ ሌኤ ሃሬፔ ዳዴቲዳ ማይኦ፥ ዎጋራ ዛይቴኔ ዎይኔ ኡሹ ኢማና› ጋዱስ።

⁶ ሄሳ ጊሻስ ታኒ ኢዚ ኦጌ ኣጉንራ ጎርዳና፤ ኢዛ ኬዛና ፔንጌ ዴሞንታ ማላ ታኒ ጊምቤ ዩሻ ኣ ጎርዳና።

⁷ ኢዛ ባ ላጌታ ዴማናስ ዎጻና ሺን ኢስታኮ ጋካናስ ዳንዳዩኩ። ኢዛ ኢስታ ዳሮ ኮያና ሺን ዴሙኩ፤ ሃይሳፌ ጉዬ፥ ‹ሃይሳ ሃ ዱሳፌ ታስ ካሴ ዱሳይ ሎኦ፤ ሄሳ ጊሻስ ቤኒ ታ ኣዚናኮ ታ ሲማ ባና› ጋና።

⁸ ታኒ ኢዚስ ካሴ ካ፥ ዎይኔ ኡሺኔ ዎጋራ ዛይቴ ኢሚዳይሳኔ ቃሴካ ኢዛ ባኣሌ ጌቴቲዛ ኤቃ ጾሳስ ያርሾ ቢራኔ ዎርቃ ኢዚስ ዳርሲዳይ ታና ጊዲዳይሳ ኢዛ ሻካ ኤራቤኩ።

⁹ ሄሳ ጊሻስ ካ ካጺዛ ዎዴ ሃ ካጺዛ ካ፥ ዎይኔ ኣይፌይ ቴሪዛ ዎዴ ዎይኔ ኡሻ፥ ታኒ ኢዚፔ ዎ ኤካና። ሄሳካ ኢዛ ባ ካሎቴ ካሞንታ ማላ ሱፌፔኔ ሌኤ ሃሬፔ ዳዴቲዳ ማይኦዛ ታ ኢዚፔ ቃራ ኤካና።

¹⁰ ኢዚ ላጌታ ሲንን ታ ኢዞ ካሎ ኣሻና፤ ኢዞ ታ ኩሼፔ ኣሻናይ ዴና።

¹¹ ኢዛ ባ ኡፋይሳ ባኣሌታ ኡባ፥ ላይን ላይን ቦንቺዛ ባኣሌታ፥ ኣጊና ጼሮን ጼሮን ቦንቺዛ ባኣሌታ፥ ሳምባታታኔ ሃራ ኢዛ ዱማ ዱማ ዶራ ቦንቺዛ ባኣሌታ ናምኣን ኦንታ ማላ ታ ዲጋና።

¹² ኢዛ ባ ላጌታፔ ባስ ዋጋ ጋዳ ኤኪዳ ዎይኔ ሚታኔ ባላሴ ሚታ ታ ቃላና። ኢስታካ ዎራ ዶኣቲ ማና።

¹³ ባኣሌ ጌቴቲዛ ኤቃ ጾሳስ ኤጻኔ ጩዋሳናሲኔ ሎኦ ጌጼ ዎዳ ኢዛ ባ ላጌታ ካላዳ ታና ኣጊዳ ጊሻስ ታ ኢዞ ቃጻያና።

ጾሲ ባ ዴራ ሲቂዛ ሲቆ

¹⁴ «ሄሳ ጊሻስ ታ ኢዞ ማቃዳ ባዞ ኤፋና፤ ሄን ታ ኢዚራ ሲቆ ቃላን ሃሳይሳና።

¹⁵ ካሴ ኢዚ ዎይኔ ኣታኪልቴዛ ታ ኢዚስ ዛራና፤ ሜቶ ሾባ ታ ኢዚስ ሂዶታ ፔንጌ ሂስታና፤ ሄን ኢዛ ጊብጼፔ ኬዚዳ ጋላስ ናቴን ዳሼ ዬጺዳ ማላ ዬጻና።

¹⁶ ኢዛ ሄ ጋላሲ ታና፥ ‹ታ ኣዚናዞ› ጋ ጼይጋና ኣቲን ሃይሳፌ ጉዬ፥ ‹ባኣሌ› ጌቴቲዛ ኤቃ ጾሳ ሱንን ታና ጼይጉኩ።

¹⁷ ባኣሌ ጌቴቲዛ ኤቃ ጾሳታ ሱን ታ ኢዚ ዶናፔ ዲጋና፤ ሃይሳፌ ጉዬ ኢስታ ሱን ዴንዴና።

¹⁸ ሄ ዎዴ ዶኣታራ፥ ካፎታራኔ ቢታ ቦላ ጎሼቲዛ ሜቴ ኡባታራ ታ ኢንቴ ጊሻስ ጫቄታና። ኡባይካ ሳሮን ዳና ማላ ኦላ፥ ቶራኔ፥ ማሻ ቢታ ቦላፌ ታ ዲጋና።

¹⁹ ሃኔ ኢስራኤሌ! ታ ኔና ሜርናስ ታስ ጊጊሳና፤ ታ ኔስ ጺሎቴኒኔ ሱሬቴን ፒርዳና፤ ኣጎንታ ሲቆኒኔ ቃታን ታ ኔና ታስ ኦይቻ ጊጊሳና።

²⁰ ታኒ ኣማኔታዳ ኔና ታስ ማቾ ጊጊሳና። ኔኒካ ታኒ ጎዳ ጊዲዳይሳ ኤራና።

²¹ «ሄ ጋላስ ታኒ ዛሮ ኢማና፤ ታኒ ሳሎ ኣዛዛና፤ ሳሎይካ ሳኣስ ዛሮ ኢማና።

²² ቢታይ ካ፥ ዎይኔ ኡሹኔ ዛይቴ ኢማና፤ ኢስቲካ ኢዝራኤሌስ ዛሮ ጊዳና።

²³ ታኒ ታ ዴሬዮ ቢታ ቦላ ቶካና። ‹ማሮቴ ባይንዳሮ› ጌቴቲዳሮ ታ ዛራዳ ማራና፤ ‹ታ ማሪኬ› ጊዳይሳካ ዛራ ማራና፤ ‹ኢንቴ ታ ዴሬ ዴኬታ› ጌቴቲዴታ። ‹ታ ዴሬታ› ጋዳ ታ ጼይጋና ጋና፤ ኢስቲካ ታና፥ ‹ኔኒ ኑ ጾሳ› ጋና» ጌስ።