ሜቴ ማጻፋ 12 - ጋሞ ማጻፋ

ኣብራሜ ጼይጌቴ

¹ ጎዳይ ኣብራሜ፥ «ኔ ዴሬፔ፥ ኔ ዳቦታፔኔ ኔ ኣዋ ኬ ኣሳፔ ሻኬታዳ ታኒ ኔና ቤሲዛ ቢታ ባ።

² «ታኒ ኔና ጊታ ካዎቴ ኦና፤ ቃሴካ ኣንጃና፤ ኔ ሱን ጊታሳና፤ ኔካ ሃራታስ ኣንጆ ጊዳና።

³ ኔና ኣንጂዛይታ ታ ኣንጃና፤ ኔና ቃንጊዛይታካ ታ ቃንጋና፤ ቢታ ቦላ ዲዛ ኣሲ ዉሪ ኔ ባጋራ ኣንጄታና» ጊዴስ።

⁴ ኣብራሜይ ጎዳይ ኢዛስ ዮቲዳ ማላ ዴንዲ ቢዴስ፤ ሎጼይካ ኢዛራ ቢዴስ፤ ኣብራሜይ ካራኔ ዴሬፔ ቢሺን ኢዛስ ላይይ ላፑን ታማኔ ኢቻሻ።

⁵ ኣብራሜይ ባ ማቺዮ ሶራ፥ ባ ኢሻ ና ሎጼ፥ ካራኔን ኢስቲ ዴሚዳ ኣይሌታኔ ሄን ሺሺዳ ባንታ ኣቆታ ኡባ ኤኪዲ ካናኔ ቢታ ቢዴስ።

⁶ ኣብራሜይ ሄ ቢታን ሴኬሜን ሞሬ ጌቴቲዛሶን ዲዛ ጊታ ሚኮ ጋካናስ ቢዴስ፤ ሄ ዎዴ ካናኔ ኣሳቲ ሄ ቢታን ዴቴስ።

⁷ ጎዳይ ኣብራሜስ ቆንጪዲ፥ «ሃ ቢታ ታኒ ኔ ዜሬስ ኢማና» ጊዴስ፤ ኢዚ ባስ ቆንጪዳ ጎዳስ ሄ ሶሆን ያርሾ ያርሺዛሶ ኬጺዲ ጎይኒዴስ።

⁸ ሄሳፌ ዴንዲዲ ቤቴሌፔ ኣርሼይ ሞኪዛ ባጋራ ዲዛ ዙማቲዛሶ ቢዲ ሄን ቤቴሌ ኣርሼይ ዉሊዛ ባጋን ኣጊዲ ቃሴ ኣዬ ጌቴቲዛ ካታማ ኣርሼይ ሞኪዛ ባጋ ኣጊዲ ጊዶን ባ ዱንካኔ ቶሊዴስ፤ ሄንካ ጎዳስ ያርሾ ያርሺዛሶ ኬጺዲ ጎዳ ሱን ጼይጊዴስ።

⁹ ሄሳፌ ጉዬ ኣብራሜይ ሄፔ ዴንዲ ቢዲ ኔጌቤ ጌቴቲዛ ባዞ ጋኪዴስ።

ጊብጼ ኣብራሜ ቡስ

¹⁰ ሄ ዎዴ ካናኔ ቢታን ኮሻይ ዴንዲን ኮሻዚ ኬሂ ኢታ ጊዲዳ ጊሻስ ኣብራሜይ ኮሻ ዎዴ ኣናስ ዱጌ ጊብጼ ዎዴስ።

¹¹ ጊብጼ ጌላና ሃኒሺን ኣብራሜይ ባ ማቺዮ ሶራ፥ «ሲያ! ኔ ዳሮ ማላ ሎኦ ማጫስ ጊዲዳይሳ ታ ኤራይስ።

¹² ጊብጼ ኣሳይ ኔና ቤኢዛ ዎዴ ኢስታስ፥ ‹ሃና ኢዛ ማቾ› ጊዲ ኔና ኣጊዲ ታና ዎና።

¹³ ሄሳ ጊሻስ ኢስቲ ታስ ኔ ጋሶን ኪያና ማላኔ ቃሴ ኔ ጋሶን ታ ሃይቆንታ ኣታና ማላ ኔኒ፥ ‹ታ ኢዛስ ሚቾ› ጋ» ጊዴስ።

¹⁴ ኣብራሜይ ጊብጼ ቢታ ጌሊዳ ዎዴ ጊብጼ ኣሳቲ ሄ ማጫሳያ ዳሮ ማላ ሎኦ ማጫስ ጊዲዳይሳ ቤኢዳ።

¹⁵ ቃሴ ጊብጼ ካዎስ ኦዛ ሃላቃቲካ ኢዞ ቤኢዲ ካዎ ሲንን ኢዞ ናሺዳ፤ ሂስቲዲ ኢዞ ካዎሶ ኤፊዳ።

¹⁶ ሂስቲን ኢዚ ጌዶን ካዎይ ኣብራሜ ሎኦ ኣይፌን ጼሊዲ ኣብራሜስ ዶርሳታኔ ቦራታ፥ ኣዴ ሃሬታኔ ማጫ ሃሬታ፥ ኣዴ ኣይሌታኔ ማጫ ኣይሌታ፥ ጋሜላታካ ኢሚዴስ።

¹⁷ ጊዶ ኣቲን ጎዳይ ኣብራሜ ማቼዮ ሶራ ጌዶን ጊብጼ ካዎ ቦላኔ ኢዛሶ ኣሳ ቦላ ቦሻ ዬዲዴስ።

¹⁸ ሂስቲን ካዎዚ ኣብራሜ ጼይጊዲ፥ «ኔኒ ሃይሳ ኣይስ ታ ቦላ ኦዲ? ኢዛ ኔ ማቾ ጊዲዳይሳ ኣይስ ታስ ዮታቤኪ?

¹⁹ ታ ኢዞ ማቾ ኤካና ማላ፥ ‹ኢዛ ታ ሚቾ› ጋዳ ኣዛስ ዎርዶታዲ? ሄኮ ሃኖ ኔ ማቼዮ ኤካዳ ባ!» ጊዴስ።

²⁰ ካዎዚካ ባ ኣይሌታ ኣብራሜ ኢዛ ማቼይራኔ ኢዛስ ዲዛዝ ኡባ ኬሲዲ ዬዳና ማላ ኣዛዚን ኣይሌቲ ኢስታ ዴሬፔ ኬሲ ዬዲዳ።