ሜቴ ማጻፋ 3 - ጋሞ ማጻፋ

ኣሲ ኣዛዜቶንታ ኢጾ

¹ ሾሻይ ጎዳ ጾሳይ ሜዳ ዶኣ ኡባፌ ኣዳ ጌናንቻ፤ ኢሲ ጋላስ ሾሻይ ሄ ማጫሳዮ፥ «ጾሲ ቱሙ ኢንቴና፥ ‹ኤዴኔን ዲዛ ሚ ኣይፌ ኡባፌካ ሞፒቴ› ጊዴ?» ጊ ኦይቺዴስ።

^2-3 ማጫሳያ ሾሻስ ዛራዳ፥ «ጊዴና! ጾሲ ሄሳ ጊቤና፤ ኑኒ ኤዴኔን ዲዛ ሚታ ኣይፌ ማናስ ዳንዳዮስ፤ ጊዶ ኣቲን ጾሲ ኑና፥ ‹ኤዴኔ ጊዶን ዲዛ ሚ ኣይፌ ሞፒቴ፤ ቦቾፍቴ፤ ሂስቶንታ ኣጊኮ ኢንቴ ሃይቃና› ጊዴስ» ጋዱስ።

⁴ ሾሻይ ማጫሳዮ፥ «ጊዴና! ኢንቴ ቱማ ሃይቄኬታ፤

⁵ ጾሲ ሄሳ ጊዳይ ሄ ሚይ ኣይፌ ኢንቴ ሚኮ ኢንቴ ኣይፌይ ዶዬቲን፥ ጾሳ ማላ ኢንቴ ሎኦኔ ኢታ ሻኪ ኤራናይሳ ኢዚ ኤሪዛ ጊሻሳ» ጊዴስ።

⁶ ማጫሳያ ሄ ሚ ኣይፌይ ማናስ ማልኢዛይሳ፥ ጼላናስ ሎኢዛይሳ፥ ቃሴ ኣሲ ኣ ኤራቴ ዴማናስ ኣሞሲዛዝ ጊዲዳይሳ ቤያዳ ሄ ሚ ኣይፌፔ ኤካዳ ማዱስ፤ ቃሴ ባናራ ዲዛ ባ ኣዚናስካ ሄሳፌ ኢሚን ኢዚካ ሚዴስ።

