ሂዚቄላ ቲንቢቴ 4 - ጋሞ ማጻፋ

ሂዚቄሊ ዬሩሳላሜ ጊሻስ ዮቲዳ ሌሚሶ

¹ «ሃይሶ ኣሳ ናዉ! ኡርቃፌ ሜቲዳ ኢሲ ጹቤ ኤካዳ ኔ ሲንን ዎ፤ ሂስታዳ ዬሩሳላሜ ሚስሌ ኢዛ ቦላ ኦ።

² ሂስታዳ ዎታዳራይ ጊዶዛ ማላ ኢዞ ጊዶ፤ ሚጻ ኢዚን ጊጊሳ፤ ቢታ ሺሻ ዶራ፤ ኦላ ዎሳናታ ኢዚ ዩሾን ጊጊሳ፤ ጊምቤዛ ላሊዛ ዱሩማ ኢዚ ዩሾን ዋጻ።

³ ቃሴ ቢራታ ባሼ ኤካዳ ኔፔኔ ካታማፔ ጊዶን ቢራታ ጊምቤ ማላ ኤሳ። ኔ ሲን ኢዚኮ ዛራዳ ዴሬቃ፤ ኢዛ ዶዴቲዳሮ ጊዳና፤ ኔካ ኢዞ ዶዳና። ሄሲካ ኢስራኤሌ ኣሳስ ማላታ ጊዳና።

⁴ «ታኒ ኢስራኤሌ ኬ ሙሪዛይሳስ ማላታ ጊዳና ማላ ኔኒ ሃዲርሳ ሚሌን ኢቻ፤ ኔኒ ሃዲርሳ ሚሌን ኢቺዳ ዎዴታ ኡባን ኢስራኤሌ ኬ ባላ ማላ ጊዳና ማላ ቤሳና።

⁵ ኢስራኤሌ ኬይ ባ ባላን ዋኒ ቃጻዬታናኮ ኔ ቤሳና ማላ ታ ኔስ 390 ጋላሳታ ኢማዲስ፤ ኢሲ ኢሲ ጋላሳይ ኢስቲ ቃጻዬታና ኢሲ ኢሲ ላይ ቤሴስ።

⁶ «ሄሳፌ ጉዬ ኔኒ ኡሻቻ ሚሌን 40 ጋላስ ኢቻ፤ ሄሲ ዩሁዳ ኣሳይ ባ ባላን ዋኒ ቃጻዬታናኮ ቤሲዛ ማላታ ጊዳና፤ ኢሲ ኢሲ ጋላሳይ ኢስቲ ቃጻዬታና ኢሲ ኢሲ ላይ ቤሴስ።

⁷ ኔ ሲን ዬሩሳላሜ ዶዴቴኮ ዛራዳ ዴሬቃ፤ ኔ ኩሼ ዴንዳ ማንዳሼ ቲንቢቴ ኢዚ ቦላ ዮታ።

⁸ ሄ ዶዴቴ ኣጊናይ ዉራና ጋካናስ ኔ ሚሌ ሺሮንታ ማላ ታ ኔና ዎዶሮን ቃቻና።

⁹ «ሃኢ ኔኒ ጊስቴኔ ባንጋ፥ ባኤላኔ ሚሲራ፥ ማሊዶኔ ሙርቃ ኤካዳ ኦቶን ዎ፤ ኢዛፔ ካ ማ፤ ሂስታዳ ኔኒ ሃዲርሳ ሚሌን ኢቻ ዲዛ 390 ጋላሳታን ማና።

¹⁰ ሃች ሃች ኔ ማና ካ ጌዳራ ዎ፤ ኢዛ ዎዴን ዎዴን ኢሲ ዞላ ማ።

¹¹ ኔ ኡያና ሃካ ማካ ዎ፤ ሄሳ ኢዛ ዎዴን ዎዴን ናምኡ ኩባያ ኡያ።

¹² ሄ ዋላኬቲዳ ካ ኤካዳ ዴራ ሲንን ባንጋ ኡኬ ማላ ሺኣ ኬፌን ኡካዳ ማ።»

¹³ ጎዳይካ፥ «ሄሳ ማላ ሃኖታን ኢስራኤሌ ኣሳይ ታኒ ኢስታ ላላና ካዎቴታ ጊዶን ኢስቲ ቱና ካ ማናይሳስ ማላታ» ጊዴስ።

¹⁴ ሂስቲን ታኒ ዛራዳ፥ «ሃይ! ኡባ ሃሪዛ ጎዳዉ! ሙሌካ ታ ሄሳ ማላን ቱና ኤሪኬ፤ ታኒ ዬላጋቴፌ ዶማዳ ባዉታ ዎይኮ ዶኣይ ዎዳይሳ ማ ኤሪኬ፤ ቱኒዳ ኣሾይካ ታ ዶናኮ ሺቂ ኤሬና» ጋዲስ።

¹⁵ ኢዚካ ታና፥ «ኤሮ ሎኦ፥ ሺኣ ኬፌን ኡኪዛይሳ ኣጋዳ ኦሻ ኬፌን ኡካ» ጊዴስ።

¹⁶ ቃሴካ ጎዳይ ታና፥ «ሃይሶ ኣሳ ናዉ! ኣኬካ፤ ታኒ ዬሩሳላሜስ ካ ዪዛሶታ ዱና ሃናይስ፤ ኣሳይ ካ ሂርጊሼ ማካን ማና፤ ሃካ ያዪሼ ጉራ ኡያና።

¹⁷ ሄሳን ኢስታስ ዲዛ ካኔ ሃ ፓጫና፤ ኢሶይ ኢሳ ቤኢሼ ጮልኡ ጋና፤ ኢስቲ ባንታ ናጋራ ጋሶን ጊልቂ ያና።