ሂዚቄላ ቲንቢቴ 30 - ጋሞ ማጻፋ

ጊብጼ ቦላ ያና ቂጻቴ

¹ ጎዳ ቃላይ ታኮ ዪዲ፥

² «ሃይሶ ኣሳ ናዉ! ሃይሳ ማላ ጋዳ ቲንቢቴ ዮታ፡ ኡባ ሃሪዛ ጎዳይ፥ « ‹ዉ! ዉይ› ጋ ዋሳ፤ ‹ሄ ጋላሳይስ ኣዬ ኣና!› ጋ።

³ ጋላሳይ ማቲዴስ! ጎዳ ጋላሳይ ጋኪዴስ! ሄ ጋላሳይ ሻራ ጋላሳ፤ ካዎቴታ ኡባስ ባሻ ጋላሳ።

⁴ ጊብጼ ቦላ ኦላይ ያና፤ ቶጵያ ቦላካ ቱጋይ ያና። ዳሮቲ ጊብጼን ሹኬቲ ኩንዳና፤ ኢዚ ኣቆታይ ቦንቄታና፤ ኢዚ ዮቻቲካ ላሌታና።

⁵ «ቶጵያይኔ ፑጼይ፥ ሉዴይኔ ኣራቤይ፥ ሊቢያይኔ ጫቆ ቃላ ቢታ ኣሳይ ጊብጼራ ኢሲፌ ማሻን ዉራና።

⁶ «ኡባ ሃሪዛ ጎዳይ፥ ‹ጊብጼራ ዙፔቲዛይቲ ኩንዳና፤ ኢዛ ኦቶሬቲዛ ሚኖቴይ ያና፤ ሚጊዶሌፔ ቢዲ ኣሲዋ ጋካናስ፥ ኢስቲ ማሻን ሃይቃና› ጌስ።

⁷ ቡላ ቢታታ ጊዶን ኢስቲ ኣ ቡላ ጊዳና፤ ኢስታ ካታማቲካ ላሌቲዳ ካታማታ ጊዶፌ ኢሳ ጊዳና።

⁸ ታኒ ጊብጼን ታማ ኦይዛ ዎዴ፥ ኢዞ ማዲዛይቲ ኡባይ ኩንዲዛ ዎዴ፥ ታኒ ጎዳ ጊዲዳይሳ ኢስቲ ሄ ዎዴ ኤራና።

⁹ «ሄ ጋላስ ታ ቃስታኔቲ ማርካቤን ቢዲ ባ ጋ ኡቲዳሶሆፔ ኬሳናስ ቶጵያ ዳጋንና፤ ጊብጼይ ማን ሚቴቲዛ ዎዴ ኢስታ ጬጬይ ኦይካና፤ ቱማፔ ሄ ጋላሳይ ያና»።

¹⁰ ኡባ ሃሪዛ ጎዳይ፥ «ባቢሎኔ ካዎ ናቡካዳናጾሬ ኩሼን ቆዳይ ባይንዳ ጊብጼ ዴሬ ኣሳ ታ ይሳና።

¹¹ ካዎቴታ ኡባፌ ሜንጼ ኢታ ጊዲዳ ኢዚኔ ኢዛ ኦሳንቻቲ ቢታዮ ይሳናስ ያና ማላ ኦና፤ ባንታ ማሻ ጊብጼ ቦላ ሾዲዲ ቢታዮ ኣሃ ጻላ ሂስታና።

¹² ኣባዬ ሻፋ ታኒ ሜሊሳና፤ ቢታዮካ ኢታ ኣሳታስ ባይዛና፤ ኣላጋታ ኩሼን ቢታዮኔ ኢዚን ዲዛ ኡባ ታ ቡላ ሂስታና፤ ታኒ ጎዳይ ሃይሳ ዮታዲስ።

¹³ «ኤቃ ጾሳታ ታ ይሳና፤ ሜምፒሳን ዲዛ ሚስሌታ ታ ዲፒ ሂስታና፤ ሃይሳፌ ጉዬ ጊብጼን ሃላቃታናይ ዴና፤ ቢታይ ቦላ ታ ያሻቴ ኪታና።

