ሂዚቄላ ቲንቢቴ 28 - ጋሞ ማጻፋ

ጺሮሴ ሃላቃ ቦላ ዮቴቲዳ ቲንቢቴ

¹ ጎዳ ቃላይ ታኮ ዪዲ፥

² «ሃይሶ ኣሳ ናዉ! ጺሮሴ ሃላቃስ ኡባ ሃሪዛ ጎዳይ፡ «ኔ ዎዚናይ ኦቶሮን ኩሚዲ፥ ‹ታኒ ጾሳ፤ ጾሳ ኣራታን ኣባስ ጊዶ ኣዳን ኡታዲስ› ጊዴስ። ኣይኮስካ ኔኒ ታኒ ጾሳ ማላ ኣ ኤራንቻ ቆፒኮካ ኔኒ ኣሳ ኣቲን ጾስ ዳካ።

³ ኔኒ ዳኔላፔ ቦላራ ኣ ኤራንቻ? ኔፔ ጌሚዳ ጹራ ዮኦይ ዴኔ?

⁴ ኔ ኣ ኤራቴኒኔ ኔ ኣኬካን ኔ ኣቆታ ዳጋሳዳሳ፤ ዎርቃኔ ቢራ ኔ ሚንጃ ኬን ሺሻዳሳ።

⁵ ኔ ዛልኤ ኦሶ ኤራቴን ኬሃ ቢዳ ጊሻስ፥ ኣቆታ ቦላ ኣቆታ ዳጋሳዳሳ፤ ኔ ኣቆታ ዳሮቴፌ ዴንዲዳይሳን ኔ ዎዚናይ ኦቶሮን ኩሚዴስ ጋዳ ዮታ።

⁶ «ሄሳ ጊሻስ ኡባ ሃሪዛ ጎዳይ፥ ‹ታኒ ጾሳ ማላ ኣ ኤራንቻ› ጋዳ ኔኒ ቆፒዛ ጊሻስ፥

⁷ ካዎቴታ ጊዶን ኬሂ ሜንጼ ኢታ ጊዲዳ ኣላጋታ ታ ኔ ቦላ ኤሃና። ኢስቲ ኔ ኣ ኤራቴ ፑላቴ ቦላ ባንታ ማሻ ሾዳና፤ ጊታ ኔ ቦንቾዛካ ቱኒሳና።

⁸ ኔና ዱጌ ኦላን ዬጋና፤ ጪማ ሃን ኣባ ጊዶን ኢታ ሃይቆ ኔ ሃይቃና።

⁹ ሂስቲን ኔኒ ኔና ዎዛይታ ሲንን፥ ‹ታኒ ጾሳ› ጋንዲ? ኔና ዎዛይታ ኩሼን ኔ ጌላሼ ኔኒ ኣሳ ኣቲን ጾስ ዳካ።

¹⁰ ኔኒ ኣላጋታ ኩሼን ኣማኖንታ ኣሳታ ሃይቆ ማላ ሃይቃና፤ ኡባ ሃሪዛ ጎዳይ፥ ‹ታኒ ሃይሳ ዮታዲስ› ጌስ» ጊዴስ።

ጺሮሴ ካዎ ኩንዴ

¹¹ ቃሴካ ጎዳ ቃላይ ታኮ ዪዲ፥

¹² «ሃይሶ ኣሳ ናዉ! ጺሮሴ ካዎ ጊሻስ ዚላላሼ ኡባ ሃሪዛ ጎዳይ ኔና፥ « ‹ኣ ኤራቴን ኩማዳ፥ ኩሜ ፑላቴ ማይኣዳ ኔኒ ኣሳስ ቱሙ ሌሚሶ ጊዳዳሳ።

¹³ ኔኒ ኤዴኔን፥ ጾሳ ኣታኪልቴ ጊዶን ዴኣዳሳ፤ ቦንቾ ሹቻዚ ኢሶይ ኢሶይ ኔና ኣሌቂሲዴስ፤ ኢስቲካ ሳርዲዮኔ፥ ቶጳዚዮኔኔ ኣልማዜ፥ ማርጊዴ፥ ኢያስጲዴኔ ሲምፔሬ፥ ቤሉሬ፥ ቢሪሌኔ ኣልኦ ኢንቁ፤ ኔ ማይኦቲካ ጾልቂዛ ኢንቁኔ ዎርቃ፤ ሃይቲ ኔኒ ሜቲዳ ጋላስ ኦሴቲዳ።

¹⁴ ኔኒ ናጊዛ ኪሩቤ ጊዳዳ ቲዬታዳሳ፤ ሄሳስ ታ ኔና ሹማዲስ፤ ኔኒ ካሴ ጌሻ ዙማን ጾሳይሳን ዴኣዳሳ፤ ታማ ማላ ሹቻታ ጊዶን ሲሜሬታዳሳ።

