ሆሴኤ ቲንቢቴ 12 - ጋሞ ማጻፋ

¹ ኤፍሬሜይ ጫርኮ ሄንንቻ፤ ጋላስ ኩሜ ኣርሼይ ሞኪዛ ባጋ ጫርኮ ካሌስ፤ ዎርዶኔ ማካላ ዳሪሴስ። ኣሶሬ ዴራራ ጫቆ ቃላ ጌሌስ፤ ዎጋራ ዛይቴ ጊብጼ ቢታ ዬዴስ።

² ጎዳይ ዩሁዳ ዴራ ቦላ ሺሺዛ ሞቶይ ዴስ፤ ኢዚ ያቆቤ ኢዛ ሃኖታ ማላ ቃጻያና። ኢዛ ኦሶ ማላ ኢዛስ ኢማና።

³ ያቆቤይ ቡሮ ባ ኣዬይ ኡሎን ዲሼ ባ ኢሻ ቶሆ ቂርጴ ኦይኪዴስ፤ ኣሳ ዛዋ ጋኪዳፔ ጉዬ ጾሳራ ባጼቲዴስ።

⁴ ኪታንቻራ ባጼቲዲ ኢዛ ጾኒዴስ፤ ኢዛ ሲንን ቴማ ዴማናስ ዬኪ ዎሲዴስ፤ ኢዛካ ቤቴሌን ዴሚዴስ፤ ሄን ኢዛራ ሃሳዬቲዴስ።

⁵ ጎዳይ ኡባፌ ዎልቃማ ጾሳይ ኢዛስ ኤሬቲዳ ሱንይ ጎዳ።

⁶ ሄሳ ጊሻስ ኔ ጾሳኮ ሲማ፤ ሲቆኔ ቱሙ ፒርዳ ሎኤ ኦይካ፤ ኡባ ዎዴ ኔ ጾሳን ኣማኔታ።

⁷ «ዛልኣንቻቲ ዎርዶ ጌዳራን ባይዜቴስ፤ ሾጬቾካ ዶሴቴስ።

⁸ ኤፍሬሜይ፥ ‹ታኒ ዱሬ፤ ታ ዱሬታዲስ፤ ታስ ሃይሲ ኡባይ ዲሺን ኣይ ቆሆይካ ዎይኮ ናጋራይ ታ ቦላ ጋኬና› ጊ ጬቄቴስ።

⁹ «ኢንቴና ጊብጼ ቢታፌ ኬሲዳ ጎዳ ኢንቴ ጾሳይ ታና፤ ላይ ባኣሌ ጋላስ ካሴ ኢንቴ ኦዛ ማላ ኢንቴ ኢንቴ ዱንካኔን ዳና ማላ ታ ኦና።

¹⁰ «ታኒ ካሴታዳ ናቤታስ ዮታዲስ፤ ዳሮ ኣጁታ ታ ኢስታ ቤሳዲስ፤ ኢስታ ባጋራ ሌሚሶን ዮታዲስ።

¹¹ ጋላኣዴን ኢታቴ ኩሚዴስ፤ ኣሳይካ ሹፉሮ ጻላ። ጌልጌላን ሚርጎታ ያርሾስ ሺሺዞ? ኢስታ ያርሺዛሶይ ሜቄሬቲዲ ጎሻ ጊዶን ኮሬቲዳ ሹቻ ማላ ጊዳና» ጌስ።

¹² ያቆቤይ ሜስጴጾሚያ ባቃቲዴስ፤ ኢስራኤሌይ ማቾ ኤካናስ ሄን ሃጋዚዴስ፤ ኢዚስ ኢማና ጪሎሻ ጊሻስ ዶርስ ሄሚዴስ።

¹³ ጎዳይ ናቤ ባጋራ ኢስራኤሌ ጊብጼፔ ኬሲዴስ፥ ናቤዛ ባጋራ ኢስታ ኢሻልሲ ኦይኪዴስ።

¹⁴ ጊዶ ኣቲን ኤፍሬሜይ ኢዛ ኬሂ ሃንቄዴስ፤ ኢዛ ጎዳይ ኢዚ ሱ ጉሲዳ ማላ ቆሆዛ ኢዛ ቦላ ጋና፤ ኢዚ ሌቂዛ ሌቆዛ ጊሻስ ኢዛስ ቤሲዛዝ ቃንጻና።