⁷ ሚዳ ዎዴ ኢስታ ናምኣ ኣይፌይካ ዶዬቲን ኢስቲ ፓጻ ካሎ ዲዛይሳ ኤሪዲ ባላሴ ጌቴቲዛ ሚ ሃይ ሲኪዲ ባ ጼሳን ጊጺዳ።

⁸ ኦማርሳ ዎዴ፥ ኤዴኔ ጊዶን ጎዳ ጾሳይ ሄሜቲሺን፥ ኢዛ ጬንጉርሳ ኣዴዚኔ ኢዛ ማቼያ ሲዪዲ ጎዳ ጾሳፌ ኤዴኔ ሚ ጊዶን ቆቴቲዳ።

⁹ ጊዶ ኣቲን ጎዳ ጾሳይ ኣዴዛ ጼይጊዲ፥ «ኣዳሜ ኣዋን ዳይ?» ጊዴስ።

¹⁰ ኣዴዚካ፥ «ኤዴኔ ጊዶን ኔ ጬንጉርሳ ሲያዳ ታኒ ካሎ ዲዛ ጊሻስ ባባዳ ቆቴታዲስ» ጊዴስ።

¹¹ ጎዳ ጾሳይ ኢዛ፥ «ኔኒ ካሎ ዳሳ ጊዲ ኔስ ዮቲዳይ ኦኔ? ታኒ ኔና፥ ‹ሞፓ› ጋዳ ኣዛዚዳ ሚ ኣይፌፔ ማዲ?» ጊ ኦይቺዴስ።

¹² ኢዚካ፥ «ታናራ ዳና ማላ ኔ ኢሚዳ ማጫሳያ ሄ ሚ ኣይፌፔ ታስ ኢሚን ማዲስ» ጊዴስ።

¹³ ጎዳ ጾሳይ ሄሳፌ ጉዬ ማጫሳዮ፥ «ኔኒ ሄሳ ኣይስ ኦዲ?» ጊ ኦይቺዴስ። ማጫሳያካ፥ «ታና ሾሻይ ባሌን ማዲስ» ጋዱስ።

ጾሳ ፒርዳ

¹⁴ ጎዳ ጾሳይ ሄሳፌ ጉዬ ሾሻ፥ «ኔኒ ሃይሳ ኦዳ ጊሻስ፥ ሜሄ ኡባኔ ዶኣ ኡባ ጋርሳን ኔ ጻላይ ቃንጌቲዳዛ! ኔኒ ኔ ኡሎን ቢታራ ጎሼታና፤ ኔ ዴኦ ላይ ኡባንካ ቢታ ጉዱላ ላጫ።

¹⁵ ታኒ ኔሲኔ ማጫሳይስ፥ ኔ ዜሬሲኔ ኢዚ ዜሬስ ጊዶን ሞርኬቴ ሜና፤ ኢዚ ኔ ሁኤ ቆጻና፤ ኔኒካ ኢዛ ቂርጴ ዱካና» ጊዴስ።

¹⁶ ማጫሳዮካ ጎዳ ጾሳይ፥ «ኔ ሻሪዛ ኣጊናን ኔኒ ዳሮ ቱጋታና፤ ቃሴ ኔኒ ዎልቃማ ሚጻን ናይታ ዬላና። ጊዲኮካ ኔኒ ኔ ኣዚናራ ኣቃናስ ኣሞታና፤ ኢዚካ ኔና ሃራና» ጊዴስ።

¹⁷ ኣዳሜካ ጎዳ ጾሳይ፥ «ኔኒ ኔ ማቼይ ቃላ ሲዪዳ ጊሻስ ታኒ ኔና፥ ‹ሄ ሚ ኣይፌ ሞፓ› ጋዳ ኣዛዚዳ ሚ ኣይፌፔ ኔኒ ሚዳ ጊሻስ፥ «ኔ ጌዶን ቢታይ ቃንጌቲዳዝ ጊዶ! ኔኒ ኔ ዴኦ ላይ ኡባን ጊታ ዳቡራን ቢታ ኦዳ ማና።

¹⁸ ቢታይ ኔስ ኣጉንኔ ኪንዲቾ ሞኪሳና፤ ኔኒ ቢታፌ ሞኪዳይሳ ማና።

¹⁹ ኔኒ ቢታን ሲማና ጋካናስ ዳቡራን ኔ ጫዋ ጉሳ ኦዳ ማና፤ ኔኒ ቢታፌ ሜቲዳ ጊሻስ ቢታን ሲማንዳሳ» ጊዴስ።

²⁰ ኣዳሜይ ባ ማቺዮ ሄዋኖ ጊ ሱንዴስ፤ ኣይስ ጊኮ ኢዛ ኣሳ ኡባስ ኣዮ።

²¹ ጎዳ ጾሳይ ኣዳሜሲኔ ኢዛ ማቼይስ ኢቴ ጊግሲዲ ኢስታ ማይዚዴስ።

²² ሄሳፌ ጉዬ ጎዳ ጾሳይ፥ «ሂስቲን ኣሲ ኑፔ ኢሳዴ ማላ ሎኦኔ ኢታ ኤሪዛዴ ጊዲዴስ፤ ኢዚ ባ ኩሼ ዬዲዲ ዴኦ ኢሚዛ ሚፌ ኤኪዲ ቃሴ ሞንታ ማላኔ ሜርናስ ፓጻ ዴኦንታ ማላ ቴቄታናስ ኮሼስ» ጊዴስ።

²³ ሄሳ ጊሻስ ኢዚ ባ ሜቲዳ ቢታ ኦና ማላ፥ ጎዳ ጾሳይ ኤዴኔፔ ኢዛ ኬሲዴስ።

²⁴ ኢዛ ኬሲዲ፥ ዴኦ ሚኮ ኤፊዛ ኦጌ ናጋና ማላ፥ ኪሩቤ ጌቴቲዛ ኪታንቻታኔ ፖፖልኡ ጊ ኣ ኣ ዎዛ ታማ ላጮ ሚሳቲዛ ጊ ማሻ ኤዴኔፔ ኣርሼይ ሞኪዛ ባጋራ ዎዴስ።