¹⁵ ኔኒ ሜቲዳ ጋላሳፌ ዶሚን፥ ኢታቴ ኔ ቦላ ቤቲዳ ጋላስ ጋካናስ፥ ኔኒ ኦጌ ኡባን ቦሬይ ባይንዳ ዴኣዳሳ።

¹⁶ ኔ ዛልኤይ ሚኒዳ ጊሻስ፥ ማካላቴን ኩማዳሳ፤ ናጋራካ ኦዳሳ። ሄሳ ጊሻስ ታ ኔና ጾሳ ዙማ ቦላፌ ካዉሻዳ ዬዴዲስ፤ ሃይሶ ናጊዛ ኪሩቤ! ታ ኔና ታማ ሚሳቲዛ ሹቻታ ጊዶፌ ኬሳዲስ።

¹⁷ ኔ ፑላቴ ጋሶን፥ ኔ ዎዚናይ ኦቶሬቲዴስ፤ ኔ ቦንቾ ጊታቴፌ ዴንዲዳይሳን፥ ኔ ኣ ኤራቴ ቱኒሳዳሳ፤ ሄሳ ጊሻስ ታኒ ኔና ዱጌ ቢታን ኦላዲስ፤ ሃራ ካዎታ ሴራናስ ማላታ ኦዲስ።

¹⁸ ኔ ናጋራኒኔ ኔ ጪሞ ዛልኤ ዳሮፔ ዴንዲዳይሳን፥ ኔ ጎይኒዛ ኬታ ቱኒሳዳሳ። ሄሳ ጊሻስ ታኒ ታማይ ኔ ጊዶፌ ኬዛና ማላ ኦዲስ፤ ኢዚካ ኔና ሚዴስ። ኔና ቤኢዛ ኡባ ሲንን፥ ቢታ ቦላ ኔና ቢዲን ኬሳዲስ።

¹⁹ ኔና ኤሪዛ ካዎቴቲ ኡባይ፥ ኔ ቦላ ጋኪዳይሳን ዳጋሚዳ። ኔ ዉርሴ ጬጪሲዛዝ ጊዲዴስ፤ ሃይሳፌ ጉዬ ኔስ ዴኦይ ዴና› ጌስ» ጊዴስ።

ሲዶና ቦላ ዮቴቲዳ ቲንቢቴ

²⁰ ጎዳ ቃላይ ታኮ ዪዲ፥

²¹ «ሃይሶ ኣሳ ናዉ! ኔ ኣይፌሶ ሲዶና ባጋ ዛራዳ ቲንቢቴ ኢዚ ቦላ ዮታ።

²² ኔኒ ዴራስ ኡባ ሃሪዛ ጎዳይ ኔና፥ ‹ሃኔ ሲዶና ታኒ ኔ ቦላ ዴንዳዲስ፤ ኔ ጊዶን ታኒ ቦንቼታና፤ ቂጻቴ ታኒ ኢዚ ቦላ ኤሂሺን፥ ታ ጌሻቴካ ታ ኢዚ ጊዶን ቆንጪሲሺን፥ ታኒ ጎዳ ጊዲዳይሳ ኢስቲ ኤራና።

²³ ታኒ ኢዚ ቦላ ኢታ ሃርጌ ኤሃና፤ ኢዚ ኦጌታን ሱ ጉካና ማላ ታ ኦና፤ ኡባ ባጋራ ዪዛ ማሻን ሲፌቲዳይቲ፥ ኢዚ ጊዶን ኩንዳና፤ ሄሳፌ ጉዬ ታኒ ጎዳ ጊዲዳይሳ ኢስቲ ኤራና።

²⁴ « ‹ሃይሳፌ ጉዬ ኢስራኤሌ ኣሳ ኡንኤዛ ኪንዲቾይኔ ጫዲዛ ኣጉን ጊዲዳ ሾሮቲ ኢስታ ዩሾን ዴቴና፤ ሄሳን ታኒ ኡባ ሃሪዛ ጎዳ ጊዲዳይሳ ኢስቲ ኤራና› ጌስ» ጊዴስ።

ኢስራኤሌ ኣሳ ኣንጄቴ

²⁵ ኡባ ሃሪዛ ጎዳይ፥ «ታ ኢስራኤሌ ዴራ ኢስቲ ላሌቲዳ ካዎቴታ ቢታፌ ሺሺዛ ዎዴ፥ ካዎቴቲ ጼሊሺን ታ ጌሻቴ ታኒ ኢስታ ጊዶን ቆንጪሳና፤ ሄሳፌ ጉዬ ኢስቲ ታኒ ታ ኣይሌ ያቆቤስ ኢሚዳ ባንታ ቢታን ዴኣና።

²⁶ ሄን ኢስቲ ሳሮን ዳና፤ ኬታ ኬጻና፤ ዎይኔ ቱራ ቶኪዛሶሆታ ጊጊሳና፤ ኢስቲ ካዳ ሾሮታ ታ ቃጻዪዛ ዎዴ ኢስቲ ሳሮን ዳና፤ ሄሳፌ ጉዬ ታኒ ጎዳይ ኢስታ ጾስ ጊዲዳይሳ ኢስቲ ኤራና» ጌስ።