ሆሴኤ ቲንቢቴ 14 - ጋሞ ማጻፋ

ኣሳይ ማሬታና ማላ ኣዋጄቲዳ ኣዋጃ

¹ ኢስራኤሌ ዴሬዞ! ኢንቴ ኢንቴ ናጋራ ጋሶን ኩንዲዳ ጊሻስ ጎዳ ኢንቴ ጾሳኮ ሲሚቴ።

² ፓጼ ቃላ ኤኪ ጎዳኮ ሲሚዲ፥ «ኑ ናጋራ ኡባ ኣቶ ጋ፤ ኑኒ ኑ ዶናፔ ጋላታ ሺሻና ማላ ኔ ማሮቴን ኑና ኤካ።

³ ኣሶሬይ ኑና ኣሼና፤ ኑኒ ኦላ ፓራታንካ ኣማኔቶኮ፤ ሃይሳፌ ጉዬ ኑኒ ኑ ኩሼን ሜዳ ኤቃ ጾሳታ፥ ‹ሃይቲ ኑ ጾሳታ› ጎኮ። ማንቆቲ ኔፔ ቃቴ ዴሜቴስ» ጊቴ።

ኦራ ዴኦስ ሂዶታይ ኢሜቲዴስ

⁴ ጎዳይ፥ «ታ ሃንቆይ ኢስታ ቦላፌ ሲሚዳ ጊሻስ ታስ ኣማኔቶንታ ኢጺዳ ታ ዴራ ታ ፓና፤ ታ ኢስታ ጮ ሜላ ሲቃና።

⁵ ታኒ ኢስራኤሌ ኣሳስ ፑሴ ኢራ ማላ ጊዳና፤ ኢስቲካ ሎኦ ጪሻ ማላ ጪያና፤ ሊባኖሴ ዚጋ ማላ ጻጶ ዬዳና።

⁶ ኢስታ ሃጋይ ዲጫና፤ ዎጋራ ሚ ማላ ኢስቲ ሎኣና፤ ሊባኖሴ ዚጋ ማላ ሎኦ ሳዎ ሳዋና።

⁷ ኢስቲ ሲሚዲ ታ ኩዋ ጋርሳን ኡታና፤ ጫሬቻ ካ ማላ ኢስቲ ጪሊላና፤ ዎይኔ ሚ ማላ ኢስቲ ጪያና። ኢስታ ሱን ሊባኖሴ ዴሬ ዎይኔ ኡሻ ማላ ኡባሶን ኤሬታና።

⁸ ኤፍሬሜ! ታሲኔ ኤቃ ጾሳታስ ኣይ ጋይቶቴ ዲዜ? ኔ ዎሳ ሲዪዛይኔ ኔና ናጊዛይ ታና፤ ታኒ ኡባ ዎዴ ጪሊሊ ኡቲዳ ሚ ማላ፤ ኔ ኣይፊዛይ ታፔ ዴንዲዳይሳና» ጌስ።

ኩሻ ቃላ

⁹ ኣ ኤራንቻይ ሃ ዮኦታ ኣኬካና። ኣኬኪዛዴይ ሃ ዮኦታ ኤራና፤ ጎዳ ኦጌይ ሱሬ፤ ጺሎቲ ኢዛን ሄሜቴቴስ። ናጋራንቻቲ ጊዲኮ ኢዛን ጴቴቴስ።