ሆሴኤ ቲንቢቴ 10 - ጋሞ ማጻፋ

¹ ኢስራኤሌ ኣሳይ ዳዪዳ ዎይኔ ሚ ማላ። ኢስቲ ዳሮ ኣይፌ ኣይፊዳ፤ ኣይፌዚ ዳሪዳ ኬና ዳሮ ያርሾሶሆ ሜዳ። ኢስታ ቢታያ ሎኦ ኣይፌ ኢማዳ ኢስታ ዱሬሲዳ ማላ ኢስቲ ጎይኒዛ ቱሳታ ኣሌቄሲዳ።

² ኢስታ ዎዚናን ጌኔይ ኩሚዴስ፤ ኢስቲ ባ ኦዳ ጌኔዛ ዋጋ ኤካና። ጎዳይ ኢስቲ ያርሾ ያርሺዛሶሆታ ኡባ ላላና። ኢስቲ ጎይኒዛ ኤቃ ጾሳ ቱሳታካ ሾዳና።

³ ኢስቲካ፥ «ኑስ ካዎይ ዴና፤ ኑኒ ጎዳ ቦንቾንታ ጊሻስ ካዎይ ዲዛኮካ ኢዚ ኑስ ኣይ ኦኔ?» ጋና።

⁴ ኢስቲ ዎርዶራ ጫቂዲ ቃላ ጌሌቴስ፤ ሃዳ ሂዶታ ኦቴስ፤ ሄሳ ጊሻስ ካ ጊዶን ማርዜራ ዲዛ ሃሩማ ማታይ ሞኪዛ ማላ ኢስታ ጊዶን ጌኔ ፒርዳይ ዳራና።

⁵ ሳማሪያ ካታማን ዲዛ ዴሬይ ቤቲ-ኣዌኔን ዲዛ ማራ ሚስሌን ኦሴቲዳ ኤቃ ጾሳስ ያዬስ። ኢዛፔ ቦንቾይ ቃሬቲ ኪቺዳ ጊሻስ ኣሳይ ዬኬስ። ሄ ኤቃ ሚስሌዛ ቄሴቲካ ዋሴቴስ።

⁶ ሄ ኤቃ ሚስሌዚ ጊታ ጊዲዳ ኣሶሬ ካዎስ ኪያቴ ኢሜታና። ኤፍሬሜይ ካዉያና፤ ኢስራኤሌይካ ባንታ ኤቃ ጾሳ ጊሻስ ዬላታና።

⁷ ሳማሪያ ካዎይ ሃ ጎፖንቶ ማላ ጮ ያና።

⁸ ኢስራኤሌስ ናጋራ ጊዲዳ ቤት-ኣዌኔን ጎይኒዛሶሆ ዙምቡላዚ ያና፤ ኦካይኔ ኦሃይ ሞካና፤ ሄ ዎዴ ዴሬይ ዙማታ፥ «ኑና ቆቲቴ!» ዙምቡላታካ «ኑና ካሚቴ!» ጋና።

ጎዳይ ኢስራኤሌ ኣሳ ቃጻያና

⁹ ጎዳይ፥ «ኢስራኤሌ ኣሳዉ! ጊቢኣን ናጋራ ኦሶፔ ሃች ጋካናስ ጌባኦኔን ናጋራ ኦዛይታ ኦላይ ዉርሲቤኔ?

¹⁰ ታኒ ኮይዛ ዎዴ ኢስታ ቃጻያና፤ ኢስቲ ኦዳ ዳኮ ናጋራ ጊሻስ ቂጻቴይ ኢስታ ቦላ ጋካና፤ ካዎቴቲ ኢስታ ቦላ ዴንዳና።

¹¹ ኢስራኤሌይ ካ ቡካናስ ዶሲዛ ሜሄ ማላ፤ ጊዶ ኣቲን ሎኢዛ ኢዚ ሞርጌ ቦላ ቃምባራ ዎና፤ ኤፍሬሜ ዋጻና፤ ዩሁዳይ ጎያና፤ ያቆቤ ናይቲ ዋጼቲዲ ቢታ ፒጻና።

¹² ጎዳይ ዪዲ ጺሎቴ ኢንቴ ቦላ ኢራ ማላ ቡኪሳና ጋካናስ ሃና ኢንቴ ኢዛ ኮይዛ ዎዴ ጊዲዳ ጊሻስ ኦ ጎዪቴ፤ ኢንቴስ ጺሎቴ ዜሪቴ፤ ሚኖ ሲቆ ኣይፌ ማጺቴ።

¹³ «ኢንቴ ጊዲኮ ኢንቴ ዎልቃኒኔ ኢንቴ ኦላ ቃራታ ዳሮቴን ኣማኔቲዲ ኢታቴ ዜሪዴታ፤ ናጋራ ሺሺዴታ፤ ዎርዶቴ ኣይፌ ሚዴታ።

¹⁴ ሺሊማኔይ ቤቲ-ኣርቤሌ ጌቴቲዛ ካታማ ኦላን ካሴ ላሊዳይሳኔ ኣዬታ ናይታራ ጋ ቢታ ቦላ ዲንጬሬ ዉርሲዳ ማላ ሺሮይ ዴራ ቦላ ያና። ኢንቴ ዴሬ ኣሳ ቦላ ዎልቃማ ኦላይ ያና፤ ኢንቴ ሚጻይ ላሌታና።

¹⁵ ቤቴሌ! ኔ ኢታቴ ጊታ ጊዲዳ ጊሻስ ኔ ቦላካ ሄሳ ሃናና፤ ሄ ጋላሳያ ጋኪዛ ዎዴ ኢስራኤሌ ካዎይ ሙሌራ ያና» ጌስ።