¹⁴ ታኒ ጳጺሮሴ ቢታ ቡላ ሂስታና፤ ጻኖሴ ቦላ ታማ ዬዳና፤ ቴቤሴ ቦላ ቂጻቴ ዬጋና።

¹⁵ ጊብጼስ ሚጻ ጊዲዳ ሲና ቦላ ታ ባሻ ጉሳና፤ ቆዳይ ባይንዳ ቴቤሴ ኣሳ ታ ይሳና።

¹⁶ ታኒ ጊብጼ ቦላ ታማ ኤና፤ ሲኔይ ጬጬን ቡልኣኬታና፤ ቴቤሴይ ዳምባላን ሚቴታና፤ ሜምፒሳይ ዱጾንታ ጬጬ ጊዶ ጌላና።

¹⁷ ሄሊዮቴኔ ቡባስቴ ናቴቲ ማሻን ሲፌታና፤ ሄ ካታማቲካ ዲኤታና።

¹⁸ ታኒ ጊብጼ ቃምባራ ሜንዛ ዎዴ ጻፊናሴን ጋላሳይ ቃማና፤ ሄሳፌ ጉዬ ኢዛ ኦቶሬቲዳ ኢዚ ሚኖቴይ ኩንዳና፤ ኢዛ ሻራን ካሜታና፤ ኢዚ ጉታቲካ ዲኤታና።

¹⁹ ሄሳ ጊሻስ ታ ጊብጼ ቦላ ታ ቂጻቴ ኤሃና፤ ኢስቲካ ታኒ ጎዳ ጊዲዳይሳ ሄ ዎዴ ኤራና» ጊዴስ።

ጊብጼ ካዎ ኩንዴ

²⁰ ኑኒ ዲኤቲዳ ታማኔ ኢሲን ላይን፥ ኮይሮ ኣጊናን፥ ላፑን ጋላሳን ጎዳ ቃላይ ታኮ ዪዲ፥

²¹ «ሃይሶ ኣሳ ናዉ! ታኒ ጊብጼ ካዎ ቄሴ ሜንዲስ፤ ኢዚ ፓጻና ማላ ኢዛ ቄሴይ ኮሌቲቤና፤ ዎይኮ ኢዚ ማሻ ኦይኪ ዳንዳያና ማላ ኢዛ ኩሼይ ማቃን ኮሌቲቤና።

²² ሄሳ ጊሻስ ኡባ ሃሪዛ ጎዳይ፥ ‹ታኒ ጊብጼ ካዎ ፓሮኔ ቦላ ዴንዳዲስ፤ ኢዛስ ፓጻ ቄሴዛራኔ ሜቆ ቄሴዛራ ናምኣ ጋ ሜንና፤ ኢዛ ማሻይ ኢዛ ኩሼፔ ኬሲ ኤኪ ዎና ማላ ታ ኦና።

²³ ታኒ ጊብጼ ኣሳ ካዎቴታ ጊዶን ላላና፤ ሃራ ዴሬታ ጊዶንካ ዜራና።

²⁴ ታኒ ባቢሎኔ ካዎ ቄሴ ሚንዳ ታ ማሻካ ኢዛ ኦይና። ጊዶ ኣቲን ፓሮኔ ቄሴዛ ታ ሜንና፤ ኢዚካ ባ ሞርኬዛ ሲንን ኢታ ማዱንጺዳ ኣሳ ማላ ቶቃና።

²⁵ ባቢሎኔ ካዎ ቄሴ ታ ሚንና፤ ጊዶ ኣቲን ፓሮኔ ቄሴይ ዳቡራና፤ ታኒ ታ ማሻ ባቢሎኔ ካዎ ኩሼን ኦይን ኢዚካ ቃሺን ታኒ ጎዳ ጊዲዳይሳ ኢስቲ ኤራና።

²⁶ ታ ጊብጼታ ካዎቴታ ጊዶን ላላና፤ ዴሬታ ጊዶንካ ዜራና፤ ሄሳፌ ጉዬ ታኒ ጎዳ ጊዲዳይሳ ኢስቲ ሄ ዎዴ ኤራና› ጌስ» ጊዴስ።