ሂዚቄላ ቲንቢቴ 6 - ጋሞ ማጻፋ

ኢስራኤሌ ዙምቡላታ ቦላ ዮቴቲዳ ቲንቢቴ

¹ ጎዳ ቃላይ ታኮ ዪዲ፥

² «ሃይሶ ኣሳ ናዉ! ኔ ኣይፌሶ ፑዴ ኢስራኤሌ ዙምቡላታኮ ዛራዳ ሃንቄታሼ ኢስታ ቦላ ቲንቢቴ ዮታ።

³ ‹ኢስራኤሌ ዙምቡላቶ! ኡባ ሃሪዛ ጎዳ ቃላ ሲዪቴ! ኡባ ሃሪዛ ጎዳይ ዙምቡላታስ፥ ፖጎኖታስ፥ ካካታሲኔ ዙሌታስ፡ ታ ኢንቴ ቦላ ማሻ ኤሃና፤ ኢንቴ ኢስታ ቦላ ጎይኒዛሶሆታካ ይሳና።

⁴ ኢንቴ ኢስታ ቦላ ያርሾ ያርሺዛሶሆቲካ ላሌታና፤ ቃሴ ኢንቴ ኢስታ ቦላ ኤጻኔ ጩዋሲዛሶሆቲካ ሜቄሬታና፤ ሹኬቲዳ ኢንቴ ኣሳታ ኢስታስ ጎይኒዛ ኤቃ ጾሳታ ሲንን ታ ዬጋና።

⁵ ታኒ ኢስራኤሌ ኣሳ ኣሃ ኢስታ ኤቃታ ሲንን ኢቺሳና፤ ኢንቴ ሜቄታካ ኢንቴ ያርሺዛሶሆታ ዩሾን ላላና።

⁶ ኢንቴ ኢስታን ዲዛ ካታማቲ ኡባይ ካይስ ጊዳና፤ ኢንቴ ጎይኒዛሶቲ ኡባይ ላሌታና፤ ሄሳካ ኢንቴ ያርሺዛሶሆቲ ቱናናኔ ላሌቲ ያና፤ ኢንቴ ኤቃ ጾሳቲ ኒፒ ጊ ሜቄሬታና፤ ኢንቴ ኤጻኔ ያርሺዛሶሆቲ ኒፒ ጊ ሜቄሬታና፤ ኢንቴ ኩሼ ኦሶቲ ዲፒ ጊ ያና።

⁷ ኢንቴ ኣሳይ ሹኬቲዲ ኢንቴ ጊዶን ኩንዳና፤ ታኒ ጎዳ ጊዲዳይሳ ኢንቴ ሄሳን ኤራና።

⁸ « ‹ታኒ ኢንቴፌ ማሻፌ ኬሲ ኤኪ ኣቲዳ ጉታ ኣሻና፤ ሄሳፌ ጉዬ ካዎቴታ ጊዶኒኔ ዴሬታ ጊዶን ኢንቴና ታ ላላና።

⁹ ሃይቲ ሃይቆፔ ኣቲዳይቲ ዲኤቲ ቢዳሶን ዲሼ ኢስቲ ታና ቆፓና፤ ኢስቲ ታፔ ሃኪዲ ላይማቴን ኩሚዳ ዎዚናኒኔ ዚታይ ኩሚዳ ኤቃ ጾሳታ ካሊዛ ኢንቴ ኣይፌታን ታና ሚሺሲዴታ፤ ባ ኦዳ ኢታቴፌኔ ሃራሲዛ ኤቃ ጾሳታፔ ዴንዲዳይሳን ኢስቲ ባርካ ባና ሃራሴታና።

¹⁰ ቃሴካ ታኒ ጎዳ ጊዲዳይሳ ኢስቲ ኤራና፤ ታኒ ኢስታ ቦላ ኢታ ሚሽ ኤሃና ጊዳይሲ ጮ ሃዳ ጊዴና።

¹¹ « ‹ኡባ ሃሪዛ ጎዳይ፡ ዪሎን ኔ ኩሼ ባቃ፤ ኔ ቶሆንካ ቢታ ቃካሼ፥ ዉ! ዉይ› ጋ ዋሳ፤ ኢስራኤሌ ኣሳይ ኦዳ ኢታቴፌኔ ሃራሲዛ ሃኖፔ ዴንዲዳይሳን ማሻን፥ ኮሻኒኔ ኢታ ሃርጌን ዉራና።

¹² ሃሆን ዲዛይቲ ኢታ ሃርጌን ሃይቃና፤ ማታን ዲዛይቲ ማሻን ኩንዳና፤ ቃሴ ሼምፖራ ፓጻ ኣቲዳይቲ ኮሻን ዉራና፤ ታ ሃንቆዛ ሃይሳ ማላን ኢስታ ቦላ ፖላና።

¹³ ኢስታ ኣሳፔ ሹኬቲዳይቲ ያርሾ ያርሺዛሶሆታ ዩሾ ኡባን፥ ኢስታ ኤቃ ጾሳታ ጊዶ ኡባን፥ ዙምቡላታ ቦላ ኡባን፥ ዙማታ ጼራ ቦላ ኡባን፥ ጪሊላ ሚ ጋርሳታን ኡባኒኔ ዎጋ ዎላታ ጋርሳታ ኡባን፥ ባንታ ኤቃ ጾሳታስ ሳዊዛ ያርሾ ያርሺዛሶሆታ ኡባን ዬጌቲ ኣቲዳይታ ኢንቴ ቤኢዲ ሄ ዎዴ ታኒ ጎዳ ጊዲዳይሳ ኢንቴ ኤራና።

¹⁴ ታኒ ታ ኩሼዛ ኢስታ ቦላ ዴንና፤ ኢስቲ ዲዛሶሆታ ዱጌሃን ባዞ ቢታፌ ቢዲ ፑዴሃን ዲቢላ ጋካናስ ቡላ ሂስታና፤ ታኒ ጎዳ ጊዲዳይሳ ኢስቲ ሄ ዎዴ ኤራና» ጊዴስ።