ኢምባቆ ቲንቢቴ 3 - ጋሞ ማጻፋ

ኢምባቆ ዎሳ

¹ ናቤ ኢምባቆይ ዬን ሺሺዳ ዎሳ።

² ኣቤት ጎዳዉ! ታ ኔ ጎባቴ ጊሻስ ሲያዲስ። ጎዳዉ ኔ ኦሶይካ ታና ያሺሲዴስ፤ ኔኒ ኔ ኦሶ ኑ ዎዴን ኦራ፤ ኔ ኦሶቲ ኑ ዎዴንካ ኤሬታና ማላ ኦርኪ! ሃንቆ ዎዴካ ማሮቴ ቆፓርኪ!

³ ጾሲ ቴማኔፔ ጌሻይካ ፓራኔ ዙማ ቦላፌ ዪዴስ፤ ኢዛ ቦንቾይ ሳሎ ካሚ ኦይኪዴስ፤ ኢዛ ጋላታይካ ቢታ ቦላ ኩሚዴስ።

⁴ ኢዛ ፖኦይ ኣዋ ኣርሼ ፖኦ ማላ፤ ኣዋ ጻልቄይ ኢዛ ኩሼፔ ኬዚዴስ፤ ኢዛ ዎልቃይካ ሄን ቆቴቲዴስ።

⁵ ኢታ ሃርጌይ ኢዛፔ ሲንራ ቢዴስ፤ ሃዳ ሃይቆይካ ኢዛ ጌዶ ካሊዴስ።

⁶ ኢዚ ኤቂን ቢታይ ቃጺዴስ፤ ኢዚ ጼሊዲ ኣሳ ኮኮሪሲዴስ፤ ሜርናስ ዲዛ ዙማቲ ላሌቴ ፒስኪ ጊዳ፤ ቤኒሶፌ ዲዛ ዙማቲካ ዎዲዳ፤ ኢዛ ኦጌይ ሜርናሳ።

⁷ ቶጵያ ዱንካኔቲ ሜቶቴቲሺን፥ ሚዲያሜታ ዱሳሶይ ቡልኣኬቲሺን ታ ቤያዲስ።

⁸ ጎዳዉ! ኔ ሃታ ቦላ ሃንቄታዲ? ኔ ሃንቆይ ሃ ፑልቶታ ቦላ ዲዜ? ኔኒ ኔ ፓራታኔ ጾኒዛ ፓራ-ጋሬታ ቶጋዳ ካሌዳ ዎዴ ኣባ ቦላ ሃንቄታዲ?

⁹ ኔኒ ኔ ዎንዳፌ ጊጊሳዳሳ፤ ዪሻይ ኔስ ያና ማላ ኣዛዛዳሳ፤ ቢታ ጳልቃዳ ሃ ኬሳዳሳ።

¹⁰ ዙማቲ ኔና ቤኢዲ ማኒዳ፤ ሃ ዳምባላይ ኣ ቢዴስ፤ ኣባይ ጬቄቲዴስ፤ ኣባ ዳምባላካ ፑዴ ዴንዴስ።

¹¹ ኔ ፒሪሳ ዬዲዳ ኔ ዪሻታፔኔ ጾልቄቲዛ ኔ ቶራ ፖኦፔ ዴንዲዳይሳን ኣርሼይኔ ኣጊናይ ባ ዲዛሶን ኤቂ ኣቲዳ።

¹² ኔኒ ቢታ ቦላ ሃንቆን ሲሜሬታዳሳ፤ ዴሬታካ ሃንቆን ዬዳሳ።

¹³ ኔኒ ኔ ዴሬ ኣሻናሲኔ ኔ ቲይዳዴ ኣሻናስ ኬዛዳሳ፥ ኢታ ዴሬ ካሌዛዴ ሊቂሳዳሳ፥ ሁኤፔ ቶሆ ጹጉን ጋካናስ ካሎ ኣሻዳሳ።

¹⁴ ጎቴ ጫርኮ ማላ ኑና ላላናስ ዪዳይሳ፥ ኣይኮይ ባይንዳ ማንቆዛ ጌማራ ሚታናስ ኣሞቲዛይሳ፥ ኦላንቻታ ሃላቃ ጊዲዳይሳ ኢዛ ዛራ ጫዳዳሳ።

¹⁵ ኔኒ ኣባ ኔ ፓራታን ዬሲዛ ዎዴን ጪማ ኣባይ ቃጼስ።

¹⁶ ታኒ ሲያዲስ፤ ታ ዎዚናይካ ዳጋሚዴስ፤ ኢዛ ጊርሳፌ ዴንዲዳይሳን ታ ሜቴርሻይ ኮኮሪዴስ። ባቦን ታስ ማራጬይ ቃጺዴስ። ታስ ጉልባቴይ ኮኮሪዴስ፤ ጊዲኮካ ኑ ቦላ ዎራጂዛ ዴሬዛ ቦላ ሜቶይ ያና ጋላስ ታ ጌንጫ ናጋይስ።

¹⁷ ባላሴ ጌቴቲዛ ሚይ ኣይፎንታ ኣጊኮካ ዎይኔ ሚፌ ኣይፌይ ቤቶንታ ኣጊኮ ዎጋራ ሚካ ኣይፎንታ ኣጊኮ ጎሻ ጋዴይ ካ ኢሞንታ ኣጊኮ ዶርሲ ዪሬን ዶንታ ኣጊኮካ ሚዚ ዜን ዶንታ ኣጊኮካ

¹⁸ ታኒ ታ ጎዳን ኡፋዬታና፤ ታ ኢዛን ኣቲዳ ጾሳን ኡፋዬታና።

¹⁹ ጎዳ ታ ጾሳይ ታስ ዎልቃ፤ ታ ቶሆታ ኢዚ ጌኔሳ ቶሆ ማላ ሚን፤ ኢዚ ታና ቃሶሆራ ሄሜና። ዬጺዛይታ ካሌዛዴስ ዬ ሚሻን ዬጼቲዳ ማዛሙሬ።