ኢምባቆ ቲንቢቴ 2 - ጋሞ ማጻፋ

¹ ታኒ ናጌ ናጊዛሶን ኤቃና፤ ሚጻ ጊምቤ ቦላ ኬዛዳ ሄን ታካና። ታ ኦይሻስ ጎዳይ ኣይ ዛሮ ኢማናኮ ታ ዲዛሶን ዳዳ ኢዛ ናጋና።

ኢምባቆ ኦይሻስ ጎዳይ ኢሚዳ ዛሮ

² ጾሲ ኢምባቆስ፥ «ዋዪሶንታ ናባቤታና ማላ ኔስ ኣጁታን ቆንጪዳይሳ ሳሌዳ ቦላ ሎኤ ዎጫ ጻፋ።

³ ኔ ኣጁታዚ ባስ ኢሜቲዳ ዎዴ ናጌስ፤ ኢዚካ ዉርሴ ጊሻስ ዮቴስ፥ ዎርዶቴና። ጋምኣና ሚሳቲኮካ ናጋ፤ ኢዚ ቱማፔ ያና፤ ሙሌካ ጋምኤና።

⁴ «ሄኮ ኢዚ ኦቶሬቲዴስ፤ ኢዛ ኣሞይ ሱሬ ጊዴና፤ ጺሎ ኣሲ ጊዲኮ ኣማኖን ዴስ።

⁵ ዱሬቴ ኣስ ባሌስ፤ ኦቶራንቻስ ሙሌካ ሼምፖይ ዴና፤ ኢዚ ዱፎ ማላ ዮራ፤ ዎዛ ሃይቆ ማላካ ካሎ ኤሬና፤ ዴሬ ኡባ ሺሼሲኔ ዲኢ ኤኪ ቤስ።

⁶ ሂስቲን ሄሳ ማላ ኣሳ ቦላ ቂኒኔ ካን ኣሳይ፥ ‹ባ ካይሲ ኤኪዳ ሻቃጬዛ ባስ ሺሺዛዴስ፥ ጌኔን ዱሬቲዛዴስ ኣዬ ኣና! ሄሳ ኣይዴ ጋካናስ ሺሻኔ?› ጊ ኢዛ ቦላ ሚጬኔ?

⁷ ኔ ኣጮን ዬጊዳ ኣሳቲ ኔ ቆፖንታ ኔ ቦላ ዴንዴቴኔ? ኢስቲ ቤጊዲ ኔና ዳጋንቴኔ? ሄሳፌ ጉዬ ኔ ኢስታ ኩሼን ኩንዳና።

⁸ ኔ ዳሮ ዴሬ ሚሽ ቦንቂዳ ጊሻስ ሃንኮ ቦንቄቶንታይቲ ኔና ቦንቃና፤ ኔ ኣሳ ሱ ጉሳዳሳ፤ ዴራ፥ ካታማኔ ኢዛን ዲዛይታ ዉርሳ ይሳዳሳ።

⁹ «ዎርዶራ ባሌ ኤኪዳ ሚሻን ባስ ዳና ኬ ኬጺዛዴሲኔ ባ ሞርኬ ኩሼፔ ኣታናስ ባ ኬ ቃሶሆን ኬጺዛዴስ ኣዬ ኣና!

¹⁰ ዳሮ ኣሳ ሼምፖይ ያና ማላ ቃቻዳሳ፤ ኔ ኬ ቦላኔ ኔ ቦላ ይሲዛዝ ኤሃዳሳ።

¹¹ ጊምቤ ጊዶን ሹቺ ዋሴስ፤ ጊዶን ጎዳ ኤቂዳ ሚቲካ ኢዛስ ዛሮ ኢሜቴስ።

¹² «ሱ ጉሲዲኔ ኢታ ኦዲ ካታማ ኤሲዛይታስ ኣዬ ኣና!

¹³ ኣሳ ኦሶይ ኡባይ ታማን ጹጌታና ማላ ዴሬይካ ሜላ ዳቡራና ማላ ጎዳይ ኡባፌ ዎልቃማ ጾሳይ ኡባ ዎቤኔ?

¹⁴ ኣባይ ኩሚዛ ማላ ቢታይ ጎዳ ጊታቴ ኤሮን ኩማና።

¹⁵ «ኣሳ ካሎቴ ቤያናስ ባ ላጌታ ኡሹ ኡሺዛዴሲኔ ኢስቲ ኡዪዲ ማታና ጋካናስ ዎይኔ ኡሹ ዱቂዛዴስ ኣዬ ኣና!

¹⁶ ኔኒ ቦንቾ ጊሻስ ዬላታና፤ ሄሲካ ሃኢ ታራይ ኔስ ጊዲዳ ጊሻስ ኡያዳ ጋንዲጋራ፤ ኔ ካሎታ። ጎዳ ኡሻቻ ኩሼን ዲዛ ሃንቆ ጹኣይ ኔ ቦላ ሲማና፤ ካሴ ኔስ ዲዛ ቦንቾዛ ካዉሻቴን ላማና።

¹⁷ ኔ ሊባኖሴ ቦላ ኦዳ ጌኔይ ኔና ሚታና፤ ኔኒ ሜዶሳታ ይሲዳይሲ ዛሪ ኔና ዳጋንና፤ ሄሲካ ኔ ኣሳ ሱ ጉሲዳ ጊሻሲኔ ዴሬታ፥ ካታማታኔ ኢስታን ዲዛይታ ኔ ኡባ ይሲዳ ጊሻሳ።

¹⁸ «ኣሳ ኩሼይ ማሲ ጊግሲዳ ኤቃኔ ዎርዶ ሃሳይዛ ሚስሌስ ኣይ ጎኣይ ዲዜ? ሂስቲን ኢዛ ኦዳዴይ ባርካ ባ ኦሶን ኣማኔቲዛ ጊሻሲኔ ኢስቲካ ሃሳያናስ ዳንዳዮንታ ኤቃ ኦዛ ጊሻሳ።

¹⁹ ሚ፥ ‹ኔ ቤጋ!› ሼምፖይ ባይንዳ ሹቻካ፥ ‹ኔ ዴንዳ!› ጊዛዴስ ኣዬ ኣና! ቱሙካ ኢዚ ታማርሳና ዳንዳይዜ? ሄኮ ኢዚ ቦላራ ዎርቃኒኔ ቢራን ቲዬቲዴስ፤ ኢዛስ ሼምፖይካ ዴና።

²⁰ ጎዳይ ጊዲኮ ባ ጌሻ ኬን ዴስ። ቢታ ቦላ ዲዛ ዴሬይ ዉሪካ ኢዛ ሲንን ጮኡ ጎ» ጊዴስ።